မဲခေါင်၊ ဇူလိုင် ၁၅
လက်ရှိ ကမ္ဘာ့ဖလားပြိုင်ပွဲတွင် ဒိုင်လူကြီးများနှင့် ဖီဖာတို့ဘက်မှ ဘက်လိုက်မျက်နှာသာပေးမှုများ ရရှိခဲ့သည့် အာဂျင်တီးနားဘောလုံးအသင်းကို ပြိုင်ပွဲ၌ ဆက်ပြိုင်ခွင့် မပေးတော့ရန် ဆန္ဒကောက်ခံမှုတစ်ရပ် လုပ်ဆောင်ခဲ့ရာ လက်မှတ်ထိုး တောင်းဆိုသူပေါင်း ၆ သန်းကျော်သွားခဲ့ပြီဟု South China Morning Post သတင်းဌာနက ဖော်ပြခဲ့သည်။
ယင်းလက်မှတ်ရေးထိုး ဆန္ဒကောက်ခံမှုကို ဦးဆောင်သူများက ဒိုင်လူကြီးများနှင့် ဖီဖာတို့သည် မက်ဆီနှင့် လက်ရှိချန်ပီယံ အာဂျင်တီးနားတို့အား ပြိုင်ပွဲမှ မထွက်သွားရစေရန် ဘက်လိုက်ဆွဲခေါ်မှု အမျိုးမျိုး လုပ်ဆောင်ပေးခဲ့ကြကြောင်း၊ ချန်ပီယံ မည်သည့်အသင်း ဖြစ်မည်ကို ကြိုတင်ဆုံးဖြတ်ပေးထားပါလျှင် အခြား ပြိုင်ပွဲဝင်အသင်းများအား မည်သည့်အတွက်ကြောင့် လာရောက်ယှဉ်ပြိုင်စေသနည်းဟု ပြင်းပြင်းထန်ထန် မေးခွန်းထုတ်ဝေဖန်ခဲ့သည်။
၁၆ သင်း ရှုံးထွက်အဆင့်ပွဲစဉ်တွင် အီဂျစ်အသင်းနှင့် ရင်ဆိုင်ရာ ပွဲချိန်အစောပိုင်း မက်ဆီ ပင်နယ်တီမဝင်သလို ၂ -၀ ရလဒ်ဖြင့် ရှုံးနေခဲ့ပြီးမှ ၁၃ မိနစ်အတွင်း ၃ ဂိုးပြန်သွင်းပြီး အာဂျင်တီးနား အနိုင်ရသွားမှု၌ အငြင်းပွားစရာများစွာ ရှိခဲ့သည်။
အီဂျစ်အသင်း ရရှိသည့်တစ်ဂိုးကို VAR ကြည့်ကာ ပြန်လည် ပြင်ဆင်ဆုံးဖြတ်ရာတွင် ဂိုးမသွင်းမီ အစောပိုင်းကတည်းက ပြစ်ဒဏ်တစ်ခု ရှိခဲ့သည်ဆိုကာ ဂိုးကိုပယ်ဖျက်ခဲ့သည်။
အာဂျင်တီးနားရရှိသော နောက်ကျအနိုင်ဂိုးတွင်လည်း အီဂျစ်ကစားသမား မိုဆာလက်ချ်ကို ပြစ်ဒဏ်ကျူးလွန်ခဲ့မှု ရှိသော်လည်း ထိုအခြေအနေတွင်မူ ဂိုးခွင့်ပြုခဲ့သဖြင့် အီဂျစ်နည်းပြ ဟော့ဆန်ဟက်ဆန်က မက်ဆီကို ဖီဖာက ပြိုင်ပွဲမှ မထွက်စေချင်ခဲ့ဟု ဝေဖန်ခဲ့သည်။
ဖီဖာသည် သန့်ရှင်းမျှတခြင်းကို မြှင့်တင်လှုံ့ဆော်နေခဲ့သော်လည်း ကွင်းအတွင်း မျှတမှုတစ်ခုမှ မတွေ့ခဲ့ရဟု ဟက်ဆန်က ဝေဖန်ခဲ့သည်။
ထိုဝေဖန်မှုများကို အာဂျင်တီးနားနည်းပြ စကာလိုနီကမူ ငြင်းပယ်သွားခဲ့ပြီး VAR စနစ်အသုံးပြုသော ယနေ့ခေတ်တွင် မျက်နှာသာပေး ဘက်လိုက်ခြင်းမျိုး မရှိနိုင်ကြောင်း ပြန်လည် တုံ့ပြန်ခဲ့သည်။
ကိုကလင်း
Ref:Thaibpsworld
#MeKongNews
#ဖီဖာ
#ဘက်လိုက်မှု
#အာဂျင်တီးနား
#ကမ္ဘာ့ဖလား
#လက်မှတ်ထိုး
