မဲခေါင်၊ ဇန်နဝါရီ ၂၃
စစ်ကိုင်းတိုင်း၊ ကန့်ဘလူမြို့နယ် အင်းမကျေးရွာ တဝိုက်ကို စစ်ကောင်စီတပ်က ဆက်တိုက် စစ်ကြောင်းထိုး မီးရှို့နေတာကြောင့် ဒေသခံ ၅,၀၀၀ ကျော် နေရပ် မပြန်နိုင်သေးဘဲ တောတောင်တွေထဲမှာ ထွက်ပြေး တိမ်းရှောင်နေရတဲ့ အတွက် အရေးပေါ် အကူအညီတွေ လိုအပ်နေတယ်လို့ သိရပါတယ်။
စစ်ကောင်စီ ခမရ (၃၆၈) နဲ့ ပျူစောထီးတွေဟာ အင်းမကျေးရွာကို ဇန်နဝါရီ ၂၁ ရက်နေ့က စတင် မီးရှို့ခဲ့တာ ဖြစ်ပြီး အင်းမ၊ ရှမ်းကုန်း၊ ကြာတကန်၊ ဖလားရ၊ ပင့်သာ၊ ချောင်းကြား စတဲ့ ကျေးရွာနေ ဒေသခံတွေ ထွက်ပြေးတိမ်းရှောင် နေကြရတာပါ။
“မှန်းလို့တော့ မရဘူးဗျ။ ပင့်သာဆို အိမ်ခြေ ၆၀၀ ကျော်ရှိတယ်။ အဲ့မှာတင် လူဦးရေ ၂,၅၀၀ လောက်ရှိနေပြီ။ အင်းမက လူဦးရေ ၁,၀၀၀ ကျော်လောက်ရှိတယ်။ အားလုံးပေါင်း ၅,၀၀၀ လောက် ခန့်မှန်းရမယ်ထင်တယ်” လို့ စစ်ဘေးရှောင် အခြေအနေကို ကျွန်းလှ တက်ကြွလှုပ်ရှားသူများအဖွဲ့ တာဝန်ရှိသူက ရှင်းပြပါတယ်။
လက်ရှိ ဆောင်းရာသီ ဖြစ်တာကြောင့် တောတောင်ထဲ ထွက်ပြေး တိမ်းရှောင်နေရတဲ့ မီးဘေးသင့် ပြည်သူတွေ အတွက် စောင်၊ အနွေးထည်၊ မိုးကာ၊ ဆေးဝါးနဲ့ အစားအသောက်တွေ အရေးပေါ် လိုအပ်လျက် ရှိနေတယ်လို့ သူက ဆိုပါတယ်။
အိမ်ခြေ ၂၄၀ ရှိတဲ့ အင်းမရွာဟာ ဒီရက်ပိုင်း အတွင်း ဒုတိယ အကြိမ် မီးရှို့ခံရမှုကြောင့် အိမ်ခြေ ၁၄ လုံးနဲ့ စပါး တင်း ၃၀၀ ကျော် မီးလောင်ဆုံးရှုံး ခဲ့ရပြီး ပြီးခဲ့တဲ့နှစ် နိုဝင်ဘာလကုန်ပိုင်း ပထမ အကြိမ် မီးရှို့ခံရစဉ်က အိမ် ၈၅ လုံး မီးလောင်ပျက်စီး ခဲ့တယ်လို့ သိရပါတယ်။
မနေ့ ဇန်နဝါရီ ၂၂ မှာတော့ ကိုးထောင်ဘို့က တပ်ရင်း ခမရ (၃၆၃) က အင်အား ၅၀ ဝန်းကျင်ဟာ ဂုန်ညင်းရှိုရွာကို ဝင်ရောက်ခဲ့ပြီး ဒီနေ့မနက်မှာတော့ ရွာကို မီးရှို့ဖျက်ဆီး လျက်ရှိရာ ပျက်စီးမှုကိုတော့ စုံစမ်းနေဆဲလို့ သိရပါတယ်။
အခုလို စစ်တပ်ရဲ့ စစ်ကြောင်းထိုးမှုတွေကြောင့် ပင့်သာကျေးရွာမှာ နေထိုင်တဲ့ ဒေသခံ တစ်ဦး အဆုံးစီရင်ခဲ့တယ်လို့ သိရပါတယ်။
“သူက အရင်စစ်ကြောင်းဝင်တော့ စစ်ရှောင်ရင်း ပိတ်မိလို့ လူသားဒိုင်းအဖြစ် အဖမ်းခံရဖူးတယ်ဗျ။ ဘယ်လောက်ထိ နှိပ်စက်ခံခဲ့ရလဲ မသိဘူး။ ပြန်လာကတည်းက ကျန်းမာရေး မကောင်းဘူး။ စိတ်ကယောင်ခြောက်ခြားထိ ဖြစ်နေတဲ့ အနေအထားပါ” လို့ ကျွန်းလှတက်ကြွလှုပ်ရှားသူများအဖွဲ့ တာဝန်ရှိသူက ပြောပါတယ်။
အာဏာသိမ်းပြီးနောက်ပိုင်း ကန့်ဘလူမြို့နယ်မှာ စစ်တပ်က စစ်ကြောင်းထိုး မီးရှို့မှုတွေ ဆက်တိုက်လုပ်နေပြီး နေအိမ်က ပစ္စည်းတွေ မွှေနှောက် လုယူတာ၊ အိမ်မွေး တိရိစ္ဆာန်တွေ သတ်ဖြတ်စားသောက်တာ အပါအဝင် လယ်ယာ လုပ်ငန်းသုံး ကျွဲ၊ နွားနဲ့ စပါးတွေကို စီးပွားဖြစ် ပြန်လည် ရောင်းချဖို့အတွက် ကားကြီး၊ ကားငယ်တွေနဲ့ တင်ဆောင် လုယူတာတွေ ဆက်တိုက်လုပ်နေတယ်လို့ ကျွန်းလှ တက်ကြွလှုပ်ရှားသူများအဖွဲ့က ထုတ်ပြန်ထားပါတယ်။
MK-009
ဓာတ်ပုံ – ကျွန်းလှတက်ကြွလှုပ်ရှားသူများ
