မဲခေါင်၊ စက်တင်ဘာ ၁၆
မန္တလေးမြို့၊ မဟာအောင်မြေမြို့နယ်အတွင်း အွန်လိုင်းအသုံးပြု၍ ကျောက်မျက်ရတနာအတုများနှင့် အရည်အသွေးညံ့ ကျောက်စိမ်းများကို လိမ်လည်ရောင်းချနေသည့် တရုတ်၊ အင်ဒိုနီးရှားနှင့် မလေးရှားနိုင်ငံသား ၁၁ ဦး အပါအဝင် စုစုပေါင်း ၂၈ ဦးကို ဖုန်းအလုံး ၅၀၀ ကျော်၊ ကွန်ပျူတာများနှင့်အတူ ဖမ်းဆီးရမိခဲ့ကြောင်း စစ်ကောင်စီဘက်က ယနေ့ သတင်းထုတ်ပြန်သည်။
ဖြစ်စဉ်မှာ မဟာအောင်မြေအရှေ့ရပ်ကွက်၊ လမ်း (၈၀)၊ ၃၉ လမ်းနှင့် လမ်း ၄၀ ကြားရှိ နေအိမ်တစ်လုံးတွင် နိုင်ငံခြားသားများ အွန်လိုင်းမှ ကျောက်မျက်ရတနာ လိမ်လည်ရောင်းချနေသည်ဟုဆိုကာ ပြီးခဲ့သည့် စက်တင်ဘာလ ၂ ရက် နံနက်ပိုင်းက ဝင်ရောက်စီးနင်းခဲ့ခြင်း ဖြစ်သည်။
ယင်းနေရာတွင် တရုတ်နိုင်ငံသား Mr. Chen Xiao Dai (ချိန်ရှောင်းတိုက်) ဦးဆောင်သည့် တရုတ်နိုင်ငံသား ၂ ဦး၊ အင်ဒိုနီးရှားနိုင်ငံသား ၄ ဦး၊ မလေးရှားနိုင်ငံသား ၁ ဦးနှင့် မြန်မာနိုင်ငံသား ၁၃ ဦး၊ စုစုပေါင်း ၂၀ ဦးကို ကွန်ပျူတာ အလုံး ၃၀ ကျော်၊ လက်ကိုင်ဖုန်း ၈၁ လုံးတို့နှင့်အတူ စတင်ဖမ်းဆီးရမိခဲ့သည်ဟု ဆိုသည်။
ဖမ်းဆီးမှုမှ ကွင်းဆက်အဖြစ် စက်တင်ဘာလ ၃ ရက် ညနေပိုင်းတွင် မဟာမြိုင် (၁) ရပ်ကွက်၊ ၆၈ လမ်းနှင့် ၁၀၁ လမ်းထောင့်ရှိ အင်ခွန်ခါးတောမ် ပိုင်ဆိုင်သည့် “MagDalenamoom ကျောက်မျက်ရတနာရောင်းဝယ်ရေး” နေအိမ်အား ထပ်မံဝင်ရောက်ရှာဖွေခဲ့သည်။ ထိုရှာဖွေမှုအတွင်း နေအိမ်ပိုင်ရှင် အင်ခွန်ခါးတောမ် အပါအဝင် မြန်မာနိုင်ငံသား ၄ ဦးနှင့် တရုတ်နိုင်ငံသား ၄ ဦးတို့ကို လက်ကိုင်ဖုန်း ၄၉၈ လုံး၊ ကွန်ပျူတာများနှင့် ကျောက်စိမ်းလက်ကောက် ၁၅ ကွင်းတို့နှင့်အတူ ထပ်မံဖမ်းဆီးရမိခဲ့ကြောင်း ဖော်ပြထားသည်။
စစ်ကောင်စီ၏ စစ်ဆေးချက်များအရ အဆိုပါဂိုဏ်းကို ဦးဆောင်သူမှာ တရုတ်နိုင်ငံသား Chen Xiao Dai ဖြစ်ပြီး၊ လိမ်လည်ရာတွင် အသုံးပြုသည့် ဖုန်းအလုံး ၅၀၀ ခန့်ကို လာအိုနယ်စပ်မှတစ်ဆင့် မြန်မာနိုင်ငံအတွင်းသို့ တရားမဝင် မှောင်ခိုတင်သွင်းခဲ့ခြင်းဖြစ်ကြောင်း သိရသည်။
၎င်းတို့သည် မဟာအောင်မြေမြို့နယ်ရှိ သုံးထပ်တိုက်နှင့် အင်ခွန်ခါးတောမ်၏ ကျောက်မျက်အရောင်းခြံတို့တွင် ကျောက်စိမ်းအချောထည်အတုများနှင့် အရည်အသွေးညံ့ ပစ္စည်းများကို စုဆောင်းထားကာ အွန်လိုင်း Live လွှင့်၍ ကံစမ်းမဲဖောက်သည့် ပုံစံဖြင့် လိမ်လည်ရောင်းချခဲ့ကြသည်။ ထို့နောက် မဲပေါက်သူများကို လက်ဆောင်အဖြစ် ကျောက်စိမ်းအကြမ်းထည် ရရှိသဖြင့် ပေးပို့ခနှင့် အခွန်အခ ကျသင့်သည်ဟုဆိုကာ ငွေလွှဲခိုင်းပြီးနောက် Block လုပ်၍ ငွေကြေးလိမ်လည်ခဲ့ခြင်း ဖြစ်သည်။
လိမ်လည်ရရှိသည့် ငွေများကိုလည်း အင်ဒိုနီးရှားနှင့် မလေးရှားနိုင်ငံရှိ ဘဏ်အကောင့်များသို့ တိုက်ရိုက်လွှဲပြောင်း စေခဲ့ခြင်းဖြစ်ကြောင်း စစ်ကောင်စီက ထုတ်ပြန်ထားပြီး၊ ဖမ်းဆီးရမိသည့် တရုတ် ၆ ဦး၊ အင်ဒိုနီးရှား ၄ ဦး၊ မလေးရှား ၁ ဦးနှင့် မြန်မာ ၁၇ ဦး၊ စုစုပေါင်း ၂၈ ဦးကို အရေးယူရန် ဆောင်ရွက်နေသည်ဟု ဆိုသည်။
#MeKongNews
#မန္တလေး
#ကျားဖြန့်
#တရုတ်
#ကျောက်မြတ်ရတနာ
