မဲခေါင်၊ ဩဂုတ် ၂၀
ပြီးခဲ့သည့် ဆီးဂိမ်းမှာပင် ရွက်လွှင့်ပြိုင်ပွဲ၌ ဦးဆောင်ယှဉ်ပြိုင်ခဲ့သလို အားကစားနည်းများစွာကို ကျွမ်းကျင်သည့် ထိုင်းမိဖုရားကြီး ဆုသီတာသည် ကမ္ဘာ့ပထမဆုံး တစ်ကိုယ်တော် ဖိုက်တာဂျက်လေယာဉ်မောင်းသည့် မိဖုရားဖြစ်လာနိုင်စေရန် ယနေ့မှစတင်ပြီး ထိုင်းတော်ဝင်လေတပ်၌ ဆွီဒင်ထုတ် Gripen ဖိုက်တာဂျက်လေယာဉ် မောင်းနှင်သွားနိုင်ရေး စတင်လေ့ကျင်နေပြီဖြစ်သည်။
မိဖုရားသည် ဖိုက်တာဂျက်လေယာဉ်မောင်းနှင်သူ ဖြစ်လာစေရန် ဆူရတ်ဌာနီရှိ ထိုင်းတော်ဝင်လေတပ်တွင် ယနေ့ ဩဂုတ် ၂၀ ရက်မှ စက်တင်ဘာ ၄ ရက်အထိ လေ့ကျင့်ရေးသင်တန်းများစွာကို သင်ကြားပြီး နောက်ဆုံး၌ Gripen ဖိုက်တာဂျက်လေယာဉ်ကို တစ်ကိုယ်တော် မောင်းနှင်နိုင်သည်အထိ သင်ကြားသွားမည်ဟု ထိုင်းစစ်သတင်းတစ်ရပ်က ဆိုသည်။
ယခင်ကတည်းက ဆုသီတာသည် ဆူရတ်ဌာနီရှိ Wing 7လေတပ်သို့ မကြာခဏ လာရောက်ပြီး ယင်းလေတပ်သည် Gripen ဖိုက်တာဂျက်လေယာဉ်များထားရှိရာ တပ်ဖြစ်သောကြောင့် လေယာဉ်မောင်းများနှင့် ဆွေးနွေးပြောဆိုမှုများ လုပ်ခဲ့သည်။
ယခင်ကတည်းက လေယာဉ်ပိုင်းလော့တစ်ဦးဖြစ်သည့် ဆုသီတာသည် Gripen နှင့်လက်တွေ့ ပျံသန်းမှု မလုပ်မီ ကမ်ဖန်းဆန် လေယာဉ်မှူးသင်တန်းကျောင်း၌ အမောင်းသင် L-39 လေယာဉ်နှင့် လေ့ကျင့်ပျံသန်းမှုများတွင်လည်း အလွန် ရမှတ်ကောင်းမွန်ခဲ့သူ ဖြစ်ကြောင်းလည်း သိရသည်။
ယခုတစ်ပတ်အတွင်း၌လည်း မိဖုရားကြီးသည် ဒွန်မောင်းရှိ ထိုင်းတော်ဝင်လေတပ်တွင် မြေပြင်၌ စက်ခန်းတုဖြင့် မောင်းနှင်သင်ကြားရသည့် Flight Simulator Test တွင် သင်ကြားမှုများ ခံယူခဲ့သေးသည်။
မိဖုရားဆုသီတာသည် အမှန်တကယ် ဖိုက်တာဂျက်လေယာဉ်အား တစ်ကိုယ်တော် မောင်းနှင်ပျံသန်းနိုင်ပြီဆိုပါက ကမ္ဘာတွင် ပထမဆုံးသော ဖိုက်တာဂျက်လေယာဉ်နှင့် Gripen ဖိုက်တာဂျက်လေယာဉ်ကို မောင်းနှင်နိုင်သည့် ပထမဆုံး မိဖုရားဖြစ်လာမည်ဟုလည်း သတင်းက ဆိုသည်။
ကိုကလင်း
Ref:Thethaiger
#MeKongNews
#တစ်ကိုယ်တော်
#ဖိုက်တာဂျက်ပိုင်းလော့
#ထိုင်းမိဖုရား
#ဆုသီတာ
