မဲခေါင်၊ စက်တင်ဘာ ၂၄
ကမ္ဘာကျော် America’s Got Talent (AGT) ပြိုင်ပွဲကြီးတွင် ဗိုလ်လုပွဲတက်ရောက်ခဲ့သည့်အပြင် ချန်ပီယံပါဖြစ်ခဲ့သည့် ၁၆ နှစ်အရွယ် ဖူးခက်သူ ရော့ခ်ကြယ်ပွင့်မလေး နီနီရွိုင်ရယ်ကို ထိုင်းနိုင်ငံ၏အကြီးမားဆုံး ပုဂ္ဂလိကလုပ်ငန်းစုကြီးဖြစ်သော CP Group ဥက္ကဌ ဒါနင်ချီအရာဗာနော့က မိသားစုနေထိုင်နိုင်မည့် ဇိမ်ခံကွန်ဒိုတစ်ခန်း ဆုချီးမြှင့်ပေးခဲ့သည်။
အမည်ရင်း ရာတီကန်အမ်လွိုင်သည် စက်တင်ဘာ ၂၄ ရက်တွင် ကျင်းပသည့် America’s Got Talent ပြိုင်ပွဲဗိုလ်လုပွဲ၌ အနိုင်ရဗိုလ်စွဲသည့်အတွက် ယင်းပြိုင်ပွဲမှပေးအပ်သည့် ဒေါ်လာ ၁ သန်းလည်း ရရှိနိုင်ခဲ့ကာ America’s Got Talent ပြိုင်ပွဲသမိုင်းတွင် အနိုင်ရဗိုလ်စွဲနိုင်သည့် ပထမဆုံးသော ထိုင်းနိုင်ငံသား ဖြစ်လာသည်။
ဘန်ကောက်ရှိ ဘန်နာထရတ်လမ်းပေါ်ရှိ မြေဧက ၁၆ ရိုင်ကျော်တွင် တည်ဆောက်နေသော Mulberry Grove The Forestias အဆင့်မြင့်ကွန်ဒိုအိမ်ရာစီမံကိန်းအတွင်းရှိ အိပ်ခန်း ၂ ခန်း၊ ရေချိုးခန်း ၂ ခန်း၊ အကျယ် ၈၉ ဒဿမ ၆၉ စတုရန်းမီတာရှိသော အဆင့်မြင့်ကွန်ဒိုခန်းအား နီနီရွိုင်ရယ်နှင့် မိသားစုထံ ဆုချီးမြှင့်ကြောင်းနှင့် တစ်ဆက်တည်း ပညာသင်ဆု၊ Apple Studio Display၊ Apple AirPods Max နှင့် ဗုဒ္ဓရုပ်ပွားတော်တစ်ဆူကိုပါ လက်ဆောင်ပေး အပ်ခဲ့သည်ဟု ဥက္ကဌ ဒါနင်ကပြောသည်။
CP Group သည် ဩဂုတ်လအတွင်းကလည်း နီနီရွိုင်ရယ် ပြိုင်ပွဲဝင်နေချိန် ပရိုမိုးရှင်းလုပ်ပေးခြင်းအနေဖြင့် နယူးယောက်ရှိ Times ရင်ပြင်၌ LED ဖန်သားပြင်ထက် နီနီရွိုင်ရယ်ပုံရိပ်များကို ပြသပေးခဲ့သည်။
အသက် ၁၆ နှစ်သာ ရှိသေးသော်လည်း နီနီရွိုင်ရယ်သည် မိသားစု၏အရေးပါမှုကို သိမြင်ခံစားတတ်ခြင်း၊ ရည်မှန်းချက် အကောင်အထည်ပေါ်ရန် မဆုတ်မနစ်ကြိုးပမ်းခြင်း၊ အခက်အခဲများကို ကျော်ဖြတ်နိုင်စွမ်းရှိခြင်း၊ ယုံကြည်ချက် မြင့်မားခြင်းတို့ အပြည့်ရှိကာ လူငယ်အားလုံးကို လှုံ့ဆော်ပေးနိုင်စွမ်းရှိသဖြင့် ယခုလို ဆုချီးမြှင်ခြင်းဖြစ်သည်ဟု ဥက္ကဌဒါနင်က ဆက်လက်ပြောကြားခဲ့သည်။
ကိုကလင်း
Ref:Thethaiger
#MeKongNews
#ထိုင်းနိုင်ငံ
#ပထမဆုံး
#AGT
#နီနီရွိုင်ရယ်
