မဲခေါင်၊ စက်တင်ဘာ ၃
ထိုင်းနိုင်ငံ၊ ဖစ္စနူလော့ခရိုင်နေ ၂၉ နှစ်အရွယ် ထိုင်းအမျိုးသမီးသည် မြစ်ငါးဖမ်းသမားများအတွက် ငါးစာအဖြစ် ပိုးဟပ်များကို မွေးမြူရောင်းချခြင်းမှ တစ်လ ဘတ်တစ်သိန်းကျော် ရရှိနေကြောင်း သိရသည်။
ချမ်ဆန်းဆောင်ခရမ်အရပ်တွင် နေထိုင်သော နာတာလီယာအမဟာဆီမဲ ဆိုသည့် အမျိုးသမီးသည် ယွမ်မြစ်ဘေးတွင် နေထိုင်ကာ ထိုမြစ်အတွင်း ငါးမျှားကြသူများအတွက် အကောင်းဆုံးငါးစာမှာ ပိုးဟပ်ဖြစ်ကြောင်း သိရှိသွားပြီး ပိုးဟပ်မွေးမြူရန် အကြံပေးမှုများ ရှိလာသဖြင့် စနစ်တကျမွေးမြူ ရောင်းချခြင်းဖြင့် စီးပွားဖြစ်လာခဲ့ခြင်း ဖြစ်သည်။
နာတာလီယာသည် ပိုးဟပ်များကို သာမန်ပိုးဟပ်များကဲ့သို့ အညစ်အကြေးများ စားသောက်ကြီးပြင်းမှုမျိုး အဖြစ်မခံဘဲ နေ့စဉ် ရေသန့်သာတိုက်ကာ သန့်ရှင်းသောကြက်စာများ ကျွေးပြီး မွေးမြူသည်။
သားပေါက်များ အဖြူရောင်မှ နီညိုရောင်သန်းလာပြီး အမွေးရှည်လာသည်နှင့် တစ်ပုလင်းတွင် အကောင် ၅၀ ထည့်သွင်းပြီး ဘတ် ၁၃၀ ဖြင့် ရောင်းချကြောင်း ထိုင်းသတင်းအေဂျင်စီများနှင့် အင်တာဗျူး၌ ပြောပြသွားခဲ့သည်။
ပိုးဟပ်မွေးမြူရေးလုပ်ငန်းကို တစ်နှစ်ကြာ လုပ်ကိုင်ပြီးချိန်တွင် နာတာလီယာ၏ တစ်လဝင်ငွေသည် ဘတ် တစ်သိန်းကျော်ရရှိကာ ဝယ်လိုအားနှင့် မွေးမြူထုတ်လုပ်နိုင်မှု လိုက်မမီသဖြင့် အခြားသော ပိုးဟပ်မွေးမြူရေး သမားများထံမှပင် ဖောက်သည်ပြန်ယူပြီး ရောင်းချနေရသည်ဟု ဆိုသည်။
ထိုသို့ဖောက်သည်ပြန်ယူရာတွင် ပိုးဟပ်အရည်အသွေး အကျမခံနိုင်သောကြောင့် သာမန် အိမ်နေပိုးဟပ်များနှင့် ပိုးဟပ်အသေများကို လက်မခံကြောင်းလည်း သိရသည်။
ကိုကလင်း
Ref:Thethaiger
#MeKongNews
#မြစ်ငါးဖမ်းသမားများ
#ပိုးဟပ်မွေးမြူရောင်းချသူ
#ဘတ်တစ်သိန်းကျော်
#ဝင်ငွေရ
