မဲခေါင်၊ ဇန်နဝါရီ ၂၄
စစ်တပ်အာဏာသိမ်းပြီးနောက်ပိုင်း အလုပ်အကိုင် အခွင့်အလမ်း ရှားပါးလာတာကြောင့် လူငယ်လူရွယ်တွေဟာ အိမ်နီးချင်းနိုင်ငံတွေ အပါအဝင် ပြည်ပနိုင်ငံတွေကို သွားရောက် အလုပ်လုပ်ကိုင်ကြရာမှာ ဂျပန် နိုင်ငံသို့ အလုပ်လုပ်ဖို့ ထွက်ခွာသူ ၁၀,၀၀၀ နီးပါး ရှိလာတယ်လို့ ပြည်ပ အလုပ်အကိုင်ရှာဖွေရေး အေဂျင်စီတွေ ထံက သိရပါတယ်။
၂၀၂၀ နိုဝင်ဘာကစပြီး ၂၀၂၁ ဖေဖော်ဝါရီလအထိ ဂျပန်နိုင်ငံကို လုပ်သား ၃,၀၀၀ ခန့်သာ စေလွှတ်နိုင်ခဲ့ပေ မယ့် အခု ၂၀၂၂ ခုနှစ် မတ်လကနေ နိုဝင်ဘာလ ၂၂ ရက်နေ့အထိ အေဂျင်စီ ၁၀၅ ခုကနေ လုပ်သား ၉,၀၀၀ ကျော် စေလွှတ်နိုင်ခဲ့တယ်လို့ ပြည်ပအလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ်ရဲ့ စာရင်းတွေမှာ ဖော်ပြထားပါတယ်။
“အလုပ်သင် လုပ်သားတွေကိုတော့ ဆောက်လုပ်ရေး၊ အထည်ချုပ်၊ စိုက်ပျိုး၊ မွေးမြူရေး၊ စားသောက် ကုန်လုပ်ငန်း၊ စက်မှုလုပ်ငန်း၊ ကုန်ထုတ်လုပ်ငန်းတွေမှာ ခေါ်ယူမှု အများဆုံး ဖြစ်ပြီးတော့ ကျွမ်းကျင် လုပ်သားတွေကိုတော့ လုပ်ငန်း အမျိုးအစား ၁၄ မျိုးရှိတဲ့ အထဲမှာမှ သက်ကြီး ရွယ်အို စောင့်ရှောက်ရေး၊ စားသောက်ကုန်နဲ့ စိုက်ပျိုးမွေးမြူရေး လုပ်ငန်းတွေ အတွက် အများဆုံးခေါ်ယူတယ်” လို့ အလုပ်အကိုင် ရှာဖွေရေး အေဂျင်စီ တာဝန်ရှိသူက ပြောပါတယ်။
လက်ရှိ ဂျပန်ဘက်က အလုပ်ခေါ်စာ အများစုမှာ JLPT ကို ဦးစားပေး တောင်းနေတာမို့ လူငယ်တွေ ဒုက္ခခံ ဖြေဆိုနေကြတာဖြစ်ပြီး ဂျပန်နိုင်ငံကို အသက် ၃၀ အောက် လူငယ်တွေ အများဆုံး သွားရောက် လုပ်ကိုင်ကြတာ ဖြစ်ပါတယ်။
“ဒီမှာက ဘာမှလုပ်လို့ အဆင်မပြေတော့ဘူး။ တစ်နေ့တစ်ခြား ကုန်ဈေးနှုန်းက ကြီးလာပြီ။ ဂျပန်သွား မရရင်တော့ စင်ကာပူ၊ မလေးရှား အနိမ့်ဆုံး ထိုင်းတော့ ထွက်မယ် စဉ်းစားထားတယ်။ ဂျပန်နိုင်ငံသွား ရောက် အလုပ်လုပ်ကိုင်ဖို့တော့ အခွင့်အလမ်း ပိုများနေတယ်” လို့ ဂျပန်သွားရောက်ဖို့ပြင်ဆင်နေသူ တစ်ဉီး က ပြောပါတယ်။
လကရှိ ဂျပန်နိုင်ငံ အလုပ်သွားရောက် လုပ်ကိုင်သူတွေထဲမှာ အမျိုးသား ၄,၀၀၀ ကျော်နဲ့ အမျိုးသမီး ၅,၀၀၀ ကျော် ရှိ တယ်လို့ မြန်မာပြည်ပ အလုပ်အကိုင် ဝန်ဆောင်မှု လုပ်ငန်းရှင်များ အဖွဲ့ချုပ်ရဲ့ စာရင်းတွေမှာ ဖော်ပြ ထားပါတယ်။
MK-010
