မဲခေါင်၊ စက်တင်ဘာ ၁၄
ရှမ်းပြည်တောင်ပိုင်း၊ လွိုင်လင်-နမ့်စန်လမ်းမပေါ်ရှိ အချိန်ကြာမြင့်စွာ ရပ်ထားသည့် ပိုင်ရှင်မဲ့ကားတစ်စီးကို စစ်ကောင်စီက သိမ်းဆည်းလိုက်သည်ဟု သတင်းရင်းမြစ်များထံမှ သိရသည်။
စက်တင်ဘာ ၁၁ ရက်တွင် လွိုင်လင်-နမ့်စန်ကားလမ်းပေါ်ရှိ မိုင်တိုင် ၁၇၂/၇ တွင် အချိန်ကြားမြင့်စွာ ရပ်ထားသည့် ကားတစ်စီးကို စက်တင်ဘာ ၁၂ ရက်တွင် စစ်ကောင်စီတပ်ဖွဲ့က သွားရောက်သိမ်းဆည်းခဲ့သည်။
“လမ်းဘေးမှာ ဒီအတိုင်းရပ်ထားတာ လေးငါးရက်ရှိပြီ။ အဲ့ကြောင့် ရဲတွေ သွားသိမ်းလိုက်တာ အခုရုံးရောက်သွားပြီ။ ရဲတွေပြောတာက လိုင်စင်မရှိရင် အပြီးသိမ်းမယ်တဲ့၊ ဒါပေမယ့်ဒီဖက်ကားက သိတဲ့အတိုင်း ကားတွေက အကုန်နီးပါး လိုင်စင်မဲ့တွေပဲလေ။ ကားလိုချင်လို့ အကွက်တွေရွေ့တာလားမသိဘူး”ဟု ဖြစ်စဉ်ကို သိရှိသည့် သတင်းရင်းမြစ်ကပြောသည်။
မြန်မာနိုင်ငံ၏ ကားတင်သွင်းခွင့်မူဝါဒများကြောင့် ကားဈေးအဆမတန် မြင့်မားနေသဖြင့် ရှမ်းပြည်ရှိ ပြည်သူအများစုသည် ၎င်းတို့လက်လှမ်းမှီသည့် ထိုင်းနိုင်ငံမှတဆင့် ဝင်ရောက်လာသော တပတ်ရစ်လိုင်စင်မဲ့ဂျပန်ကားများကို သိန်းရာချီပေးဝယ်ကာ စားဝတ်နေရေး လူမှုရေး စီးပွားရေးစသည်တို့အတွက် အသုံးပြုနေရသည်။
ထိုသို့ ဖြစ်နေသည်ကို အခွင့်ကောင်းယူကာ စစ်ကောင်စီလက်အောက်ခံ တပ်ဖွဲ့များ ရဲများသည် အကြောင်းအမျိုးမျိုးပြကာ ငွေတောင်းစားခြင်း ဆက်ကြေးကောက်ခံခြင်း ကိုယ်ကျိုးအတွက် ကားသိမ်းယူခြင်းများကို နည်းအမျိုးမျိုးဖြင့် ပြုလုပ်လျက်ရှိသည်။
#MeKongNews
#ရှမ်းတောင်
#လွိုင်လင်
#နမ့်စန်
#ပိုင်ရှင်မဲ့
#စစ်ကောင်စီ
#သိမ်းဆည်း
