မဲခေါင်၊ ဖေဖော်ဝါရီ ၂၄
ရှမ်းပြည်နယ်၊ လားရှိုးခရိုင်၊ တန့်ယန်းမြို့နယ်ရှိ နေအိမ်တစ်ခု အတွင်း စစ်ကောင်စီတပ်ဖွဲ့တွေ ဝင်ရောက် ပစ်ခတ်ခဲ့တဲ့ အတွက် အမျိုးသား ၃ ဦး သေဆုံးခဲ့တဲ့ ဖြစ်စဉ် ဖေဖော်ဝါရီ ၂၂ ရက်နေ့က ဖြစ်ပွားခဲ့ပါတယ်။
စစ်ကောင်စီတပ်ဖွဲ့ဝင်တွေ ဝင်ရောက်ပစ်ခတ်ခဲ့တဲ့ အဆိုပါ နေအိမ်ဟာ ရှမ်းပြည်တိုးတက်ရေးပါတီ၊ ရှမ်းပြည် တပ်မတော် SSPP/SSA တပ်ဖွဲ့ဝင် နေအိမ်ဖြစ်တယ်လို့ သတင်းထွက်နေပေမယ့် အဖွဲ့အစည်းနဲ့ သက်ဆိုင်တာ မရှိဘူးလို့ SSPP ပြောခွင့်ရ ဒုတိယ ဗိုလ်မှူးကြီးစိုင်းစုက မဲခေါင်သတင်းကို ပြောပါတယ်။
“သူတို့က SSPP/SSA တပ်ဖွဲ့ဝင် မိသားစု နေအိမ်ဆိုတာ မဟုတ်ပါဘူး။ မန်လွယ်ရွာသားတွေပါ။ Home made သေနတ်တွေ ထုတ်လုပ်ရောင်းချလို့ စစ်ကောင်စီရဲတွေက လာရောက်ပစ်ခတ် သတ်ဖြတ်သွားတယ်လို့ သိရပါတယ်။ ကျွန်တော်တို့ အဖွဲ့အစည်းနဲ့ ပတ်သက်မှု မရှိပါဘူး” လို့ SSPP ပြောခွင့်ရ ဒုတိယ ဗိုလ်မှူးကြီး စိုင်းစုက ပြောပါတယ်။
စစ်ကောင်စီတပ်ဖွဲ့က စစ်ကား ၄ စီးနဲ့ တန့်ယန်းမြို့နယ်၊ မိုင်းပတ်ကျေးရွာအုပ်စု၊ မန်လွယ်ကျေးရွာရှိ နေအိမ် တစ်အိမ်ကို ပိတ်ဆို့ ပစ်ခတ်ခဲ့တာကြောင့် မိသားစုဝင် ၃ ဦး ပွဲချင်းပြီး သေဆုံးခဲ့ရပါတယ်။
ပတ်ဝန်းကျင်ရှိ ဒေသခံတွေရဲ့ ပြောဆိုမှုအရ SSPP/SSA အဖွဲ့က လူတွေဆိုပြီး ပြောဆိုသံတွေ ကြားပြီးနောက် ပစ်ခတ်မှုတွေ ရှိခဲ့တာလို့ သိရပါတယ်။
စစ်ကောင်စီတပ်ဖွဲ့ နယ်မြေစိုးမိုးမှုရှိတဲ့ နေရာအချို့မှာ အကြမ်းဖက်လုပ်ရပ်တွေကို အလျဉ်းသင့်သလို ကျူးလွန်နေတဲ့ အတွက် ဒေသခံတွေ ထိတ်လန့်ကြောက်ရွံ့နေရပါတယ်။
MK-003
#Mekongnews
#SSPP/SSA
#ရှမ်းမြောက် #တန့်ယန်း
#MilitaryInCoup
