မဲခေါင်၊ ဖေဖော်ဝါရီ ၆
စစ်ကိုင်းတိုင်း၊ ကလေးမြို့နယ်မှာ မူးယစ်ဆေးဝါး ရောင်းဝယ်ဖောက်ကားသူနဲ့ လက်ဝယ်ထားရှိသူတွေကို ဖမ်းဆီးရမိတယ်လို့ အမျိုးသား ညီညွတ်ရေး အစိုးရ၊ ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနက ဒီနေ့ ထုတ်ပြန်ပါတယ်။
ကလေးမြို့နယ်ရှိ ပြည်သူ့ကာကွယ်ရေး တပ်မတော်(PDF-Kalay) တပ်ရင်း (၃) နဲ့ CDF-KKG တပ်ဖွဲ့တို့ ပူးပေါင်းပြီး မူးယစ်ဆေးဝါး ရောင်းဝယ်ဖောက်ကားသူ တရားခံ တစ်ဦးနဲ့ ကျေးရွာ ပြည်သူ့ကာကွယ်ရေးအဖွဲ့မှ မူးယစ်ဆေးဝါး လက်ဝယ်ထားရှိသူ တစ်ဦးတို့ကို ဖမ်းဆီးခဲ့ပြီး ကလေးမြို့နယ် ပြည်သူ့ရဲတပ်ဖွဲ့-မြောက်ပိုင်းက ဥပဒေအရ အရေးယူနိုင်ဖို့ စီစဉ်ဆောင်ရွက်လျက်ရှိတယ်လို့ သိရပါတယ်။
ဖေဖော်ဝါရီလ ၃ ရက်မှာ PDF-Kalay တပ်ရင်း (၃) မှ တပ်ဖွဲ့ဝင် ၆ ဦးနဲ့ CDF-KKG တပ်ဖွဲ့မှ ဒုတပ်ခွဲမှူး ပါတပ်ဖွဲ့ဝင် ၄ ဦး စုစုပေါင်း တပ်ဖွဲ့ဝင် ၁၀ ဦးဟာ မူးယစ်ဆေးဝါး သတင်းအရ ကလေးမြို့နယ်ရှိ ကျေးရွာ တစ်ရွာမှာ နေထိုင်တဲ့ ဦးလှရွှေရဲ့ လယ်တောသို့ ရှာဖွေဖမ်းဆီးရာ ဦးလှရွှေမှာ အဖမ်းမခံဘဲ အရိုးအသွား ၂၇ လက်မခန့်ရှိ ငှက်ကြီးတောင်ဓားနဲ့ ပြန်လည်ခုခံရာ သေနတ်နဲ့ တစ်ချက် ပစ်ခတ် ဖမ်းဆီးခဲ့တယ်လို့ သိရပါတယ်။
သူ့ထံမှ ပလပ်စတစ်ဗူးခွံ အတွင်း ထည့်လျက် မူးယစ်ဆေးဝါးလို့ ယူဆရတဲ့ အဝါရောင်ဖောက် အမှုန့်ရောရာ ၄ ဂရမ်ခန့်နဲ့ အတူ မူးယစ်ဆေးဝါး သုံးစွဲရာမှာ အသုံးပြုတဲ့ ဆက်စပ်ပစ္စည်းတွေ ရှာဖွေတွေ့ရှိခဲ့တယ်လို့ ဆိုပါတယ်။
ဒီဖြစ်စဉ်ကြောင့် တရားမဝင် မူးယစ်ဆေးဝါး ရောင်းဝယ်သူ ဦးလှရွှေကို ကလေးမြို့နယ် ပြည်သူ့ရဲတပ်ဖွဲ့-မြောက်ပိုင်းက မူးယစ်ဆေးဝါးနဲ့ စိတ်ကိုပြောင်းလဲစေတဲ့ ဆေးဝါးများဆိုင်ရာ ဥပဒေအရ တရားစွဲဆိုနိုင်ရေး အမှုဖွင့် ဆောင်ရွက်လျက်ရှိတယ်လို့ သိရပါတယ်။
အလားတူ ဖေဖော်ဝါရီလ ၅ ရက်နေ့မှာ ကလေးမြို့နယ်၊ ကျေးရွာတစ်ရွာရှိ ကျေးရွာ ပြည်သူ့ကာကွယ်ရေး အဖွဲ့ ခေါင်းဆောင်ဦးစီးပြီး သတင်းအရ စစ်ဆေးရေး ဆောင်ရွက်စဉ် ကျေးရွာဘက် မောင်းနှင်လာတဲ့ 125 ဆိုင်ကယ်ကို ရပ်တန့်စစ်ဆေးရာ ဆိုင်ကယ်မောင်းနှင်သူ ဦးအောင်မာထွေး(ခ)ထွေးထွေးရဲ့ အောက်ခံ ဘောင်းဘီ အတွင်းမှ ပင်နီဆလင် ပုလင်းနဲ့ ထည့်ထားတဲ့ မူးယစ်ဆေးဝါးလို့ ယူဆရတဲ့ အဝါရောင်ဖောက်အမှုန့်ရောရာ တစ်ဂရမ်ခန့်နဲ့ အတူ ရှာဖွေတွေ့ရှိခဲ့တယ်လို့ သိရပါတယ်။
တရားမဝင် မူးယစ်ဆေးဝါး လက်ဝယ်ထားရှိသူ ဦးအောင်မာထွေး(ခ) ထွေးထွေးကို ကလေးမြို့နယ် ပြည်သူ့ရဲတပ်ဖွဲ့-မြောက်ပိုင်းက မူးယစ် ဆေးဝါးနဲ့ စိတ်ကိုပြောင်းလဲစေတတ်တဲ့ ဆေးဝါးများဆိုင်ရာ ဥပဒေအရ တရားစွဲဆိုနိုင်ရေး အမှုဖွင့်လှစ်ဆောင်ရွက်လျက် ရှိတယ်လို့ သိရပါတယ်။
ဓာတ်ပုံ-ကလေးမြို့နယ် ပြည်သူ့ရဲတပ်ဖွဲ့-မြောက်ပိုင်း။
MK-003
#MeKongNews
