မဲခေါင်၊ စက်တင်ဘာ ၂၁

ရှမ်းပြည်မြောက်ပိုင်း၊ စစ်ကောင်စီထိန်းချုပ် လားရှိုးမြို့တွင် ရပ်ကွက်နယ်မြေအလိုက် စစ်မှုထမ်းကောက်ယူရန် ထပ်မံညွှန်ကြားမှုများ ရှိနေကြောင်း ဒေသခံများထံမှ သိရသည်။

ယခင်က ရပ်ကွက်မှာ စစ်မှုထမ်းကြေး စုပေါင်းပေးဆောင်ရမှုများရှိခဲ့သော်လည်း ယခုတွင် လူကိုရအောင်သာ ဆွဲခိုင်းသည်များရှိလာကြောင်း မြို့ခံတစ်ဦးက ပြောသည်။

“အရင်က ရပ်ကွက်က ငွေကောက်ထည့်တာပဲရှိတာ ၊ ခုက နယ်ထိန်းတစ်‌ယောက်စီကနေ လူ ၂ ယောက် ရအောင် ခေါ်ပေးရတယ်” ဟု ရဲစခန်းနှင့်နီးစပ်သူတစ်ဦးက ပြောသည်။

စစ်မှုထမ်း (ပစ)တစ်ဦးကိုပေါက်စျေး ကျပ်သိန်း ၁၀၀ ဝန်းကျင်ရှိပြီး ပွဲစားက သိန်း ၇၀ ရကာ စစ်မှုထမ်းမည့်သူက သိန်း ၃၀ ရကြောင်း ၎င်းက ပြောသည်။

လားရှိုးမြို့ပေါ်ရှိ ရပ်ကွက်ကြီး ၁၂ ခုတွင် စစ်မှုထမ်းကြေး ကောက်ခံမှုမှာ တစ်ပြေးညီ မတူညီသော်လည်း တစ်အိမ်ထောင်ကျပ် သုံးသောင်းမှ ငါးသောင်းအထိ ရှိနေကြောင်း သိရသည်။

လက်ရှိတွင် ငွေပေး၍ ရရှိသည့် လူများအပြင် ပေါ်တာဆွဲ၍ လူဖမ်းဆီးမှုများရှိလာနေသဖြင့် အသက်ပိုင်း အကျုံးဝင်လူငယ်များ သတိထား သွားလာနေကြရကြောင်း သိရသည်။

“လားရှိုးနေသူတွေက ရှောင်လို့ရပေမယ့် ခရီးသွားတွေကတော့ ပါသွားရင် ရောင်းစားခံရမှာ များတယ်” ဟု လားရှိုးဒေသခံတစ်ဦးက ပြောသည်။

စစ်ကောင်စီက ပြည်သူ့စစ်မှုထမ်း အပတ်စဥ် ၂၆ သင်တန်း ဆင်းပြီးနောက် ယခုတွင် အပတ်စဥ် ၂၉ ကို ဖွင့်လှစ်ရန် အဓမ္မနည်းမျိုးစုံဖြင့် လူသစ်စု ​ဆောင်းနေခြင်း ဖြစ်သည်။

စစ်ကောင်စီသည် ပစ များကို ပြည်တွင်းစစ်မြေပြင်များတွင် အသေခံခိုင်းနေသည်သာမက ပြည်ပ ရုရှားစစ်မြေပြင်သို့ပါ စေလွှတ်၍ အသေခံခိုင်းရန် စီစဥ်နေကြောင်း စစ်သတင်းအရင်းအမြစ်များထံက သိရှိရသည်။

#MeKongNews
#ရှမ်းမြောက်
#လားရှိုး
#စစ်ကောင်စီ
#ပြည်သူ့စစ်
#စစ်မှုထမ်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)