မဲခေါင်၊ ဇွန် ၁၆
တရုတ်အစိုးရက အဓိက ပစ်မှတ်အဖြစ် အလိုရှိနေသော နယ်စပ်ဖြတ်ကျော် လူမှောင်ခိုကူးသည့် ဂိုဏ်းခေါင်းဆောင် အသက် ၄၀ အရွယ် တရုတ်နိုင်ငံသား မစ္စတာ ကောင်ကို ယနေ့တွင် ထိုင်း လူဝင်မှုကြီးကြပ်ရေး အာဏာပိုင်များနှင့် ရာဇဝတ်မှုနှိမ်နင်းရေးဗျူရို တာဝန်ရှိသူများက ဘန်ကောက်ရှိ ဒင်ဒန်းခရိုင် ဟိုတယ်တစ်ခုတွင် ဝင်ရောက် ဖမ်းဆီးနိုင်ခဲ့သည်။
ကောင်သည် အနည်းဆုံး မြန်မာအမျိုးသမီး အယောက် ၂၀ ကို တရုတ်နိုင်ငံအတွင်း တရားမဝင် လူမှောင်ခိုကူး သွင်းခဲ့ကာ တရုတ်အမျိုးသား အနည်းဆုံး ၂၀ ကိုလည်း စီးပွားရေးဗီဇာအကြောင်းပြချက်များအား စာရွက်စာတမ်းအတုများလုပ်ဆောင်ကာ မြန်မာနိုင်ငံ ရန်ကုန်မြို့သို့ ခိုးဝင်စေခဲ့သူဖြစ်ကြောင်း သိရသည်။
၎င်းဦးဆောင်သည့် တရုတ် – မြန်မာနယ်စပ် ဖြတ်ကျော် လူမှောင်ခိုကွန်ရက်မှ ရာဇဝတ်သားများကို တရုတ်အစိုးရက ဖမ်းဆီးနိုင်ခဲ့သော်လည်း ထိုင်းနိုင်ငံအတွင်း ဝင်ထွက်နေသဖြင့် တရုတ်အစိုးရဘက်မှ ဖမ်းဆီးပေးရန် အကြောင်းပြခဲ့ရာမှ ယခုလို ဖမ်းဆီးနိုင်ခဲ့ခြင်း ဖြစ်သည်ဟုလည်း ထိုင်းသတင်းများက ဖော်ပြနေကြသည်။
ကောင်သည် တရုတ်ဘက်မှ ထိုင်းနိုင်ငံအတွင်းသို့ အနည်းဆုံး ၂၁ ကြိမ်အထိ ဝင်ထွက်သွားလာခဲ့သူဖြစ်ကြောင်း သိရှိရကာ ဥပဒေကြောင်းအရ ထိုင်းဘက်က စီးပွားရေးဗီဇာဖြင့် နောက်ဆုံးဝင်ရောက်လာသည့် ၎င်းကို ဗီဇာရုပ်သိမ်းကာ တရုတ်အစိုးရ၏ တောင်းဆိုမှုအရ ဆိုက်ဘာလိမ်လည်မှု တိုက်ဖျက်ရေးဌာနမှတစ်ဆင့် ညှိနှိုင်းဆောင်ရွက်သည့် မဲခေါင်-လန်ချန်း ပူးပေါင်းဆောင်ရွက်ရေး မူဘောင်မှတစ်ဆင့် ပြန်ပို့ပေးရန် ထိုင်းဘက်က စီစဉ်သွားမည်ဖြစ်သည်။
ကိုကလင်း
Ref:Bangkok post
#MeKongNews
#မြန်မာမိန်းကလေးများ
#တရုတ်
#လူကုန်ကူး
#ဂိုဏ်းခေါင်းဆောင်
