မဲခေါင် | ဩဂုတ် ၂၅
ရှမ်းပြည်တောင်ပိုင်း၊ ညောင်ရွှေမြို့နယ်၊ အင်းပေါခုံကျေးရွာအုပ်စု၊ ရွာကြီးတောင်ကျေးရွာတွင် နန်းပန်နယ်မြေရဲစခန်းမှ ရဲတပ်ဖွဲ့ဝင်များက မူးယစ်ဆေးဝါးအကြောင်းပြ၍ ဒေသခံလူငယ်များကို ဖမ်းဆီးပြီး ငွေကြေးတောင်းခံမှုများ ပြုလုပ်နေကြောင်း ဒေသတွင်းသတင်းရင်းမြစ်များထံမှ သိရသည်။
ဩဂုတ် ၂၂ ရက် ည ၁၁ နာရီခန့်တွင် ရွာကြီးတောင် (လယ်ပြင်) ရှိ ဦးထွန်းဝင်း၏ နေအိမ်တွင် ရှိနေသည့် ဇော်မင်းလေးနှင့် ဖိုးရင်အိုတို့ကို နန်းပန်ရဲစခန်းမှ ရဲတပ်ဖွဲ့ဝင် ၉ ဦးခန့်က လာရောက်ဖမ်းဆီးသွားခဲ့ကြောင်း သိရသည်။
ဖမ်းဆီးခံရသူများအနက် ဇော်မင်းလေးထံမှ ငွေကျပ် သိန်း ၆၀ တောင်းခံခဲ့ပြီး မိသားစုဝင်များက ငွေကျပ် သိန်း ၄၀ ပေးဆောင်ခဲ့ပြီးနောက် ဩဂုတ်လ ၂၃ ရက်တွင် ပြန်လည်လွတ်မြောက်လာခဲ့သည်ဟု ဆိုသည်။
ဖိုးရင်အိုမှာမူ တောင်းခံသည့်ငွေကြေးကို ပေးဆောင်နိုင်ခြင်းမရှိသဖြင့် ဆက်လက်ဖမ်းဆီးခံထားရပြီး စစ်မှုထမ်းအဖြစ် ပို့ဆောင်ခံရနိုင်သည့် အခြေအနေနှင့် ရင်ဆိုင်နေရကြောင်း ဒေသခံများက ပြောသည်။
“ဒီဘက်မှာ မူးယစ်ဆေးဝါးနဲ့ပတ်သက်ပြီး လူငယ်တွေကို ဖမ်းဆီးတာတွေရှိပေမယ့် တကယ်မူးယစ်ဆေးဝါး လက်ကြီးဖြန့်ဖြူးရောင်းချနေသူတွေကိုတော့ အရေးယူတာ မတွေ့ရဘူး။ ငွေပေးနိုင်တဲ့သူက ပြန်လွတ်လာပြီး ငွေမပေးနိုင်တဲ့သူတွေကတော့ ဆက်လက်ဖမ်းဆီးခံနေရတဲ့ အခြေအနေဖြစ်နေတယ်။ ဒီလိုဖြစ်နေတာကြောင့် ဒေသခံမိသားစုတွေက ကိုယ့်သားသမီးတွေ ဖမ်းဆီးခံရမှာကို စိုးရိမ်နေကြရတယ်။ မူးယစ်ဆေးဝါးကို အကြောင်းပြပြီး ငွေညှစ်တာမျိုးမလုပ်ဘဲ တကယ်ဖြန့်ဖြူးရောင်းချနေတဲ့သူတွေကို ထိထိရောက်ရောက် အရေးယူပေးစေချင်တယ်” ဟု ဒေသခံတစ်ဦးက ပြောသည်။
ထို့အပြင် အဆိုပါ မူးယစ်ဆေးဝါးရောင်းဝယ်သူများသည် PNA ပြည်သူ့စစ်များနှင့် ချိတ်ဆက်ကာ မူးယစ်ဆေးဝါးများ တင်သွင်းဖြန့်ဖြူးနေသည်ဟု ဒေသခံများက ပြောဆိုပြီး ယင်းအခြေအနေကြောင့် ကျေးရွာအတွင်း လူငယ်များအကြား မူးယစ်ဆေးဝါးသုံးစွဲမှု ပိုမိုများပြားလာသည်ဟု ဆိုသည်။
လက်ရှိတွင် ရဲတပ်ဖွဲ့ဝင်များနှင့် လက်နက်ကိုင်အဖွဲ့များအကြား ပူးပေါင်းအကျိုးအမြတ်ရှာဖွေမှုများ ရှိနေသည်ဟု ဒေသခံမျာက ပြောဆိုနေကြပြီး ဖမ်းဆီးငွေညှစ်ခံရမည်ကို စိုးရိမ်နေကြရသည့်အပြင် ကျေးရွာအတွင်း မူးယစ်ဆေးဝါး ပြန့်ပွားမှုကြောင့် လူငယ်များ၏ လုံခြုံရေးနှင့် အနာဂတ်အတွက်လည်း စိုးရိမ်နေကြရကြောင်း သိရသည်။
#MeKongNews
#အင်းလေး
#ရှမ်းတောင်
#စစ်ကောင်စီ
#မူးယစ်ဆေး
