မဲခေါင်၊ စက်တင်ဘာ ၂၇
အီရန်အား စီးပွားရေးအရ အထီးကျန်အောင်လုပ်ရန် ကမ္ဘာတစ်ဝန်းသို့ အထူးကိုယ်စားလှယ်များ စေလွှတ်ခဲ့သည်ဟု အမေရိကန်ဘဏ္ဍာရေးဝန်ကြီး စကော့ဘက်ဆင့်က ယမန်နေ့တွင် ပြောကြားခဲ့ကာ အီရန်၏ လေကြောင်းလိုင်းများနှင့် ဘဏ်များကို ပစ်မှတ်ထားသော ကန့်သတ်ချက်အသစ်များ အလုပ်ဖြစ်ကြောင်း ပြောသည်။
“နိုင်ငံတွေနဲ့ ထိတွေ့ဆက်ဆံပြီး အီရန်အစိုးရအပေါ် အရေးယူကြရေးကို တောင်းဆိုဖို့ ကျနော့်ရဲ့ ညွှန်ကြားချက်နဲ့ ကမ္ဘာတစ်ဝန်းဆီ အဖွဲ့တွေ စေလွှတ်ခဲ့ပါတယ်။ အဲဒီ ကြိုးပမ်းအားထုတ်မှုတွေက ရလဒ်တွေ ထွက်ပေါ်လာပါတယ်” ဟု ဘက်ဆင့်က X လူမှုကွန်ရက်တွင် ပြောကြားသည်။
တူရကီနှင့် အိုမန်က ပုဂ္ဂလိကလေကြောင်းလိုင်း Mahan Air ၏ ဆိုက်ရောက်ခရီးစဉ်များကို ရပ်တန့်လိုက်ကြောင်း နှင့် ယူအေအီးနိုင်ငံကလည်း အီရန်လေကြောင်းလိုင်းများ၏ ခရီးစဉ်များအားလုံးကို ရပ်တန့်လိုက်သည်ဟု ဘက်ဆင့်က မှတ်ချက်ပြုသည်။
ယူအေအီးနိုင်ငံ၏ စီးပွားရေးအချက်အချာကျသော ဒူဘိုင်းမြို့သည် အီရန်လေကြောင်းလိုင်းများအတွက် အဓိကပြေးဆွဲသည့် နေရာတစ်ခုဖြစ်ကာ အီရန်လူမျိုးအများအပြားနေထိုင်သလို နီးကပ်သော စီးပွားရေးချိတ်ဆက်မှုများလည်း ရှိသည်။
ဘဏ်လုပ်ငန်းဆိုင်ရာ ကန့်သတ်ချက်အသစ်များကိုလည်း ဘက်ဆင့်က မီးမောင်းထိုးပြသည်။
စက်တင်ဘာ ၂၃ ရက်တွင် အီရန်နိုင်ငံမှ မယ်လီဘဏ်၏ ဘဏ်ခွဲအားလုံးမှ အသွားအပြန် ငွေပေးငွေယူ ပို့ဆောင်မှုအားလုံးကို ယူအေအီးဗဟိုဘဏ်က တားဆီးပိတ်ပင်ခဲ့ပြီး ၎င်းတို့က ငွေကြေးခဝါချမှု၊ အကြမ်းဖက်မှု နှင့် လက်နက်ပြန့်ပွားမှု ဥပဒေများကို ချိုးဖောက်နေသည်ဟု စွပ်စွဲပြောကြားသည်။
ပြီးခဲ့သည့် သီတင်းပတ်တွင်လည်း အီရန်၏ ပုဂ္ဂလိကတစ်ပိုင်း မဲလ်လက်ဘဏ် လိုင်စင်ကို တူရကီ အာဏာပိုင်များက ရုပ်သိမ်းလိုက်သည်။ ယင်းဘဏ်မှာလည်း အနောက်တိုင်းပိတ်ဆို့မှုများကို နှစ်ပေါင်းများစွာ ခံခဲ့ရသော ဘဏ်ဖြစ်သည်။
အမေရိကန်ဘဏ္ဍာရေးဝန်ကြီးဌာနက နိုင်ငံပေါင်း ၅၀ ကျော် နှင့် ဆွေးနွေးတိုင်ပင်ခဲ့ကြောင်း အမေရိကန်မီဒီယာ ဝေါလ်စထရိဂျာနယ်က ရေးသားခဲ့ပြီး ယင်းသတင်းကို ဘက်ဆင့်က ထပ်ဆင့်မျှဝေထားသည်။
အီရန်လေကြောင်းလိုင်း အားလုံးကို ကမ္ဘာတစ်ဝန်းတွင် ပိတ်ပစ်မည်ဟု ဘက်ဆင့်က စက်တင်ဘာ ၂၁ ရက် တွင် ကြုံးဝါးခဲ့သည်။
အေးကျော်
Ref:AFP
#MeKongNews
#အီရန်
#အထီးကျန်အောင်လုပ်မှု
#အမေရိကန်
