မဲခေါင်၊ ဇန်နဝါရီ ၂၇
အာဏာသိမ်း စစ်ကောင်စီက လေကြောင်းကနေ ပြည်သူတွေကို တိုက်ခိုက်လာတာကြောင့် အမျိုးသား ညီညွတ်ရေး အစိုးရ-NUG ဦးဆောင် ဖွင့်လှစ်ထားတဲ့ စာသင်ကျောင်း ၆၀၀ ကျော်မှာ ဗုံးခိုကျင်းတွေ တူးထားရတယ်လို့ လူသားချင်းစာနာဝန်ကြီးဌာနက ဇန်နဝါရီလ ၂၅ ရက်နေ့မှာ ထုတ်ပြန်ပါတယ်။
စစ်ကောင်စီဟာ ပြည်သူတွေကို ရန်သူလို သဘောထားပြီး လေကြောင်း တိုက်ခိုက်မှုတွေ နိုင်ငံ အနှံ့အပြားမှာ ကျူးလွန်နေရာ အရပ်ဘက် ပစ်မှတ်တွေဖြစ်တဲ့ စာသင်ကျောင်း၊ ဆေးရုံနဲ့ လူနေအိမ်တွေကို ဦးတည် တိုက်ခိုက်နေပြီး နေ့စဉ် စစ်ရာဇဝတ်မှု မြောက်များစွာ ကျူးလွန်နေတယ်လို့ ထုတ်ပြန်ချက်မှာ ဖော်ပြထားပါတယ်။
“စစ်ကောင်စီဟာ စာသင်ကျောင်းတွေကို ပစ်မှတ်ထား လေကြောင်း တိုက်ခိုက်မှုတွေ၊ လက်နက်ကြီး ပစ်ခတ်မှုတွေကို ပြုလုပ်နေတာကြောင့် ကလေးတွေအတွက် ကျွန်တော်တို့ကြိုပြီး စီစဉ်ပေးထားရတာပေါ့။ အဲ့ဒါကြောင့် ကျွန်တော်တို့ ကလေးတွေကို အခုလို ကြိုတင်ကာကွယ်မှုတွေ ပြုလုပ်နေရတာပဲ ဖြစ်တယ်” လို့ NUG ပညာရေးဝန်ကြီးဌာနမှာ တာဝန်ထမ်းဆောင်နေတဲ့ ဆရာ တစ်ဉီးက ပြောပါတယ်။
လက်ရှိ NUG ပညာရေးဝန်ကြီးဌာနရဲ့ စာသင်ကျောင်း ၆၀၀ ကျော်မှာ ဗုံးခိုကျင်း ၆၀၀ ကျော် တူးထားပြီး တစ်ကျင်းအတွက် တစ်သိန်းခွဲကျပ် ထောက်ပံ့ခဲ့တယ်လို့ လူသားချင်း စာနာထောက်ထားရေးနှင့် ဘေးအန္တရာယ် စီမံခန့်ခွဲရေးဝန်ကြီးဌာနက ဆိုပါတယ်။
“ဒီပဲယင်းမြို့နယ် ဖြစ်စဉ်လိုဖြစ်မှာ ကျွန်မတို့ အရမ်း စိုးရိမ်တယ်။ ကလေးတွေရဲ့ အနာဂတ်က တစ်ဖြည်းဖြည်း ပျောက်ကွယ်လာပြီ။ လွတ်လွပ်မှုဆိုတာ သူတို့မှာ မရှိတော့ဘူး။ ကြောက်ရွံ့မှုနဲ့ ရင်ဆိုင်လာရပြီ။ ကလေးတွေကို ကျွန်မတို့က ဘေးကနေ တတ်နိုင်သမျှ ဖေးမပြီး အန္တရာယ်ကြားကနေ ရတဲ့အချိန် ပညာ သင်ကြား ပေးနေရတာပါ။ လေယာဉ်လာတဲ့ အချိန်ဆို စာသင်ကျောင်းတွေ ပိတ်ထားရတယ်” လို့ စစ်ကိုင်း တိုင်းမှ ဆရာမ တစ်ဉီးက ပြောပါတယ်။
စစ်ကောင်စီတပ်တွေဟာ ပြီးခဲ့တဲ့နှစ် စက်တင်ဘာ ၁၆ ရက်နေ့ နေ့လယ်ပိုင်းမှာ ဒီပဲယင်းမြို့နယ် လက်ယက်ကုန်းရွာကို ရဟတ်ယာဉ် ၄ စင်းနဲ့ စီးနင်းရာ ၂ စင်းက မဟာဓမ္မံရံသီ ဘုန်းကြီးကျောင်းဝန်းထဲက အလယ်တန်းကျောင်းကို ပစ်ခတ်ကာ ကျန်တဲ့ ၂ စင်းပေါ်ကနေ စစ်ကောင်စီတပ်သား ၈၀ ဝန်းကျင် ဆင်းလာပြီး လက်ယက်ကုန်းရွာထဲ ဝင်ရောက်စီးနင်း ခဲ့ပါတယ်။
အဲဒီ ဖြစ်စဉ်မှာ စစ်ကောင်စီတပ်က ရဟတ်ယာဉ် ၂ စင်း တစ်နာရီနီးပါး ကြာအောင် စာသင်ကျောင်းကို တရစပ်ပစ်ခတ် တိုက်ခိုက်ခဲ့လို့ ကျောင်းသူကျောင်းသားနဲ့ ဆရာဆရာမ အနည်းဆုံး ၁၃ ဦး သေဆုံးခဲ့ရပါတယ်။
လက်ရှိ “ CDM များ စေတနာအားနဲ့အတူ၊ ဗုံးကျည်ဆန်ကြားက ကလေးငယ်များကို ဝိုင်းလို့ကူ” အစီအစဉ်က ရရှိတဲ့ ရန်ပုံငွေတွေနဲ့ စာသင်ကျောင်းတွေမှာ လေကြောင်းရန်နဲ့ လက်နက်ကြီးရန်က ကာကွယ်ဖို့ ခေတ္တပုန်းခို ရာ ဗုံးခိုကျင်းတွေကို မြေပြင်မှ ပြည်သူအင်အားနဲ့အတူ အကောင်အထည်ဖော်နေရာ စာသင်ကျောင်းပေါင်း ၆၀၀ ကျော် ရှိလာပြီလို့ သိရပါတယ်။
MK-010
