မဲခေါင်၊ ဇူလိုင် ၇

ရှမ်းပြည်တောင်ပိုင်း၊ ဆီဆိုင်မြို့နယ်၊ ဆိုက်ခေါင်ဒေသရှိ တောင်သူများက ယခုနှစ်တွင် နာနတ်သီးအထွက်နှုန်းမှာ ယခင်နှစ်ထက် လျော့နည်းခဲ့သော်လည်း ဈေးကွက်လိုအပ်ချက်ကြောင့် ဈေးနှုန်းမြင့်တက်လာပြီး ဈေးကောင်းရရှိနေကြောင်း မဲခေါင်သို့ ပြောကြားသည်။

တောင်သူများ၏ ပြောကြားချက်အရ လက်ရှိတွင် နာနတ်သီးများကို အဝယ်ဒိုင်ပွဲစားများက ကျေးရွာအထိ လာရောက်ဝယ်ယူနေပြီး ဒေသတွင်းဈေးများတွင်လည်း ရောင်းချနိုင်သဖြင့် ဈေးကွက်အခြေအနေမှာ ယခင်နှစ်ထက် ပိုမိုကောင်းမွန်လာကြောင်း သိရသည်။

ယခုနှစ် နာနတ်သီးအထွက်နှုန်းမှာ ရာသီဥတုနှင့် စိုက်ပျိုးမှုအခြေအနေများကြောင့် ယခင်နှစ်ထက် လျော့နည်းခဲ့သော်လည်း စိုက်ပျိုးပြုစုမှု ကောင်းမွန်သည့်ခြံများတွင် အသီးအရွယ်အစားကြီးမားပြီး အရသာချိုမြိန်ကာ ဈေးကွက်ဝင်အရည်အသွေး ရရှိနေကြောင်း တောင်သူများက ဆိုသည်။

“မနှစ်က နာနတ်သီးတစ်လုံးကို ကျပ် ၁,၃၀၀ ကနေ ၁,၅၀၀ လောက်ပဲ ရခဲ့ပေမယ့် အခုတော့ ကျပ် ၂,၀၀၀ ကနေ ၂,၃၀၀ အထိ ရောင်းချနိုင်နေပါတယ်။ အထွက်နည်းတာကြောင့် ဈေးကောင်းရနေတာပါ” ဟု ဒေသခံစိုက်ပျိုးတောင်သူတစ်ဦးက မဲခေါင်သို့ ပြောသည်။

နာနတ်သီးသည် တစ်နှစ်လျှင် မိုးရာသီနှင့် နွေရာသီဟူ၍ နှစ်ကြိမ်ထွက်ရှိလေ့ရှိပြီး နွေရာသီတွင် အထွက်များပါက မိုးရာသီတွင် အထွက်နည်းတတ်ကြောင်း၊ စိုက်ပျိုးပြီး သုံးနှစ်ခန့်အထိ အထွက်ကောင်းမွန်သော်လည်း သက်တမ်းရင့်လာသည်နှင့်အမျှ အထွက်နှုန်း လျော့နည်းလာကြောင်း သိရသည်။

လက်ရှိထွက်ရှိသည့် နာနတ်သီးများကို ပြည်တွင်းဈေးကွက်သို့ အဓိကတင်ပို့ရောင်းချနေပြီး ရန်ကုန်မြို့သို့ အဝယ်ဒိုင်ပွဲစားများမှ တင်ပို့ရောင်းချသည့်အပြင် တောင်ကြီးမြို့နှင့် ဒေသတွင်းဈေးဆိုင်များတွင်လည်း ဖြန့်ဖြူးရောင်းချလျက်ရှိကြောင်း သိရသည်။

တောင်သူများက သယ်ယူပို့ဆောင်ရေးနှင့် ထုတ်လုပ်မှုကုန်ကျစရိတ်များ မြင့်တက်နေသော်လည်း လက်ရှိဈေးနှုန်းဖြင့် တွက်ခြေကိုက်နေကြောင်း၊ သို့သော် အခြားဒေသများတွင် နာနတ်သီးအထွက် များလာပါက ဈေးနှုန်းကျဆင်းနိုင်သဖြင့် ဈေးကွက်တည်ငြိမ်မှုကို မျှော်လင့်ထားကြောင်း ပြောသည်။

ထို့ပြင် နာနတ်သီးအထွက်များသည့် ကာလများတွင် အသီးသေးငယ်ခြင်း၊ နေပူဒဏ်ကြောင့် ပုပ်ပွခြင်းများကြောင့် ရောင်းချရန် အခက်အခဲများ ကြုံတွေ့ရသဖြင့် ယို၊ ဖျော်ရည်နှင့် အခြားတန်ဖိုးမြှင့် ကုန်ချောများ ထုတ်လုပ်နိုင်ရေးအတွက် နည်းပညာနှင့် အိမ်တွင်းမှုလုပ်ငန်းဆိုင်ရာ သင်တန်းများ ပံ့ပိုးပေးစေလိုကြောင်း တောင်သူများက တိုက်တွန်းခဲ့သည်။

ထို့ပြင် ပြည်ပဈေးကွက်သို့ တင်ပို့နိုင်ရေးအတွက် ကုန်သည်ပွဲစားများ ပိုမိုဝင်ရောက်လာရန် လိုအပ်နေပြီး စားသုံးသူနှင့် စိုက်ပျိုးသူ နှစ်ဖက်စလုံးအတွက် မျှတ၍ တည်ငြိမ်သည့် ဈေးကွက်တစ်ခု ဖြစ်ပေါ်စေရန် လိုအပ်ကြောင်း ဒေသခံတောင်သူများက ပြောကြားခဲ့သည်။

#MeKongNews
#ရှမ်းတောင်
#နာနတ်သီး
#အထွက်နည်း
#ဈေးကောင်းရ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)