မဲခေါင်၊ မတ် ၂၃
မဟာဗျူဟာကျသော ဟောမုဇ်ရေလက်ကြားကို ပြန်မဖွင့်ပေးပါက အီရန်၏ ဓာတ်အားပေးစက်ရုံများကို တိုက်ခိုက်သွားမည်ဟု အမေရိကန်သမ္မတ ဒေါ်နယ်ထရမ့်က ခြိမ်းခြောက်လိုက်ပြီးနောက် အရှေ့အလယ်ပိုင်းတစ်ခွင်မှ စွမ်းအင်လုပ်ငန်းစခန်းများကို လက်တုံ့ပြန်သွားမည်ဟု အီရန်က တန်ပြန် ခြိမ်းခြောက်လိုက်သည်။
အီရန်ဓာတ်အားပေးစက်ရုံများ တိုက်ခိုက်ခံခဲ့ရပါက ဒေသတွင်းမှ ရေနံနှင့် စွမ်းအင်လုပ်ငန်းများနှင့်အခြားအရေးပါသော အခြေခံအဆောက်အအုံများကို ပြန်ပြင်၍ မရအောင် ဖျက်ဆီးပစ်မည်ဟု အီရန်ပါလီမန်ဥက္ကဌ မိုဟမ်မက်ဘာဂါ ဂါလီဘက်ဖ် က X လူမှုကွန်ရက်ပေါ်တွင် ရေးသားခဲ့သည်။
အီရန်၏ အခြေခံအဆောက်အအုံများကို ထိမှန်ခဲ့ပါက ဒေသတွင်းမှ အခြေခံ အဆာက်အအုံများသည်လည်း အီရန်၏ တရားဝင်ပစ်မှတ်များ ဖြစ်လာလိမ့်မည်ဟု ဂါလီဘက်ဖ်က ဆက်လက် ပြောကြားပြီး တီဟီရန်၏ လက်တုံ့ပြန်မှုများကြောင့် ရေနံဈေးနှုန်းကို အချိန်အကြာကြီး မြင့်တက်နေစေလိမ့်မည်ဟု ၎င်းက ဆိုသည်။
ဟောမုဇ်ရေလက်ကြားကို ၄၈ နာရီအတွင်း ပြန်မဖွင့်ပေးပါက အီရန်၏ ဓာတ်အားပေးစက်ရုံများကို အမှုန့်ကြိတ်ပစ်မည်ဟု ဒေါ်နယ်ထရမ့်က စနေနေ့တွင် ခြိမ်းခြောက်ခဲ့ပြီးနောက် အီရန်ပါလီမန်ဥက္ကဌ၏ ကြုံးဝါးမှု ထွက်ပေါ်လာခြင်း ဖြစ်သည်။
တစ်ဖက်တွင်လည်း ကမ္ဘာ့ရေနံ ၅ ပုံ၊ တစ်ပုံ ဖြတ်သန်းစီးဆင်းနေသော ဟောမုဇ်ရေလက်ကြားကို ပိတ်မထားကြောင်း အီရန်က အခိုင်အမာ ပြောကြားသည်။
အရှေ့အလယ်ပိုင်းမှ အဓိကထွက်ရှိပြီး တစ်ကမ္ဘာလုံးကို ဖြန့်ချိနေသည့် ရေနံ နှင့် သဘာဝ ဓာတ်ငွေ့ရည်တင်သင်္ဘောများ အဓိက အားထားရသည့် ရေလက်ကြားကို အီရန်က လည်မျိုညှစ်ထားခဲ့ရာ ၁၉၇၀ နောက်ပိုင်း အဆိုးရွားဆုံး ရေနံ နှင့်လောင်စာ အကျပ်အတည်း ဖြစ်ပေါ်လာခဲ့သည်။
မိမိတို့ နိုင်ငံအပေါ် ရန်ပြုနေသူများမှလွဲမှ ကျန်နိုင်ငံအားလုံးအတွက် ဟောမုဇ်ရေလက်ကြားကို ဖွင့်ထားသည်ဟု အီရန်သမ္မတ မာဆွတ်ပီဇက်ကီယန်က ယမန်နေ့တွင် ပြောကြားသည်။
အီရန်တွင် ဩဇာကြီးမားသော တော်လှန်ရေးအစောင့်တပ် – IRGC ကမူ ထရမ့်က ၎င်းခြိမ်းခြောက်ထားသည့်အတိုင်း အီရန်၏ လျှပ်စစ်လုပ်ငန်းများကို တိုက်ခိုက်ခဲ့ပါက ရေလက်ကြားကို လုံးဝ ပိတ်ပစ်လိုက်မည်ဟု အစောပိုင်းတွင် ပြောကြားသည်။
အေးကျော်
Ref: Al Jazeera
#MeKongNews
#ဓာတ်အားပေးစက်ရုံ
#စွမ်းအင်စခန်း
#အီရန်
#သတိပေး
