မြန်မာ့နွေဦး

စစ်ဦးစီးချုပ် လုပ်ကြံမှု စွပ်စွဲချက် AA လက်မခံ၊ ပါတီတွင်း လုပ်ကြံမှု ဖြစ်နိုင်တယ်လို့ တုံ့ပြန်

မဲခေါင် 6 Jan - 2023
စစ်တွေမြို့မှာ ALP ရဲ့ စစ်ဦးစီးချုပ်နဲ့ တပ်မှူး ၂ ဦးကို ဇန်နဝါရီ ၄ ရက်နေ့က လုပ်ကြံ သတ်ဖြတ်ခဲ့တယ်ဆိုပြီး ရခိုင်ပြည်လွတ်မြောက်ရေးပါတီ-ALP က ကြေညာချက်ထုတ်ပြန် တာဟာ အခြေအမြစ်မရှိတဲ့ စွပ်စွဲချက်လို့ ULA/AA ပြောခွင့်ရ ပုဂ္ဂိုလ် ခိုင်သုခက ပြောပါတယ်။

ALP စစ်ဦးစီးချုပ် ဗိုလ်ချုပ်ခိုင်စိုးမြ၊ အမှတ်(၁၀၁) တပ်ရင်းမှူး ဒုတိယဗိုလ်မှူးကြီးခိုင်ကျော်စိုးနဲ့ ဗိုလ်ကြီးခိုင်သူရိန္ဒ တို့ ၃ ဦးဟာ စစ်တွေမြို့မှာ ဇန်နဝါရီလ ၄ ရက်နေ့က အိမ်စီးကားပေါ်မှာ သေနတ်နဲ့ ပစ်သတ်ခံခဲ့ရတာ ဖြစ်ပြီး ALP အဖွဲ့က AA အဖွဲ့ရဲ့ လက်ချက်လို့ စွပ်စွဲခဲ့တာ ဖြစ်ပါတယ်။

ဒီကိစ္စကတော့ အခြေအမြစ်မရှိတဲ့ စွပ်စွဲချက်ပဲ ဖြစ်ပါတယ်။ ဒီလိုမျိုး ကျွန်တော်တို့ ULA/AA ကို အခြေအမြစ် မရှိ စွပ်စွဲတယ် ဆိုတာက နာမည်သေနေတဲ့ သူတို့ ALP ကို နာမည်ကြီးအောင် လုပ်ချင်လို့ လုပ်တာလည်း ဖြစ်နိုင်တာပေါ့

လို့ ULA/AA ပြောခွင့်ရ ပုဂ္ဂိုလ် ခိုင်သုခ က ရခိုင် သတင်းမီဒီယာတွေကို ဖြေကြားထားပါတယ်။

ဒါ့အပြင် အခြား အင်အားစု တစ်ခုခုက ပြဿနာတွေ ဖန်တီးလိုတဲ့ ရည်ရွယ်ချက်နဲ့ အခုလို လုပ်ကြံ သတ်ဖြတ်တာ ဖြစ်နိုင်သလို ALP ပါတီတွင်း ပဋိပက္ခတွေ ရှိနေတာကြောင့် ပါတီတွင်း လုပ်ကြံမှုလည်း ဖြစ်နိုင်တယ်လို့ သူက သုံးသပ်ပြောဆိုပါတယ်။

နေပြည်တော်ကို အစည်းအဝေး တက်ဖို့၊ သွားဖို့ ဆိုရင်တောင်မှ နှစ်ဖွဲ့ လုနေကြတာတွေ ရှိတယ်။ ပြီးလို့ရှိရင် သူတို့ ALP အချင်းချင်း ကြားမှာလည်းပဲ အာဏာဆိုင်ရာ ငွေကြေးဆိုင်ရာ အတွင်း ပဋိပက္ခတွေလည်း အများကြီး ရှိတယ် 

လို့ ခိုင်သုခက ဆိုပါတယ်။

ALP ရဲ့ မနေ့က ထုတ်ပြန်ချက်မှာတော့ စစ်ဦးစီးချုပ် အပါအဝင် ၃ ဦးကို ULA/AA က လုပ်ကြံတာဟာ ရခိုင် တမျိုးသားလုံးရဲ့ စည်းလုံးညီညွတ်ရေးကို ထိခိုက်ပျက်စီးစေရုံ သာမက ရခိုင်ပြည်သူ တွေကိုပါ တုန်လှုပ် ချောက်ခြားစေတဲ့ အတွက် ပြင်းပြင်းထန်ထန် ကန့်ကွက်ရှုတ်ချတယ်လို့ ဆိုထားပါတယ်။

အခုကိစ္စဟာ ရခိုင်ပြည်တွင်း မတည်မငြိမ်ဖြစ်အောင်၊ ရခိုင်တော်လှန်ရေးအဖွဲ့တွေ အချင်းချင်း စိတ် ဝမ်းကွဲအောင် စစ်ကောင်စီဘက်က လုပ်တာ ဖြစ်နိုင်တယ်လို့ နိုင်ငံရေး လေ့လာ သုံးသပ်သူ အချို့က ခန့် မှန်းနေကြပါတယ်။

အဖွဲ့ဝင် ၃ ဦး အသတ်ခံ လိုက်ရတာဟာ ဘယ်အဖွဲ့အစည်းတွေက သတ်သွားတယ် ဆိုတာကို သူ့အနေနဲ့ ထုတ်ဖော် ပြောဆိုစရာ မလိုအောင် ပြည်သူတွေ သိပြီးသားလို့ ALP ခေါင်းဆောင် ဒေါ်စောမြရာဇာလင်းက ဘီဘီစီ သတင်းဌာနကို ပြောပါတယ်။

ဇန်နဝါရီ ၅ ရက်နေ့ နေ့စွဲနဲ့ ထုတ်ပြန်တဲ့ ALP ထုတ်ပြန်ချက်ထဲမှာလည်း ရခိုင်ပြည်လွတ်မြောက်ရေးပါတီ ALP ရဲ့ ပါတီဝင်တွေ တပ်ဖွဲ့ဝင်တွေကို ရခိုင်လက်နက်ကိုင် AA အဖွဲ့က ဖမ်းဆီး နှိပ်စက် သတ်ဖြတ်တာတွေ၊ အရပ်သား ပြည်သူတွေကို ဥပဒေမဲ့ ဖမ်းဆီး သတ်ဖြတ်တာတွေ ဆက်တိုက် လုပ်နေတယ်လို့ ဖော်ပြထားပြီး အဲ့ဒီအတွက် တရားမျှတမှုရအောင် လုပ်ဆောင်မယ်လို့လည်း ပြောထားပါတယ်။

စစ်တွေ အခြေစိုက် ALP အဖွဲ့ဝင် တချို့ကို AA အဖွဲ့က ဖမ်းဆီးတာမျိုးတွေ အရင်က ရှိခဲ့သလို ALP တပ်ဖွဲ့ဟာ စစ်ကောင်စီနဲ့ ပေါင်းပြီး AA အဖွဲ့ဝင် တချို့ကို ဖမ်းဆီးတာတွေလည်း ရှိခဲ့တာပါ။

ဒီအတွက် AA တပ်ဖွဲ့နဲ့ ALP ကြား တင်းမာမှုတွေ ရှိခဲ့ဖူးပါတယ်။

၂၀၂၀ ခုနှစ် ဧပြီလ ၁၀ ရက်နေ့ကလည်း ရခိုင်ပြည်လွတ်မြောက်ရေးပါတီ-ALP တွဲဖက်အတွင်း ရေးမှူး (၁) ခိုင်အောင်စိုးသန်း အပါအဝင် ရခိုင်လူထု ကျန်းမာရေး လုပ်သားအဖွဲ့-RCHWA က ဆေးဝန်ထမ်းတွေကို AA အဖွဲ့က ပုဏ္ဏားကျွန်းမြို့နယ် ရွာတစ်ရွာ အနီးကနေ ဖမ်းခေါ်သွားခဲ့ဖူးပါတယ်။

ပြီးတော့ ၂၀၂၂ ခုနှစ် သြဂုတ်လ ၂ ရက်နေ့ကလည်း ALP ပါတီ ခေါင်းဆောင် ဒုဗိုလ်မှူးကြီး ခိုင်ပေါ်လင်းကို စစ်တွေမြို့ နေအိမ်ကနေ AA အဖွဲ့ က ဖမ်းဆီးခေါ်ဆောင် သွားခဲ့ဖူးပါတယ်။

ရခိုင်ပြည်လွတ်မြောက်ရေးပါတီ-ရခိုင်ပြည်လွတ်မြောက်ရေးတပ်မတော်-ALP/ALA ဟာ ၂၀၁၅ ခုနှစ် ကတည်းက အစိုးရနဲ့ ငြိမ်းချမ်းရေး သဘောတူစာချုပ်-NCA မှာ လက်မှတ်ရေးထိုးထားပြီး အာဏာသိမ်းပြီး နောက်ပိုင်းမှာလည်း စစ်ကောင်စီနဲ့ ဆက်ဆံရေး ကောင်းမွန်ကာ တွေ့ဆုံဆွေးနွေးမှုတွေ လုပ်နေတဲ့ အဖွဲ့ ဖြစ်ပါတယ်။

AA တပ်ဖွဲ့နဲ့ အာဏာသိမ်း စစ်ကောင်စီကြားမှာတော့ ပြီးခဲ့တဲ့ နှစ်ကုန်ပိုင်းမှာ နှုတ်အားဖြင့် အပစ်အခတ် ရပ်စဲရေး လုပ်ထားပေမဲ့ တရားဝင် သဘောတူ လက်မှတ်ထိုးတာတွေ မရှိသေးဘူးလို့ သိရပါတယ်။

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)

Mekong News

Mekong News

About Author

မဲခေါင်သတင်းဌာနမှ အကြီးတန်းတာဝန်ခံ အွန်လိုင်းအယ်ဒီတာတစ်ယောက် ဖြစ်သည်။ သတင်းမီဒီယာကျင့်ဝတ်၊ လူသားကျင့်ဝတ်တို့ကို လိုက်နာပြီး သတင်းများကို တင်ဆက်သွားမည် ဖြစ်သည်။

Related News

မြန်မာ့နွေဦး

စစ်ကောင်စီခန့်ရှမ်းပြည်နယ်စစ်ဝန်ကြီးချုပ် (သို့) မိုဆိုလူသတ်သမား

အာဏာသိမ်း ၂ နှစ်ပြည့်နေ့ ဖေဖော်ဝါရီလ ၁ ရက်နေ့မှာ စစ်ခေါင်းဆောင် မင်းအောင်လှိုင်က ရှမ်းပြည်နယ်နဲ့ ကရင်နီပြည်ကို တာဝန်ယူ ကိုင်တွယ်ခဲ့တဲ့
မြန်မာ့နွေဦး

ဖက်ဒရယ်နဲ့ ဒီမိုကရေစီလိုလားတဲ့ အင်အားစုတွေနဲ့လက်တွဲဖို့ SSPP ဆုံးဖြတ်

မဲခေါင်၊ ဖေဖော်ဝါရီ ၃ ဖက်ဒရယ်နဲ့ ဒီမိုကရေစီ လိုလားတဲ့ အင်အားစုတွေနဲ့ လက်တွဲသွားမယ်လို့ ရှမ်းတော်လှန်ရေး အင်အားစု ဖြစ်တဲ့ ရှမ်းပြည်တိုးတက်ရေးပါတီ-SSPP
မြန်မာ့နွေဦး

ဟုမ္မလင်းမှာ ရဟတ်ယာဉ်တစ်စီးကို PDF ပစ်ချ

မဲခေါင်၊ ဖေဖော်ဝါရီ ၃ စစ်ကိုင်းတိုင်း၊ ဟုမ္မလင်းမြို့နယ်၊ ရွှေပြည်အေးမြို့သစ်အနီးမှာ ဖြစ်ပွားခဲ့တဲ့ တိုက်ပွဲအတွင်း စစ်တပ်ရဲ့ ရဟတ်ယာဉ်တစ်စီးကို ပြည်သူ့ကာကွယ်ရေးတပ်တွေက ပစ်ချနိုင်ခဲ့တယ်လို့ NUG က ဒီကနေ့ ထုတ်ပြန်ပါတယ်။
မြန်မာ့နွေဦး

မန္တလေးမြို့တော်ဝန် ဒေါက်တာရဲလွင်ကို စစ်ကောင်စီက ထောင်ဒဏ် ၂ နှစ်ထပ်ချ

မဲခေါင်၊ ဖေဖော်ဝါရီ ၃ မန္တလေးမြို့တော်ဝန် ဒေါက်တာရဲလွင်ကို နိုင်ငံဘဏ္ဍာငွေ အလွဲသုံးမှုနဲ့ စစ်ကောင်စီက ဒီကနေ့ ထောင်ဒဏ် ၂ နှစ် ထပ်ချလိုက်တယ်လို့ နီးစပ်တဲ့ အသိုင်းအဝိုင်းမှ သိရပါတယ်။
မြန်မာ့နွေဦး

Spring Bliss နွေဦးစံရိပ်မွန် အိမ်ရာတွေ စတင်ရောင်းချပေးတော့မယ်

မဲခေါင်၊ ဖေဖော်ဝါရီ ၃ Spring Bliss 1-2-3 (နွေဦးစံရိပ်မွန် ၁၊၂၊၃ အိမ်ရာတွေကို ဖေဖေါ်ဝါရီလ ၁၁ ရက်နေ့က စတင် ရောင်းချပေးသွားမှာဖြစ်တယ်လို့ သိရပါတယ်။
မြန်မာ့နွေဦး

NUG ယာယီသမ္မတရဲ့ လူမှုကွန်ရက်စာမျက်နှာ တိုက်ခိုက်ခံရ

မဲခေါင်၊ ဖေဖော်ဝါရီ ၃ အမျိုးသား ညီညွတ်ရေး အစိုးရ၊ ယာယီ သမ္မတဒူဝါလရှီးလ ရဲ့ လူမှုကွန်ရက်-Facebook စာမျက်နှာ တိုက်ခိုက်ခံခဲ့ရတယ်လို့ သမ္မတရုံးက ထုတ်ပြန်ပါတယ်။
မြန်မာ့နွေဦး

ကောလင်းမှာ စစ်တပ်စစ်ကြောင်းထိုးမှုကြောင့် ကျေးရွာ ၃၈ ရွာမှ ပြည်သူ ၄၀,၀၀၀ နီးပါး စစ်ဘေးရှောင်နေရပြီး ကျည်ထိမှန်ကာ ပြည်သူတစ်ဦး သေဆုံး

မဲခေါင်၊ ဖေဖော်ဝါရီ ၃ စစ်ကိုင်းတိုင်း၊ ကောလင်းမြို့နယ်မှာ စစ်ကောင်စီ စစ်ကြောင်းထိုး ဝင်ရောက်မှုကြောင့် ကျေးရွာ ၃၈ ရွာမှ ဒေသခံ ပြည်သူ ၄၀,၀၀၀ နီးပါး စစ်ဘေးရှောင်နေရပြီး ကျည်ထိမှန်ကာ ပြည်သူ တစ်ဦး သေဆုံးခဲ့တယ်လို့
မြန်မာ့နွေဦး

စစ်တပ်က ရှေ့တန်းတပ်စခန်းသို့ လေကြာင်းက ရိက္ခာပို့စဉ် တိုက်လေယာဉ်‌တွေနဲ့ ဗုံးသီးကြဲချ

မဲခေါင်၊ ဖေဖော်ဝါရီ ၃ ကရင်ပြည်နယ်၊ တပ်မဟာ (၅) နယ်မြေရှိ စစ်ကောင်စီ ရှေ့တန်းတပ်စခန်းဖြစ်တဲ့ ကဟီးကျိုးစခန်းကို ကုန်းကြောင်းနဲ့ စားနပ်ရိက္ခာ သယ်ယူပို့ဆောင်မှု မပြုနိုင်တော့လို့ လေကြောင်းအသုံးပြုကာ စားနပ်ရိက္ခာတွေ လာရောက်ပို့ဆောင်စဉ် တိုက်လေယာဉ်‌တွေနဲ့ ဗုံးသီးကြဲချခဲ့တယ်လို့ သိရပါတယ်။