မဲခေါင်၊ သြဂုတ် ၂၆
အမေရိကန် လေယာဉ်တင်သင်္ဘော USS Abraham Lincoln သည် လာမည့်သီတင်းပတ်တွင် ထိုင်းနိုင်ငံ၌ ဆိုက်ကပ်မည်ဖြစ်ကြောင်း ထိုင်းအရာရှိကြီးတစ်ဦးက ပြောကြားသည်။
အရှေ့အလယ်ပိုင်းဒေသတွင် ကြာရှည်စွာ စေလွှတ်ထားမှုနှင့်အတူ သင်္ဘောပေါ်မှ ပျက်စီးယိုယွင်းနေသော အခြေအနေများ၊ စိတ်ပိုင်းဆိုင်ရာ ကျန်းမာရေးစိုးရိမ်မှုများ ဖြစ်ပေါ်ခဲ့ပြီးနောက် ထိုင်းသို့ ဆိုက်ကပ်မှု ဖြစ်ပေါ်လာခြင်းဖြစ်သည်။
စနေနေ့က အရှေ့အလယ်ပိုင်းမှ ထွက်ခွာလာခဲ့သော လေယာဉ်တင်သင်္ဘောကြီးသည် ဆိပ်ကမ်းမကပ်သည်မှာ ရက်ပေါင်း ၂၀၀ ကျော် ရှိပြီဖြစ်ကာ ပင်လယ်ထဲတွင် ဆက်တိုက်ရှိနေသည့်ရက်ပေါင်းတွင် စံချိန်တင်ခဲ့ကြောင်း ဒီမိုကရက်အမတ်များက ပြောကြားကြသည်။
ထုံးစံအားဖြင့် ရေတပ်မှ တာဝန်ထမ်းဆောင်မှုများသည် ၆ လ နှင့် ၉ လ ကြားသာ ဖြစ်သော်လည်း ပဋိပက္ခကာလများတွင် သက်တမ်းတိုးနိုင်သည်ဟု ဆိုသည်။
ကြာရှည်သော ပင်လယ်ပြင် ခရီးစဉ်အပြီးတွင် သင်္ဘောသားနှင့် မရိန်းတပ်သား စုစုပေါင်း ၅ ထောင်ခန့် လိုက်ပါနေသော သင်္ဘောသည် အပန်းဖြေအနားယူရန် ထိုင်းနိုင်ငံသို့ လာရောက်ခြင်းဖြစ်ကြောင်း အမည်မဖော်လိုသော ထိုင်းအရာရှိကြီးက ပြောသည်။
အမေရိကန်ရေတပ် လေယာဉ်တင် တိုက်ခိုက်ရေးရေယာဉ်အုပ်စုတစ်စုသည် ထိုင်းနိုင်ငံ အရှေ့ပိုင်းတွင် အနားယူအပန်းဖြေရန် ဆိုက်ကပ်မည်ဖြစ်ကာ စစ်ရေးလေ့ကျင့်မှု ပါဝင်မည် မဟုတ်ကြောင်း ထိုင်းရေတပ်က ပြောကြားသည်။
သို့သော် လုံခြုံရေးကြောင့် ပါဝင်မည့် သင်္ဘော ၃ စီးနှင့် ဆိုက်ကပ်မည့်နေ့ရက်ကို ထိုင်းရေတပ်က မပြောပေ။
ပုံမှန်ကမ်းကပ်မှုတစ်ခုဖြစ်ကာ လိုက်ပါလာသူများ အပန်းဖြေ အနားယူ ပြန်လည်လန်းဆန်းလာစေရန် ရည်ရွယ်ထားသလို သယ်ယူပို့ဆောင်ရေးပိုင်းဆိုင်ရာ အထောက်အပံ့ ရယူရန်လည်း ဖြစ်ကြောင်း ထိုင်းရေတပ်ပြောရေးဆိုခွင့်ရှိသူက ထုတ်ပြန်ပြောကြားသည်။
ထိုင်းနိုင်ငံသည် အမေရိကန်နှင့် ၁၉၅၄ ခုနှစ်ကတည်းက စာချုပ်ချုပ်ဆိုထားသည့် တစ်ခုတည်းသော အရှေ့တောင်အာရှ မဟာမိတ်နိုင်ငံဖြစ်ကာ ၂၀၀၃ ခုနှစ် နောက်ပိုင်းမှစ၍လည်း နေတိုးအဖွဲ့ဝင် မဟုတ်သော အဓိကမဟာမိတ်နိုင်ငံအဖြစ် ရပ်တည်နေသည်။
နှစ်နိုင်ငံစစ်ဘက်များကလည်း ခိုင်မာသော ဆက်ဆံရေး ထူထောင်ထားသည်။
အေးကျော်
Ref:Reuters
#MekongNews
#အမေရိကန်
#လေယာဉ်တင်သင်္ဘော
#ထိုင်း
#ဆိုက်ကပ်
