မဲခေါင်၊ စက်တင်ဘာ ၂၁
ထိုင်းနိုင်ငံ၊ ဥဒုံဌာနီခရိုင်၊ နောင်ဆမ်ရောင်းလမ်းရှိ နေအိမ်တစ်လုံး၌ မွေးထားသည့်တိုက်ကြက် ၂၅ ကောင်အထိ ပျောက်ဆုံးနေသည်ကို အိမ်ရှင်ကသံသယများစွာ ရှိနေချိန် စက်တင်ဘာ ၂၀ ရက်က တရားခံအဖြစ် ၃ မီတာ ရှည်သော စပါးအုံးမြွေကြီးကို ဖမ်းဆီးရမိခဲ့သည်။
ဘန်ဘိုနန်ရပ်ကွက်ရှိ တိုက်ကြက်မွေးမြူရေးသမားဝက်သီဖတ်က ပြီးခဲ့သည့် ၂ ပတ်အတွင်း ကြက် ၂၅ ကောင်အထိ ပျောက်ဆုံးခဲ့ရာ ကြောင်ခုတ်ခြင်း သို့မဟုတ် သူခိုးခိုးခြင်းဟု ထင်မြင်ခဲ့သော်လည်း စက်တင်ဘာ ၂၀ ရက် ညဦးပိုင်းက ကြက်များအလန့်တကြားအော်သံကြားသဖြင့် ထွက်ကြည့်စဉ် ခြံတွင်း ကျွဲကောပင်ပေါ် ၃ မီတာရှည်သည့် စပါးအုံးမြွေကြီးအား တွေ့ရပြီး အပင်အောက်၌ ညှစ်သတ်ထားသော ကြက်အသေကောင်ကိုလည်း တွေ့ခဲ့ရသည်။
ထို့ကြောင့် ဝက်သီဖတ်က ဒေသခံဆောင်ဆမ်သန်ဖောင်ဒေးရှင်းသို့ ခေါ်ယူပြီး မြွေအား ဖမ်းဆီးခိုင်းကာ တောတွင်းသွားရောက်လွှတ်ပေးခဲ့သည်။
အလေးချိန် ၂၀ ကီလိုဂရမ်ရှိသော စပါးအုံးမြွေကြီးသည် အနီးအနားရှိ ဆောက်လုပ်ရေးဆိုက်တစ်ခု သို့မဟုတ် ခြုံနွယ်ပိတ်ပေါင်းများ ထူထပ်ရာနေရာတွင် နေထိုင်ဖွယ်ရှိကြောင်း ယူဆရပြီး အစာအဖြစ် ဝက်သီဖတ်အိမ်မှကြက်များကို နေ့စဉ် လာရောက်ခိုးစားခြင်းဖြစ်သည်။
တိုက်ကြက် ၂၅ ကောင်သေဆုံးခဲ့ရသော်လည်း ဝက်သီဖတ်က တစ်ကြိမ်မျှ မမြင်ဖူးသော ကြီးမားသည့် စပါးအုံးမြွေကြီး တွေ့ရှိရခြင်းမှာ ကံကောင်းစေမည်ဟု ယုံကြည်သဖြင့် ၎င်း၏ အိမ်နံပတ် ၁၄၇ ကို အောက်တိုဘာလ ၁ ရက်ထွက်မည့် ထိုင်းထီတွင် ရှာဖွေရွေးချယ် ထိုးသွားမည်ဟု ပြောဆိုခဲ့သည်။
ကိုကလင်း
Ref:Khaosod
#MekongNews
#ဥဒုံဌာနီ
#တိုက်ကြက်
#စပါးအုံးမြွေကြီး
#ဖမ်းမိ
