မဲခေါင်၊ ဇူလိုင် ၄

ကျားဖြန့်လုပ်ငန်းလုပ်ကိုင်ရန် လာအိုဘက်မှ တာချီလိတ်ဘက်သို့ ခိုးဝင်လာသည့် တရုတ်များထံမှ လာဘ်ငွေရယူကာ ခွင့်ပြုခဲ့သည့် ကိစ္စဖြင့် တာချီလိတ်မြို့နယ်အတွင်းတာဝန်ကျသည့် ရဲအချို့ကို ချင်းပြည်နယ်နှင့် ကယားပြည်နယ်(ကရင်နီ) သို့ ပြောင်းရွှေ့လိုက်ကြောင်း ရဲတပ်ဖွဲ့နှင့် နီးစပ်သည့် သတင်းရင်းမြစ်များထံမှ သိရသည်။

ဇွန်လ တတိယပတ်အတွင်းက တာချီလိတ်သို့ ခိုးဝင်လာသည့် တရုတ်နိုင်ငံသားများပါသည့် ကားကို ဝှေလေလန်ရှောင်ကွင်းလမ်းတွင် ဖမ်းမိရာမှတဆင့် ယင်းတရုတ်များကို လူပို့ပေးနေသူတစ်ဦးကို ဖမ်းဆီးကာ စစ်ဆေးရာမှ ပေါ်ပေါက်လာခြင်းဖြစ်ကြောင်း သတင်းရင်းမြစ်တစ်ဦးမှ ပြောသည်။

“တရုတ်တွေကို မိတော့ သူတို့ကို တောက်လျောက်သယ်ပေးနေတာ အောင်ကျော်စန်းဆိုတဲ့တစ်ယောက်ကို ဖမ်းမိတယ်။ အဲဒီကနေ စစ်တော့ ဘယ်သူတွေကို ပိုက်ဆံပေးရတယ်ဆိုတာ ပေါ်တာပေါ့” ဟု ၎င်းက ပြောသည်။

ယင်းသို့ စစ်ဆေးပြီးနောက် တရုတ်များကို ပိုက်ဆံယူကာ ခွင့်ပြုသည့် တာလေစခန်းမှူး ရဲအုပ်စိန်ပိုကို ချင်းပြည်နယ်နှင့် အခြား ၂ ဦးတို့ကို ကယားပြည်နယ်သို့ ပြောင်းရွှေ့ခဲ့ကြောင်း ရဲတပ်ဖွဲ့နှင့် နီးစပ်သူများထံမှ သိရသည်။

ကျားဖြန့်လုပ်ငန်းလုပ်ကိုင်သည့် တရုတ်နိုင်ငံသားများသည် တာချီလိတ်မြို့နယ်နှင့် လာအိုနိုင်ငံကို ကူးသန်းကာ ချောင်သည့်ဘက်တွင် အခြေချလုပ်ကိုင်ကြောင်း၊ တစ်နေရာတွင် အဖမ်းအဆီးများပါက အခြားတစ်နေရာသို့ ပြောင်းရွှေ့လုပ်ကိုင်ကြောင်း ဒေသခံများထံမှ သိရသည်။

#MeKongNews
#တာချီလိတ်
#ရဲတပ်ဖွဲ့
#တရုတ်နိုင်ငံသား
#လာဘ်စား
#ကျားဖြန့်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)