မဲခေါင်၊ ဖေဖော်ဝါရီ ၁၀
စစ်ကိုင်းတိုင်း၊ ကနီမြို့နယ်မှာ စစ်တပ်ရိက္ခာတင် ရေယာဉ်ကို တိုက်ခိုက်သိမ်းပိုက်ရာ စစ်သား ၂၀ ဦးခန့်သေဆုံးကာ လက်နက်ခဲယမ်းတွေ၊ ဒီဇယ်နဲ့ စားနပ်ရိက္ခာတွေ သိမ်းဆည်းရမိတယ်လို့ ကျောက်လုံးကြီး KLG တပ်မဟာက ဒီကနေ့ ထုတ်ပြန်ပါတယ်။
ဇန်နဝါရီ ၃၁ ရက် ည ၇ နာရီခန့်မှာ ကနီမြို့နယ် သပြေတောနဲ့ ရွှေအုန်းပင်ကြား ချင်းတွင်းမြစ် တနေရာမှာ သောင်တင်နေတဲ့ စစ်ကောင်စီ ထောက်ပို့ သင်္ဘောကို ဒေသခံ ကာကွယ်ရေးတပ်တွေက တိုက်ခိုက် သိမ်းပိုက်ခဲ့တာလို့ သိရပါတယ်။
“ သေဆုံးတဲ့ စကစတွေ တစ်ချို့ကို ရေထဲ မျှောပြီး တစ်ချို့ကို စက်လှေနဲ့ ပြန်သယ်သွားကြတယ်ဗျ” လို့ ကျောက်လုံးကြီး KLG တပ်မဟာ သတင်းနဲ့ပြန်ကြားရေး တာဝန်ခံက ပြောပါတယ်။
စစ်ကောင်စီ ထောက်ပို့ သင်္ဘောပေါ်မှ ဒီဇယ်ဆီ ပေပါ ၃၀၀၀ ကျော်၊ ဆန်၊ ဆီ၊ ဆားနဲ့ လက်နက်ခဲယမ်း တွေကို ခရိုင်မှူးရဲ့ လမ်းညွှန်ချက်နဲ့ ခရိုင်းမှူးထံ အပ်နှံထားတယ်လို့ ကျောက်လုံးကြီး သူက ပြောပါတယ်။
စစ်ကောင်စီတပ် ရိက္ခာတင်ရေယာဉ်ကို ပြီးခဲ့တဲ့ ဇန်နဝါရီလ ၃၁ ရက်ကတည်းက ပြည်သူ့ကာကွယ်ရေး မဟာမိတ်တပ်ဖွဲ့တွေ တိုက်ခိုက်သိမ်းပိုက်ကာ ရေယာဉ်ပေါ်မှ လက်နက်ခဲယမ်းတွေ၊ စက်သုံးဆီပေပါ တွေနဲ့ စားသုံးကုန် ပစ္စည်းတွေကို ၉ ရက်ကြာ သယ်ယူခဲ့ကြရတယ်လို့ သိရပါတယ်။
ဇန်နဝါရီ ၃၁ ရက်မှ ဖေဖော်ဝါရီ ၈ ရက်အထိ သင်္ဘောပေါ်မှ ပစ္စည်းတွေ သယ်ယူနေရတာဖြစ်ပြီး ဒီနေ့မှ သယ်ယူလို့ ပြီးစီးတာကြောင့် သတင်းထုတ်ပြန်ရတာလို့လည်း သိရပါတယ်။
အဲဒီ ရေယာဉ်ဟာ အလျားပေ ၂၀၀ ခန့်၊ အနံ ပေ ၅၀ ခန့်ရှိတဲ့ ကုန်တင်ရေယာဉ်ဖြစ်ပြီး ဇန်နဝါရီ ၃၁ ရက်တိုက်ပွဲမှာ စစ်တပ်က အထိနာပြီးနောက် စွန့်ခွာ ထွက်ပြေးသွားလို့ သိမ်းဆည်းရမိခဲ့တာပါ။
ဒီရေယာဉ်ကို ကျောက်လုံးကြီး KLG PDF၊ နဂါးညီနောင်အဖွဲ့၊ Alpha အဖွဲ့၊ ချင်းတွင်းဂဠုန်ရာဇာ၊ ယင်းမာပင် PDA၊ ဗိုလ်နှုတ်ခမ်းမွှေးအဖွဲ့၊ ဗျတ္တညီနောင်၊ ချိုမိုင်မိုင်အဖွဲ့၊ မြောက်ယမားအဖွဲ့၊ ခရိုင် တပ်ရင်း (၁)၊ ခရိုင်တပ်ရင်း (၂)နဲ့ ကနီ ယင်းမာပင် ဆားလင်းကြီး မဟာမိတ်ညီနောင်တွေ ပူးပေါင်း သိမ်းပိုက်ခဲ့တာလို့ သိရပါတယ်။
MK-003
#MeKongNews
#ကနီ #KGLတပ်မဟာ #ရိက္ခာတင်ရေယာဉ်
