မဲခေါင်၊ မတ် ၂၅
ထိုင်းနိုင်ငံ စက်သုံးဆီရန်ပုံငွေ စီမံခန့်ခွဲမှုကော်မတီင ဒီဇယ်နှင့် ဓာတ်ဆီတို့အတွက် စိုက်ထုတ်ရသည့်စရိတ် လျှော့ချရန် အတည်ပြုလိုက်ပြီး ပြည်တွင်းစက်သုံးဆီ အရောင်းဆိုင်များတွင် စျေးနှုန်းများ တစ်လီတာလျှင် ၆ ဘတ်စီ မြင့်တက်လာတော့မည်ဟု ထိုင်းသတင်းများတွင် ဖော်ပြသည်။
စျေးနှုန်းမြှင့်တင်ရခြင်း အကြောင်းရင်းများမှာ အရှေ့အလယ်ပိုင်းဒေသ တင်းမာမှုများကြောင့် ကမ္ဘာ့ရေနံစျေးနှုန်းများ မြင့်တက်လာခြင်းသည် ယခုကဲ့သို့ စျေးနှုန်းညှိနှိုင်းရခြင်း၏ အဓိကအကြောင်းရင်းဖြစ်သည်ဟု ကော်မတီက ဆိုသည်။
စင်ကာပူစျေးကွက်တွင် ဒီဇယ်စျေးနှုန်းသည် မတ်လ ၂၃ ရက်နေ့က တစ်စည်လျှင် အမေရိကန်ဒေါ်လာ ၁၉၈ ဒသမ ၂၀ ရှိခဲ့ရာမှ ၂၄၂ ဒသမ ၉၁ ဒေါ်လာအထိ ရုတ်တရက် မြင့်တက်သွားခဲ့သဖြင့် ပြည်တွင်းစက်သုံးဆီ ကုန်ကျစရိတ်အပေါ် ဖိအားများ ဖြစ်ပေါ်စေခဲ့သည်။
ထို့ပြင် လက်ရှိတွင် စက်သုံးဆီရန်ပုံငွေသည် စျေးနှုန်းထိန်းညှိရန်အတွက် တစ်ရက်လျှင် ဘတ် ၂ ဒသမ ၅၉ ဘီလီယံ၊ တစ်လလျှင် ဘတ် ၈၀.၃ ဘီလီယံခန့် စိုက်ထုတ်သုံးစွဲနေရသဖြင့် ဘဏ္ဍာရေးဝန်ထုပ်ဝန်ပိုးကို လျှော့ချရန်အတွက်လည်း ရည်ရွယ်ခြင်းကြောင်း၊ ကမ္ဘာ့စွမ်းအင်စျေးကွက် မတည်ငြိမ်မှုများကြားတွင် ရန်ပုံငွေ၏ ငွေကြေးစီးဆင်းမှု ကောင်းမွန်စေရန်နှင့် ရေရှည်စျေးနှုန်း တည်ငြိမ်စေရန်အတွက် ယခုကဲ့သို့ ပြုလုပ်ရန် လိုအပ်ကြောင်း အာဏာပိုင်များက ပြောသည်။
စက်သုံးဆီစျေးနှုန်း မြှင့်တင်ခြင်းသည် အိမ်နီးချင်းနိုင်ငံများနှင့် စျေးနှုန်းချင်း ဟန်ချက်ညီစေရန် ဖြစ်ပြီး၊ အမြတ်ထုတ်ရန်အတွက် ဆီသိုလှောင်ခြင်းနှင့် ဆီမှောင်ခိုကူးခြင်း အန္တရာယ်များကို လျှော့ချပေးနိုင်မည်ဟု အရာရှိများက ထပ်လောင်းပြောကြားသည်။ ဥပမာအားဖြင့် မတ်လလယ်ပိုင်းအထိ မလေးရှားနိုင်ငံတွင် ဒီဇယ်စျေးနှုန်းမှာ တစ်လီတာလျှင် ၃၉ ဒသမ ၅၄ ဘတ်ခန့်အထိ မြင့်တက်နေပြီ ဖြစ်သည်။
အစိုးရအနေဖြင့် စျေးနှုန်းမြင့်တက်မှုဒဏ်ကို ခံစားရမည့် အများပြည်သူ သယ်ယူပို့ဆောင်ရေး လုပ်ငန်းရှင်များ၊ တောင်သူလယ်သမားများ၊ ရေလုပ်သားများနှင့် အသေးစားလုပ်ငန်းရှင်များအတွက် သက်သာစေမည့် အစီအစဉ်များကို ပြင်ဆင်နေကြောင်း သိရသည်။ ထို့အတူ အများပြည်သူအနေဖြင့်လည်း ယခုကဲ့သို့ မရေရာသည့် ကာလအတွင်း စွမ်းအင်ကို ပိုမိုထိရောက်စွာ ချွေတာသုံးစွဲကြရန် အာဏာပိုင်များက တိုက်တွန်းထားသည်။
Ref: Khaosod English
#MeKongNews
#စက်သုံးဆီ
#ထိုင်းနိုင်ငံ
#စွမ်းအင်ဈေးကွက်
#အီရန်စစ်ပွဲ
