မဲခေါင်၊ ဖေဖော်ဝါရီ ၂၅
ကန့်ဘလူမြို့နယ် တောင်ခြမ်း၊ ထန်းကုန်းတိုက်နယ်၊ ညောင်ဇင်ရွာမှာ ဒီကနေ့ မနက် အစောပိုင်းက ပြည်သူ ၅ ဦး မိုင်းထိမှန်ဒဏ်ရာ ရရှိကာ တစ်ဦး အသက်အန္တရာယ် စိုးရိမ်ရတဲ့ အခြေအနေမှာ ရှိတယ်လို့ ဒေသတွင်း သတင်းရင်းမြစ် Infinity group က ထုတ်ပြန်ပါတယ်။
မိုင်းထိမှန်သူတွေထဲမှာ ဒီနေ့ မနက်အစောပိုင်းက ညောင်ဇင်ရွာသို့ ကာဘိုးရွာဘက်မှ ဆိုင်ကယ်နဲ့ ဈေးလာရောင်းတဲ့ ဈေးသည် လင်မယားနဲ့ ရွာထဲက အရပ်သား ပြည်သူ ၃ ဦးတို့ဖြစ်ကာ ၅ ဦးစလုံး ကျေးရွာ အဝင်အထွက်လမ်းတွေမှာ မိုင်းထိမှန်တာလို့ သိရပါတယ်။
“ ဖြစ်တာက ရွာအဝင်အထွက် နေရာတွေမှာ ဖြစ်သွားတာ။ မိုင်းသံကြားပြီးတော့ သေနတ်ပစ်ဖောက်သံတွေလည်း ကြားနေရတယ်။ အခုက ရွာထဲကနေ ရွာပြင်ထွက်ရမှာတောင် ကြောက်နေရပြီ” လို့ ဒေသခံ တစ်ဦးက ပြောပါတယ်။
ရွာအနီးနားနေရာ အများစုမှာ အခုလို မိုင်းထောင်ထားတာဟာ နယ်ခံ ပျူစောထီးတွေက PDF လာတိုက်မှာကို စိုးရိမ်တာကြောင့် ထောင်ထားတာလို့ ဒေသခံတွေက ပြောပါတယ်။
ညောင်ဇင်ရွာဟာ ရွာခံပျူစောထီး အတန်အသင့် အားကောင်းတဲ့ ကျေးရွာဖြစ်ကာ ပြီးခဲ့တဲ့ ဖေဖော်ဝါရီ ၁၆ ရက်ကလည်း သူတို့ထောင်ထားတဲ့ မိုင်းကြောင့် လယ်တောကိုသွားတဲ့ ပြည်သူ တစ်ဦးနဲ့ နွား ၂ ကောင် ထိခိုက်ဒဏ်ရာ ရရှိခဲ့တယ်လို့ သိရပါတယ်။
MK-003
