မဲခေါင်၊ မတ် ၃၀
အမေရိကန်၏ ကွပ်ကဲရေးနှင့်ထိန်းချုပ်ရေး ဂျက်လေယာဉ်တစ်စင်း ဆော်ဒီနိုင်ငံ လေတပ်စခန်းတစ်ခုတွင် ကြီးမားစွာ ပျက်စီးနေသည်ကို စိစစ်အတည်ပြုထားသော ဓာတ်ပုံများက ပြသနေသည်။
ယင်းဓါတ်ပုံများကို အမေရိကန် စစ်ရေးသတင်းများ တင်ပြသည့် ဖေ့စ်ဘွတ်စာမျက်နှာတစ်ခုတွင် ပထမဆုံး တင်ထားခဲ့ပုံရပြီး ၎င်းဓာတ်ပုံများတွင် E-3 Sentry လေယာဉ်နှစ်ပိုင်း ကျိုးပျက်နေသည်ကို မြင်တွေ့ရသည်။
မြို့တော်ရီယာ့ဒ်မှ ၆၂ မိုင်ခန့် ကွာဝေးသော မင်းသားဆူလ်တန်လေတပ်စခန်းတွင် ရိုက်ယူထားသော ဓာတ်ပုံများသည် စစ်မှန်ကြောင်း ဘီဘီစီသတင်းဌာနက စိစစ်အတည်ပြုခဲ့သည်။
ဓာတ်ပုံများတွင် ပါဝင်သော နေရာ၊ အဆောက်အဦးများကို ဂြိုဟ်တု ဓာတ်ပုံများနှင့် ဘီဘီစီက တိုက်ဆိုင်စစ်ဆေး အတည်ပြုထားသည်။
ယင်းဖြစ်ရပ်အပေါ် အမေရိကန်အလယ်ပိုင်းတိုင်းစစ်ဌာနချုပ်က လူသိရှင်ကြား မှတ်ချက်မပေးသေးကြောင်း နှင့် ဘီဘီစီက မှတ်ချက် တောင်းထားကြောင်းသိရသည်။
လေတပ်စခန်းတစ်ခုအား အီရန်၏ တိုက်ခိုက်မှု ဖြစ်ပေါ်ခဲ့ပြီးနောက် အမေရိကန်တပ်ဖွဲ့ဝင် ၁၂ ဦး ဒဏ်ရာရရှိခဲ့ပြီး ၂ ဦးမှာ ဒဏ်ရာ ပြင်းထန်သည်ဟု အမေရိကန်အရာရှိကြီးတစ်ဦးက သောကြာနေ့တွင်ပြောကြားခဲ့သည်။
ယင်းတိုက်ခိုက်မှု၌ အမေရိကန် ဆီဖြည့်လေယာဉ် အနည်းဆုံး ၂ စင်းလည်း ပျက်စီးသွားခဲ့သည်ဟု ဝေါလ်စထရိဂျာနယ်က ဖော်ပြခဲ့သည်။
အီရန် ရှာဟက် ဒရုန်းတစ်စင်းက အမေရိကန်၏ E-3 လေယာဉ်တစ်စီးကို ထိမှန်ခဲ့ကြောင်း အီရန် Fars သတင်းဌာနက ယမန်နေ့တွင် ပြောကြားသည်။
မတ် ၁၁ ရက် ဂြိုဟ်တုဓာတ်ပုံတွင် ထိုနေရာ၌ E-3 လေယာဉ်တစ်စီး ရပ်တန့်ထားသည်ကို မြင်တွေ့ရသော်လည်း ပျက်စီးသွားသောလေယာဉ် ဟုတ်၊ မဟုတ်ကို မသိသေးကြောင်း BBC Verify က ဆိုသည်။
E-3 လေယာဉ်များတွင် တပ်ဆင်ထားသော ရေဒါများသည် ဝေးလံသော နေရာများမှ ပစ်မှတ်များကို ခြေရာခံ ဖော်ထုတ်နိုင်ကြောင်း သိရသည်။
အေးကျော််
Ref: BBC
#MeKongNews
#ဆော်ဒီလေတပ်စခန်း
#အမေရိကန်
#ရေဒါထောက်လှမ်းရေလေယာဉ်
#ပျက်စီး
