မဲခေါင်၊ ဩဂုတ် ၂၄
ရှမ်းပြည်အရှေ့ပိုင်း တာချီလိတ်မြို့တွင် အရပ်သားပြည်သူတစ်ဦး သေနတ်ဖြင့် ပစ်သတ်ခံခဲ့ရသည်ဟု ဒေသခံသတင်းရင်းမြစ်များထံမှ သိရသည်။
ယမန်နေ့ည ၈ နာရီခန့်အတွင် တာချီလိတ်မြို့ ဝိန်းကျောက်ရပ်ကွက် LOYMA ဟိုတယ်အနီးတွင် အရပ်သားတစ်ဦး သေနတ်ဒဏ်ရာဖြင့် သေဆုံးနေသည့်ကို ဒေသခံများက တွေ့ရှိခဲ့ခြင်းဖြစ်သည်။
သေဆုံးနေသည့် အလောင်းကို ကြည့်ရှုရာတွင် ဦးခေါင်း၌ သေနတ်ဖြင့် အပစ်ခံရသည်ကို တွေ့ရပြီး ပစ္စတိုကျည်ခွံတစ်ခုကိုပါ တွေ့ရှိခဲ့သည်ဟု သတင်းရင်းမြစ်ကဆိုသည်။
“ဘာကိစ္စကြောင့် ဖြစ်တယ်ဆိုတာတော့ မသိဘူး။ တွေ့တဲ့အချိန်က သေနေပြီ။ ဦးခေါင်မှာ အပစ်ခံရတဲ့ ဒဏ်ရာတွေ့တယ်။ အလောင်းနားမှာကတော့ ပစ္စတို ကျည်ခံတစ်ခုတွေ့ရတယ်”ဟု ဒေသခံသတင်းရင်းမြစ်ကပြောသည်။
သေနတ်ဖြင့် အပစ်ခံရပြီး သေဆုံးသည့်သူသည် တာချီလိတ်မြို့ ဆန်ဆိုင်းရပ်ကွက်(က)တွင် နေထိုင်သည့် အသက် ၃၇ နှစ်ရှိ စိုင်းလှဆိုသူဖြစ်သည်ဟုလည်း သိရသည်။
“အပစ်ခံရပြီး သေတာက လုံးအိုက်ခမ်းရဲ့သား စိုင်းလှပါဗျ။ အခုထိတော့ တရားခံ မသိရသေးဘူးဗျ၊”ဟု တာချီလိတ်မြို့ခံတစ်ဦးက ရှမ်းဘာသာဖြင့်ပြောသည်။
သေဆုံးသွားသည့် စိုင်းလှ၏အလောင်းကိုမူ ယမန်နေ့ညတွင်ပင် ဦးလှမိုး တာချီလိတ် လူမှုကူညီရေးနှင့်နာရေးကူညီရေးအသင်းက ဆေးရုံသို့ သယ်ယူဆောင်ပို့ဆောင်ပေးခဲ့သည်။
တာချီလိတ်မြို့သည် ရှမ်းပြည်-ထိုင်းနိုင်ငံ နယ်စပ်မြို့ဖြစ်ပြီး အွန်လိုင်းငွေလိမ် ကျားဖြန့်လုပ်ငန်းလုပ်ကိုင်သူများ ဝင်ရောက်ခိုလှုံနေထိုင်လျက်ရှိသည်။ ထို့အပြင် လောင်းကစားဝိုင်း များပြားခြင်း၊ မူးယစ်ဆေးဝါး ပေါများခြင်း၊ သူခိုးဓားပြ များပြားခြင်းတို့ကြောင့် သေနတ်ဖြင့် ခြိမ်းခြောက်ခြင်း၊ ပြန်ပေးဆွဲခြင်း၊ အချင်းချင်းပစ်ခတ်ခြင်းများလည်း မကြာခဏ ဖြစ်ပွားလျက်ရှိသည်။
#MeKongNews
#ရှမ်းရှေ့
#တာချီလိတ်
#အရပ်သား
#သေနတ်
