မဲခေါင်၊ ဇန်နဝါရီ ၂၇
စစ်ကိုင်းတိုင်း၊ ယင်းမာပင်နဲ့ ဆားလင်းကြီးမြို့နယ်တွေမှာ စစ်တပ်က နေ့စဉ် စစ်ကြောင်းထိုးပြီး ကျေးရွာတွေကို မီးရှို့ဖျက်ဆီး နေပေမယ့် ဒီနေ့ မနက်ပိုင်းမှာ စစ်အာဏာရှင် ဆန့်ကျင်ရေး ဆန္ဒပြသပိတ်ကို မပျက်မကွက် ချီတက်ခဲ့ကြပါတယ်။
စစ်ကောင်စီတပ်တွေဟာ ဇန်နဝါရီ ၂၃ ရက်နေ့ကစပြီး ဒီနေ့ထိ ယင်းမာပင်မြို့နယ်မှာ နေ့စဉ် စစ်ကြောင်းထိုးကာ ကျောက်မှော်၊ ထန်းတောကြီး၊ ရေပုတ်အင်း၊ မြရိပ်၊ အင်းဘတ်၊ ကျောက်ကုန်း၊ ကြက်လျှာ စတဲ့ ကျေးရွာတွေကို မီးရှို့ဖျက်ဆီးနေတာကြောင့် အနီးအနား ဝန်းကျင်က ဒေသခံ ၁,၀၀၀၀ ဝန်းကျင် ထွက်ပြေးနေရတယ်လို့ ဒေသခံတွေက ပြောပါတယ်။
အခုလို စစ်ကြောင်းထိုးမှုတွေကြားက ဒီနေ့ ဇန်နဝါရီ ၂၇ ရက်နေ့ မနက်ပိုင်းမှာ ယင်းမာပင်-ဆားလင်းကြီး ရွာပေါင်းစုံ သပိတ်က ၆၈၇ ရက်မြောက် အဖြစ် “တရားမဝင် အတုအယောင် ရွေးကောက်ပွဲ လူထုအားနဲ့ တိုက်ဖျက်ကြ” စာတမ်း ကိုင်ဆောင်ပြီး ဆန္ဒပြ သပိတ်စစ်ကြောင်း ထွက်ခဲ့ကြတာ ဖြစ်ပါတယ်။
“လူထု သပိတ်တွေက နိုင်ငံရေးအရ အင်မတန်မှ အရေးပါ ပါတယ်။ လူထုတွေရဲ့ အသံကို နိုင်ငံတကာက သိဖို့၊ တချို့သော သွေးအေးနေကြတဲ့ သူတွေ ကျွန်တော်တို့ အသံကို ကြားပြီးတော့ ပြန်လည်ပြီးတော့မှ သွေးနွေး ပြီးတော့ ငါတို့ပါမှရမယ်၊ ငါတို့လုပ်မှရမယ် ဆိုတဲ့ အသိစိတ်တွေ ပြန်လည်ဝင်ဖို့အတွက် ကျွန်တော်တို့ လူထု သပိတ်တွေကို ဆက်လက် ပြုလုပ်နေရခြင်း ဖြစ်ပါတယ်” လို့ သပိတ် ကော်မတီဝင် ကိုစနေက မဲခေါင်သတင်းကို ပြောပါတယ်။
တော်လှန်ရေးကာလ ၂ နှစ်နီးပါး ကြာလာတဲ့ အချိန်မှာ စစ်အာဏာရှင် တော်လှန်ဖို့ အတွက် သပိတ်တွေကို ယုံကြည်မှုရှိရှိနဲ့ ဆက်လုပ်နေတဲ့ ပြည်သူတွေရှိသလို တချို့လည်း စားဝတ်နေရေးအရ အလုပ်လုပ်ကိုင် ရတာတွေနဲ့ ယုံကြည်မှု လျော့နည်းလာတာတွေကြောင့် သပိတ်စစ်ကြောင်းတွေ အားနည်းလာခဲ့တယ်လို့ သူကဆိုပါတယ်။
ယင်းမာပင်-ဆားလင်းကြီး သပိတ်စစ်ကြောင်းကတော့ ကျေးရွာပေါင်းစုံနဲ့ ဖွဲ့စည်းထားတာကြောင့် စစ်ကောင်စီဘက်က မြို့နယ်ရဲ့ တစ်ဖက်ခြမ်းကို စစ်ကြောင်းထိုးနေရင် တခြားဖက်ခြမ်းက သပိတ်စစ်ကြောင်းထွက် ဆန္ဒပြကြပြီး အရေးကြီးတဲ့ အထိမ်းအမှတ် ရက်တွေမှာတော့ လူထုအင်အား ကောင်းကောင်းနဲ့ ဆက်လက်ချီတက်နိုင်ဆဲလို့ သိရပါတယ်။
“ပြည်သူ့ရဲ့ ကြီးမားတဲ့အားဟာ တိုင်းပြည်ရဲ့ အရွေ့၊ တော်လှန်ရေးရဲ့ အရွေ့ပဲ ဖြစ်ပါတယ်။ အဲ့ဒါကြောင့် ကျွန်တော်တို့ လူထုသပိတ်တွေဟာ လူထုအင်အားကိုပြတဲ့ ပြလို့ရတဲ့ နေရာတစ်ခု ဖြစ်တဲ့အတွက် ကျွန်တော်တို့တွေ ဆက်လက်ပြီးတော့မှ လူထုသပိတ်တွေကို ဆက်လက်ဖော်ဆောင်နေဖို့ လိုပါတယ်” လို့ ကိုစနေက ဆက်ပြောပါတယ်။
စစ်အာဏာရှင်ကို တော်လှန်နေတဲ့ ဒေသခံ ကာကွယ်ရေး ရဲဘော်တွေ အနေနဲ့လည်း တော်လှန်ရေးကို အဆုံးအဖြတ်ပေးမှာက လူထု ဖြစ်တာကြောင့် လူထုနဲ့ သဟဇာတဖြစ်ဖို့ လိုအပ်ပြီး လူထုကို မျက်နှာမူပြီး တော်လှန်ရေးကို ဆက်လက် လျှောက်လှမ်းကြဖို့ ကိုစနေက တိုက်တွန်းပါတယ်။
ဒီနေ့ မနက်ပိုင်းမှာတော့ ယင်းမာပင်မြို့နယ် မြရိပ်တောင်အနီးက တဲတိုက်တွေကို မီးရှို့ခဲ့တဲ့ စစ်တပ်နဲ့ ဒေသခံ ကာကွယ်ရေးတပ်ဖွဲ့တို့ တိုက်ပွဲ ဖြစ်ပွားခဲ့တာကြောင့် နှစ်ဖက် အထိအခိုက်များခဲ့ပြီး တိုက်ပွဲ အခြေအနေနဲ့ မီးရှို့ခံရတဲ့ စာရင်းတွေကိုတော့ စုံစမ်းဆဲ ဖြစ်တယ်လို့ ယင်းမာပင် သတင်းမှန် ပြန်ကြားရေးအဖွဲ့က ထုတ်ပြန်ထားပါတယ်။
MK-009
#MeKongNews
