မဲခေါင်၊ ဇွန် ၂၆
အပစ်အခတ်ရပ်စဲရန် အမေရိကန်နှင့်အီရန်တို့ ပြီးခဲ့သည့်တစ်ပတ်က နားလည်မှုစာချွန်လွှာ လက်မှတ်ထိုးခဲ့သော်လည်း ဇွန် ၂၅ ရက် နံနက်ပိုင်းတွင် အီရန်အစ္စလာမ္မစ်တော်လှန်ရေးအစောင့်တပ် (IRGC) သည် ဟော်မုဇ်ရေလက်ကြားကို ဖြတ်လာသည့် စင်ကာပူအလံတင် ကွန်တိန်နာသင်္ဘောကို ရည်ရွယ်ချက်ရှိစွာဖြင့်ဒရုန်းဖြင့် တိုက်ခိုက်ခဲ့သည်။
The Wall Street Journal သို့ အမေရိကန် အကြီးတန်းအစိုးရအရာရှိ ၂ ဦးက ယင်းသတင်းကို အတည်ပြုပြောကြားခဲ့ပြီး စုံစမ်းစစ်ဆေးမှုများ လုပ်ဆောင်မည်ဖြစ်ကာ လွတ်လပ်သော ရေပိုင်နက် ရေလက်ကြားကို လွတ်လပ်စွာဖြတ်သန်းခွင့်အား အီရန်အနေဖြင့် တားဆီးပိတ်ပင်ခွင့်မရှိဟု အိမ်ဖြူ တော်သတင်းအဖြစ် ဒေါ်နယ်ထရမ့်ကလည်း သတိပေးသွားခဲ့သည်။
စင်ကာပူအလံတင် Ever Lovely ကွန်တိန်နာသင်္ဘောသည် အခြားကုန်သည်သင်္ဘော ၂ စီးခြံရံကာ ဟော်မုဇ်ရေ လက်ကြားကို ဖြတ်သန်းစဉ် IRGC က တစ်လမ်းမောင်း အသေခံဒရုန်းဖြင့် ကြိုတင်ရေဒီယိုအချက်ပြသတိပေးစနစ်လည်း မထုတ်လွှင့်ဘဲ ပစ်ခတ်တိုက်ခိုက်ခဲ့ရာ သင်္ဘောအနောက်ဘက် ခြမ်းသို့ တည့်တည့်ထိမှန်ပြီး သင်္ဘော တံတားပျက်စီးခဲ့သော်လည်း မည်သည့် သေကြေဒဏ်ရာရမှုမှ မရှိခဲ့ဟု သိရသည်။
ယင်းနံနက်အစောပိုင်းကတည်းက IRGC သည် ဟော်မုဇ်ရေလက်ကြားကို ဖြတ်သန်းမည့် သင်္ဘောများသည် အီရန်ဘက်မှ သတ်မှတ်ပေးထားသည့် ဘေးကင်းသော လမ်းကြောင်းမှသာ အခွင့်ရှိမှ ဖြတ်သန်းရမည် ဖြစ်ကြောင်းနှင့် မလိုက်နာပါက တုံ့ပြန်မှုနှင့် ရင်ဆိုင်ရမည်ဟု ကြေညာခဲ့ပြီး ယခုလို တိုက်ခိုက် သွားခဲ့ခြင်းဖြစ်သည်။
ယင်းတိုက်ခိုက်မှုကြောင့် နိုင်ငံတကာရေကြောင်းအာဏာပိုင်အဖွဲ့ (IMO) သည် ဟော်မုဇ်ရေလက်ကြားတွင် ရက်ရှည်သောင်တင်နေသည့် ရာချီသော သင်္ဘောများနှင့် ၁၁၀၀၀ ကျော်သော သင်္ဘောသားများကို အိုမန်မှ တစ်ဆင့် ဘေးကင်းရာသို့ ပို့ဆောင်ပေးမည့်အစီအစဉ်ကို ချမှတ်ခဲ့သော်လည်း ဘေးကင်းမှု မရှိသဖြင့် ယာယီရပ်ဆိုင်းကြောင်း ထုတ်ပြန်ခဲ့သည်။
ကိုကလင်း
Ref: asiatoday
#MeKongNews
#အပစ်ရပ်
#ဟော်မုဇ်ရေလက်ကြား
#ကုန်တင်သင်္ဘော
#အီရန်
