မဲခေါင်၊မတ် ၈
ပဲခူးတိုင်း၊ ညောင်လေးပင်မြို့နယ်၊ ညောင်ပင်ကြီးရွာကို စစ်ကောင်စီတပ်က ဒီကနေ့ လက်နက်ကြီးတွေနဲ့ ပစ်ခတ်နေတယ်လို ဒေသခံတွေက ပြောပါတယ်။
ညောင်ပင်ကြီးကျေးရွာကို စစ်ကောင်စီတပ်က အကြောင်းမဲ့ လက်နက်ကြီးတွေနဲ့ ပစ်ခတ်နေတာကြောင့် ကျေးရွာနေ ပြည်သူတွေ ထွက်ပြေးတိမ်းရှောင် နေရစဉ် စစ်ကောင်စီတပ်သားတွေက ရွာသားတွေရဲ့ ပစ္စည်းတွေကို ခိုးယူနေတယ်လို့ ဒေသခံ တစ်ဦးက မဲခေါင်သတင်းကို ပြောပါတယ်။
“ စစ်ကောင်စီတပ်တွေက ရွာထဲဝင်လာပြီး စစ်ရှောင်သွားတဲ့ ပြည်သူပိုင်အိမ်တွေကို ရိုက်ဖွင့်တယ်။ ပြီးတော့ အထဲက ပစ္စည်းတွေကိုလည်း ခိုးယူနေပါတယ်” လို့ သူကဆိုပါတယ်။
ရွာထဲက ပစ္စည်းတွေ သမတဲ့ အပြင် ဆိုင်ကယ် ၄ စီးနဲ့ ရွာထိပ်က ဆိုင်တွေကို မီးရှို့သွားပြီး ကျောက်တံခါးမြို့နယ်ရှိ သမင်အင်းကုန်းနဲ့ ကညင်ကျိုးကျေးရွာတွေကိုလည်း စစ်တပ်က ဝင်ရောက် မီးရှို့သွားတယ်လို့ သိရပါတယ်။
လက်ရှိ ရွှေကျင်မြို့နယ်၊ အင်းဂနီကျေးရွာ ဘုန်းကြီးကျောင်းဝင်း ထဲကို စစ်သား ၃၀ ဝန်းကျင်ခန့် ရောက်နေတယ်လို့ ဒေသခံတွေက သတင်းပေးပို့ထားပြီး ညောင်လေးပင်ခရိုင် ဒေသအချို့မှာ KNU နဲ့ စစ်ကောင်စီတပ် တိုက်ပွဲတွေ ပြင်းထန်နေတယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၂၁ ရက်က စစ်ကောင်စီတပ်သား ၁၀ ဦးသေဆုံးပြီး PDF တစ်ဦး ကျဆုံးခဲ့တဲ့ တိုက်ပွဲ ဖြစ်ပွားရာ ပုဇွန်မြောင်ကျေးရွာဟာ ညောင်ပင်ကြီးကျေးရွာနဲ့ ဆိုင်ကယ်ခရီး ၁၀ မိနစ်သာ ဝေးပါတယ်။
MK-007
