မဲခေါင်၊ ဇူလိုင် ၁၀
ဘန်ကောက်မြို့၊ ကလောင်ဆန်ခရိုင်တွင် ဆောက်လုပ်နေသည့် ခရမ်းရောင်မီးရထားလိုင်း မြေအောက်လိုဏ်ခေါင်းလုပ်ငန်းခွင်အနီး ရေယိုစိမ့်မှုဖြစ်ခဲ့သော နေရာအနီး အဆောက်အအုံများတွင် နေထိုင်သူများကို ဘန်ကောက်မြို့အာဏာပိုင်များက ဘေးလွတ်ရာ ရွှေ့ပြောင်းထားပြီး လမ်းကိုလည်း ပိတ်ထားကြောင်း သိရသည်။
ရေယိုစိမ့်မှုကြောင့် မြေကျွံမှုဖြစ်ခဲ့သော ဝမ်ဝီယန်လမ်းဆုံအနီးမှ အဆောက်အအုံများအား အသုံးပြုခြင်းကို ဆိုင်းငံ့ထားရန် ကလောင်ဆန်ခရိုင်အကြီးအကဲ ဆိုရာဆစ် လွမ်ဂရွန်ကီယက်က ယမန်နေ့ညက ပြောကြားခဲ့သည်။ ရေယိုစိမ့်မှုမှာ မြေအောက် မီတာ ၃၀ တွင် ဖြစ်ပေါ်ခဲ့သည်။
ဝမ်ဝီယန်အဝိုင်းနှင့် ကပ်လျက် ပရာချာသီပေါ့လမ်းအောက်တွင် ဖြစ်ပေါ်ခဲ့သော မြေအောက် ရထားလမ်းလိုဏ်ခေါင်းထဲသို့ ရေယိုစိမ့်မှုသည် လိုဏ်ခေါင်းအဆောက်အဦနှင့် အနီးအနား အဆောက်အအုံများကို ပျက်စီးမှု ဖြစ်ပေါ်စေခဲ့ကြောင်းနှင့် လမ်းပိတ်ထားခြင်းမှာ ပြည်သူလူထု လုံခြုံရေးအတွက် ဖြစ်ကြောင်း ခရိုင်အကြီးအကဲက ပြောသည်။
Purple Line ကို ပိုင်ဆိုင်သော Mass Rapid Transit Authority (MRTA) အဖွဲ့က ရွှေ့ပြောင်းခဲ့ရသော ဒေသခံများအတွက် နေထိုင်စရာ စီစဉ်ပေးရမည်ဟုလည်း ၎င်းက ဆက်ပြောသည်။
ပြီးခဲ့သည့်နှစ်က ဒူဆစ်ခရိုင်၊ ဆမ်ဆင်လမ်းမပေါ်တွင် ကြီးမားသော မြေကျွှံကျင်းကြီး ဖြစ်စေခဲ့သော Purple Line သည်ပင် ယခု ရေယိုစိမ့်၍ မြေကျွှံသည့် ဖြစ်ရပ်တွင် ထပ်မံ၍ ပါဝင်ပတ်သက်ခြင်း ဖြစ်ကြောင်း ဘန်ကောက်အုပ်ချုပ်ရေးမှူး ချက်ချတ်ဆစ်တီပန့်က ယမန်နေ့တွင် ပြောသည်။
ယခု နောက်ဆုံးဖြစ်ရပ်တွင် မြေအောက်လိုဏ်ခေါင်း၏ အောက်ဆုံးအပိုင်းသို့ ရေများစိမ့်ဝင်သွားခဲ့ရာမှ မြေကျွှံမှု ဖြစ်ပွားကာ အနီးအနားမှ အဆောက်အအုံများကိုပါ ထိခိုက်ခဲ့ကြောင်း ချက်ချတ်က ပြောသည်။
ယင်းလုပ်ငန်းခွင်၏ မီတာ ၃၀ ပတ်လည် ဧရိယာတွင် ရေယိုစိမ့်မှု၊ မြေကြီးအနိမ့်အမြင့် နှင့် အဆောက်အဦးများ အခြေအနေကို ဘန်ကောက်မြို့တော်အုပ်ချုပ့်ရေးအဖွဲ့ – BMA နှင့် MRTA တို့က စောင့်ကြည့်နေကြောင်းနှင့် အနီးအနား အဆောက်အဦးများတွင် နေထိုင်သူများကို ဘေးလွတ်ရာ ရွှေ့ပြောင်းပေးထားသည်ဟု ၎င်းက ဆက်ပြောသည်။
တုန်ခါမှုလျော့ပါးစေရန် ပရာချာသီပေါ့လမ်းကိုလည်း ဝမ်ဝီယမ်အဝိုင်းမှ ဘန်ကာယက်လမ်းဆုံအထိ မီတာ ၂၀၀ ခန့် ပိတ်ထားကြောင်း သိရသည်။
တည်ဆောက်မှုပိုင်းဆိုင်ရာ အန္တရာယ်များကို သိရှိနိုင်ရန် အခင်းဖြစ်ပွားသည့် နေရာ အနီးအနား အဆောက်အအုံများတွင် ဆင်ဆာများ တပ်ဆင်၍ အချိန်နှင့်တပြေးညီ စောင့်ကြည့်နေကြောင်း သိရသည်။
အေးကျော်
Ref:Bangkok Post /The Nation
#MeKongNews
#ဘန်ကောက်
#မီးရထားလိုင်းလုပ်ငန်းခွင်
#မြေကျွံမှု
