မဲခေါင်၊ စက်တင်ဘာ ၂၂
မနက်ဖြန် စက်တင်ဘာ ၂၃ ရက်မှစ၍ အီရန်လေကြောင်းလိုင်းများ၏ နိုင်ငံတကာခရီးစဉ် လည်ပတ်မှုများ ရပ်တန့်သွားစေရန် ရည်ရွယ်၍ အမေရိကန်က အီရန်အပေါ် တားဆီးပိတ်ဆို့မှုများကို တိုးမြှင့်နေစဉ် အီရန်လေကြောင်းများအား ဝန်ဆောင်မှုပေးသော နိုင်ငံခြားလေဆိပ်များနှင့် လုပ်ငန်းများကို ဒေါ်လာအခြေခံဘဏ္ဍာရေးစနစ်မှ ဖြတ်တောက်ပစ်မည်ဟု အမေရိကန်က ခြိမ်းခြောက်လိုက်သည်။
အီရန်လေကြောင်းလိုင်းများသည် ဗုဒ္ဓဟူးနေ့မှစ၍ တစ်ကမ္ဘာလုံးတွင် ပိတ်ပင်မှုများ ရင်ဆိုင်ရမည်ဖြစ်ကြောင်း အမေရိကန်ဘဏ္ဍာရေးဝန်ကြီး စကော့ဘက်ဆင့်က ယမန်နေ့ အင်တာဗျူးတစ်ခုတွင် ပြောကြားသည်။
အီရန်တို့ကို ဝန်ဆောင်မှုပေးသော လေဆိပ်များနှင့် နိုင်ငံခြားကုမ္ပဏီများလည်း ဒေါ်လာစနစ်မှ ဖြတ်တောက်ခံရနိုင်ကြောင်းလည်း ၎င်းက သတိပေးပြောကြားသည်။
အမေရိကန်ဘဏ္ဍာရေးဝန်ကြီး၏ သတိပေးချက်သည် လေဆိပ်များတွင် အဆင်းအတက် လုပ်ခြင်း၊ လက်မှတ်ရောင်းချခြင်း၊ ကြိုတင်ဘွတ်ကင်တင်ခြင်း၊ လောင်စာဖြည့်တင်းပေးခြင်း နှင့် ပျံသန်းမှုဆိုင်ရာ အထောက်အကူပေးခြင်းတို့ပါ အကြုံးဝင်ကြောင်း သိရသည်။
ယင်းမှာ ပြည်ပ စီးပွားရေးလုပ်ငန်းများက အီရန်လေကြောင်းလိုင်းများအား ဝန်ဆောင်မှုပေးခြင်းကို ရပ်တန့်ရေး ဖိအားပေးရန် ရည်ရွယ်ထားခြင်း ဖြစ်သည်။
အီရန်၏ လေကြောင်းကဏ္ဍသည် နှစ်ပေါင်းများစွာ အမေရိကန်တို့၏ ပိတ်ဆို့မှုများကို ရင်ဆိုင်ခဲ့ရပြီး လေယာဉ်အသစ်များဝယ်ယူခြင်း အပိုအစိတ်အပိုင်းများနှင့် ပြင်ဆင်ထိန်းသိမ်းရေး ဝန်ဆောင်မှုများ ရယူရာ၌ ကန့်သတ်မှုများနှင့် ရင်ဆိုင်ခဲ့ရသည်။
ယခုနောက်ဆုံး ပိတ်ဆို့မှုများမှာ အီရန်လေကြောင်းလိုင်းများ နိုင်ငံတကာသို့ ဆက်လက်ပျံသန်းနိုင်အောင် ကူညီဆောင်ရွက်ပေးနေသော နိုင်ငံရပ်ခြားလုပ်ငန်းများကိုပါ ဖိအားပေးမှု တိုးချဲ့လိုက်ခြင်းဖြစ်သည်။
အေးကျော်
Ref:The Nation
#MekongNews
#အီရန်လေကြောင်းများ
#နိုင်ငံတကာလေဆိပ်များ
#အမေရိကန်
#သတိပေး
