မဲခေါင်၊ ဩဂုတ် ၂၀

ရှမ်းပြည်တောင်ပိုင်း၊ ကလောမြို့နယ်၊ ရေချိုကျေးရွာအုပ်စုတွင် အုပ်ချုပ်ရေးမှူးက စစ်မှုထမ်းအကြောင်းပြကာ လစဉ်စစ်မှုထမ်းကြေး ငွေကောက်စားနေသည်ကို ကလောမြို့နယ်ရုံးတွင် ခေါ်ယူစစ်ဆေးသော်လည်း အရေးယူခြင်း မရှိကြောင်း ဒေသခံသတင်းရင်းမြစ်များက ပြောသည်။

ရေချိုကျေးရွာအုပ်စု အုပ်ချုပ်ရေးမှူး ဦးခင်စိုး၊ စာရေး ဟန်မျိုးဝေ၊ ဇောတိကျေးရွာတာဝန်ခံ ဦးမြင့်စိုးတို့သည် စစ်မှုထမ်းကြေးနှင့်မြေယာရောင်းဝယ်ရေးများတွင် ငွေကြေးကောက်စားသဖြင့် ပြီးခဲ့သည့် ဇူလိုင်လတွင် ကလောမြို့နယ်ရုံး၌ ခေါ်ယူစစ်ဆေးခြင်းခံခဲ့ရခြင်းဖြစ်သည်ဟု ဒေသခံများကပြောသည်။

“ပြီးခဲ့တဲ့လက ကလောထွေအုပ်ရုံးမှာ သူတို့ကို ခေါ်စစ်တယ်။ သတင်းတွေ တအားထွက်လို့ ဟန်ပြခေါ်စစ်တာလောက်နဲ့ပဲ ပြီးသွားတာ။ ဘာမှ အရေးယူခံရတာမရှိဘူး။ အခုလည်း ပြန်ကောက်စားနေတာပဲ၊ ဘာမှမထူးလာဘူးရှင့်” ဟု ဒေသခံအမျိုးသမီးတစ်ဦးက ပြောသည်။

အုပ်ချုပ်ရေးမှူး ဦးခင်စိုးအဖွဲ့သည် ရေချိုကျေးရွာအုပ်စုအတွင်း စစ်မှုထမ်းကြေးဟုဆိုကာ တစ်အိမ်ငါးသောင်းကျပ်ထက်မနည်းကို လတိုင်းကောက်စားနေသည့်အပြင် စစ်မှုထမ်းမလိုက်ချင်သူများကိုလည်း အုပ်ချုပ်ရေးမှူးက ငွေကြေးသိန်း ၁၈၀ တောင်းစားနေခြင်းဖြစ်သည်။

ထို့အပြင် မူးယစ်ဆေးဝါး သုံးစွဲသည်ဟု သတင်းထွက်သည့်သူများကိုလည်း ဖမ်းဆီးကာ ငွေကြေးတောင်းစားနေပြီး ငွေမပေးနိုင်ပါက စစ်မှုထမ်းသွားပါမည်ဟု ကတိကဝတ် ထိုးခိုင်းကာ စစ်မှုထမ်းသွားခိုင်းသည်ဟုလည်း သတင်းရင်းမြစ်များက ပြောသည်။

“ဦးခင်စိုးရဲ့ သားဆို ဆေးနဲ့ ၂ ခါမိတာ အချုပ်လည်းမကျ စစ်မှုထမ်းလည်းမသွားရဘူး။ တခြား ဆေးမိတဲ့သူတွေဆို ငွေတောင်းတယ်။ ငွေမပေးနိုင်ရန် လက်မှတ်ထိုးခိုင်းပြီး စစ်မှုထမ်းသွားခိုင်းတယ်။ အဲ့ဒီစစ်မှုထမ်းရတဲ့သူတွေကို အသုံးချပြီးတော့လည်း သူကငွေပြန်ကောက်စားတယ်” ဟု ဒေသံတစ်ဦးကပြောသည်။

ကလောမြို့နယ် ရေချိုကျေးရွာအုပ်စုသည် အိမ်ခြေတစ်ထောင်ကျော်ရှိသဖြင့် အုပ်ချုပ်ရေးမှူး ကောက်ခံသည့်ငွေသည် လစဉ် ကျပ်သိန်း ၄၀၀ ကျော်ရှိသည်ဟုလည်း ဒေသခံများကပြောသည်။

ထို့အပြင် ကျေးရွာအုပ်စုအတွင်း မြေယာအရောင်းအဝယ် လုပ်ပါကလည်း အုပ်ချုပ်ရေးမှူး ဦးခင်စိုးကိုသာမက ကျေးရွာတာဝန်ခံဆိုသည့် ဦးမြင့်စိုးဆိုသူကိုလည်း လက်မှတ်ထိုးကြေး ၃ သိန်းပေးရသည်ဟု ဒေသခံများကပြောသည်။

“အရင်ရက် သတင်းထဲပါတဲ့ ငွေပေးရတာကလည်း အမှန်ပဲ။ အုပ်ချုပ်ရေးမကဘူး ဇောတိကျေးရာခွဲ တာဝန်ခံလို့ပြောတဲ့ ဦးမြင့်စိုးအဖွဲ့ကိုလည်း လက်မှတ်ထိုးကြေး သုံးသိန်းပေးရတယ်။ ”ဟု ဇောတိဒေသခံတစ်ဦးကပြောသည်။

စစ်ကောင်စီ၏ ရှမ်းပြည်နယ် အစိုးရကမူ ကျေးရွာအုပ်ချုပ်ရေးမှူးများ ငွေတောင်းစားပါက အရေးယူမည်ဟု လွှတ်တော်တွင် လာရောက်ဖြေဆိုထားသည်။

ကလောမြို့နယ် ရေချိုကျေးရွာအုပ်စုတွင် ဇောတိကျေးရွာ၊ တံတားဦးကျေးရွာ၊ လွယ်မယ်ရွာ၊ ရေချိုရွာ၊ လွယ်ဟပ်ရွာ၊ ထင်းရှူးကုန်းရွာ၊ ကျောက်စုရွာ၊ နတ်တော်ရွာစသည့် ကျေးရွာများပါဝင်သည်။

#MeKongNews
#ကလော
#ရှမ်းတောင်
#အုပ်ချုပ်ရေးမှူး
#စစ်မှုထမ်း
#လစဥ်ကြေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)