မဲခေါင်၊ ဇွန် ၂၉
ရှမ်းပြည်မြောက်ပိုင်း၊ လားရှိုးမြို့နယ်တွင် မူးယစ်ဆေးဝါး ဖြတ်ပေးမည်ဟုဆိုကာ ဖမ်းဆီးခံခဲ့ရသည့် အမျိုးသား ၄ ဦးသည် ကိုးကန့်တပ်ဖွဲ့ – MNDAA ၏ တပ်သားသစ်အဖြစ် အဓမ္မ စုဆောင်းခံလိုက်ရသည်ဟု ဒေသခံ သတင်းရင်းမြစ်များထံမှ သိရသည်။
လားရှိုးမြို့နယ်၊ အီနိုင်းကျေးရွာမှ ဒေသခံ ၄ ဦးကို မူးယစ်ဆေးဖြတ်ပေးမည်ဟုဆိုကာ ကိုးကန့်တပ်ဖွဲ့က ဖမ်းဆီးသွားခဲ့သော်လည်း လက်ရှိတွင်မူ တပ်သားသစ်အဖြစ် စုဆောင်းခံရကာ ကိုးကန့်တပ်ဖွဲ့၏ စစ်ဆေးရေးဂိတ်များတွင် ဂိတ်စောင့်နေရခြင်းဖြစ်သည်ဟု သတင်းရင်းမြစ်က ပြောသည်။
“အခုက လားရှိုးမြို့ကို ဝိုင်းရံထားတဲ့ ဂိတ်တွေမှာပဲ ဂိတ်ပြန်စောင့်ခိုင်းနေတာကို တွေ့ရတာပေါ့နော်။ ကိုးကန့်ယူနီဖောင်းနဲ့ သေနတ်နဲ့ ဖြစ်နေပြီ။ လာဖမ်းတုန်းက မူးယစ်ဆေး ဖြတ်ပေးပြီးရင် ပြန်ပို့ပေးမယ်ဆိုလို့ မိဘတွေလည်း ယုံပြီး ထည့်ပေးလိုက်တာ အခုက ကိုးကန့်စစ်သား ဖြစ်သွားတယ်ပေါ့နော်”ဟု ဖြစ်စဉ်ကို သိရှိသည့် ဒေသခံတစ်ဦးက ပြောသည်။
၎င်းအီနိုင်းဒေသခံ ၄ ဦးကို MNDAA က ပြီးခဲ့သည့် မတ်လတွင် လာရောက်ဖမ်းဆီးသွားခဲ့ခြင်း ဖြစ်ပြီး ဖမ်းဆီးချိန်တွင် မူးယစ်ဆေးဖြတ်ပေးပြီး ပြန်လွတ်ပေးမည်ဟု ပြောဆိုခဲ့ခြင်း ဖြစ်သည်။
လက်ရှိတွင် ၎င်းဒေသခံ ၄ ဦးသည် ပြန်လည်လွတ်မြောက်လာခြင်း မရှိသေးဘဲ ကိုးကန့်တပ်၏ အဓမ္မတပ်သားသစ်စုဆောင်းခြင်းကို ခံရကာ လားရှိုးကို ဝိုင်းရံထားသည့် ခေးနင်း၊ အီနိုင်း၊ နမ့်ပေါင်တို့တွင် ဂိတ်စောင့်နေရသည်ကို ဒေသခံများက ပြန်လည် တွေ့ရှိခဲ့ခြင်းဖြစ်သည်။
”အပြောနဲ့အလုပ် မညီဘူးပေါ့ဗျာ။ ဒီလိုလုပ်နေတာကလည်း ပြည်သူလူထုရဲ့ ယုံကြည်မှုကို အလွဲသုံးစားလုပ်တယ်လို့ မြင်တယ်ပေါ့ဗျာ”ဟု ဒေသခံသတင်းရင်းမြစ်က ပြောသည်။
MNDAA သည် ပြီးခဲ့သည့် ဧပြီ ၂၁ ရက်တွင်လည်း လားရှိုးမြို့နယ်၊ အီနိုင်း၊ ဆယ်မိုင်ကုန်း၊ တောင်တလောင်ဒေသတွင် ဒေသခံများနှင့် ခရီးသွားလူငယ်များ ၇၀ ကျော်ကို ရှောင်တခင်စစ်ဆေးကာ ဖမ်းဆီးသွားခဲ့သည်။
ဖမ်းဆီးခံရသူများကို MNDAA က စစ်မှုထမ်းခိုင်းရန် သိန္နီသို့ နေ့ချင်း ခေါ်ဆောင်သွားခဲ့ပြီး အချို့ကိုသာ ပြန်လည်လွှတ်ပေးခဲ့ကာ အများစုမှာ တပ်သားသစ်အဖြစ် စုဆောင်းခံခဲ့ရသည်။
MNDAA သည် ၁၀၂၇ စစ်ဆင်ရေးပြီးသည့်နောက်ပိုင်း ၎င်းထိန်းချုပ် နယ်မြေအတွင်း ကိုးကန့်မဟုတ်သည့် အခြားလူမျိုးများကိုပါ နည်းမျိုးစုံဖြင့် စစ်မှုထမ်းရန် လုပ်ဆောင်နေပြီး သားသမီး ထွက်ပြေးပါက မိဘများကို ဖမ်းဆီးထားခြင်းများလည်း ပြုလုပ်နေသည်။
#MeKongNews
#မူးယစ်ဆေး
#ဒေသခံများ
#တပ်သားသစ်
#ကိုးကန့်တပ်ဖွဲ့
