မဲခေါင်၊ မတ် ၂၃
ရှမ်းပြည်မြောက်ပိုင်း၊ မူဆယ်မြို့မှ ရှမ်းပြည်တောင်ပိုင်း၊ တောင်ကြီးမြို့သို့ လိမ်လည် လူကုန်ကူးခံရသည့် အမျိုးသား ၃ ဦးကို ရှမ်းပြည်တိုးတက်ရေးပါတီ – SSPP စစ်ဆေးရေးဂိတ်မှ လမ်းခုလတ်တွင် ကယ်တင်နိုင်ခဲ့ကြောင်း သတင်းရင်းမြစ်များထံမှ သိရသည်။
မူဆယ်မြို့မှ အမျိုးသား ၃ ဦးသည် တောင်ကြီးမြို့တွင် တစ်လ ကျပ်သိန်း ၂၀ ဖြင့် ပြည်သူ့စစ် လုပ်ရမည်ဟု ပွဲစားက ခေါ်သဖြင့် မတ် ၂၂ ရက်တွင် ပွဲစားက စီစဉ်ပေးသည့်ကားဖြင့် လိုက်သွားခဲ့ရာ လမ်းခုလတ် ရောက်သည့်အခါမှ လိမ်လည် လူကုန်ကူးခံရကြောင်း သိရှိခဲ့ရခြင်း ဖြစ်သည်။
ယင်းသို့ သိရှိပြီးနောက် နမ့်လမ် – ကျောက်ဂူကြားရှိ SSPP စစ်ဆေးရေးဂိတ် အရောက်တွင် SSPP တပ်ဖွဲ့ကို အကူအညီတောင်းသဖြင့် ကယ်တင်ခဲ့ခြင်းဖြစ်သည်ဟု ဖြစ်စဉ်သိရှိသူက ပြောသည်။
“အရင်သွားဖူးတဲ့ လူတစ်ယောက်က အဲ့အလုပ်က တကယ်မဟုတ်ဘူး၊ လိမ်ပြီး လူကုန်ကူးတာ မသွားကြနဲ့လို့ ဆက်သွယ်ပြီး အသိပေးတယ်။ အဲဒီသတိပေးတဲ့ တစ်ယောက်က အရင်အဲ့ပွဲစားနဲ့ သွားဖူးတာ တောင်ကြီးရောက်တော့ အလုပ်မလုပ်ရဘဲ အဖမ်းခံရပြီး အချုပ်တစ်ခုထဲ ရောက်သွားတယ်။ ရက်၂၀ ကျော်ကြာမှ ထွက်ပြေး လွတ်မြောက်လာတာ၊ အဲဒါကြောင့် အခု ၃ ယောက်ကလည်း ပွဲစားကို ဆက်သွယ်ပြီး လမ်းမှာသုံးဖို့ မရှိလို့ ပိုက်ဆံလွှဲပေးဦးလို့ ပြောတာ ပွဲစားက ပိုက်ဆံမလွှဲပေးဘူး၊ ပြီးတော့ ဖုန်းတွေကိုလည်း အကုန်သိမ်းခိုင်းလိုက်တယ်။ အဲ့ဒါကြောင့် သူတို့ ၃ ယောက်လည်း လူကုန်ကူးခံရပြီဆိုတာ ရိပ်မိတော့ SSPP ဂိတ်ကို ရောက်တဲ့အခါမှ ရှမ်းစကားတတ်တဲ့ တစ်ယောက်က SSPP ကို ကယ်ဖို့ အကူအညီတောင်းလို့ SSPP က ကယ်ထားလိုက်တာ”ဟု ၎င်းက ဆိုသည်။
လူကုန်ကူးခံရသည့် အမျိုးသား ၃ ဦးကို SSPP က စခန်းတွင် ကယ်တင်ထားစဉ်အတွင်း မန္တလေးမြို့မှ လူနာပို့ပြီး ပြန်လာသည့် လက်ဖက်ညွန့် လူမှုကူညီရေးအသင်းကားနှင့် ကြုံသဖြင့် ယင်းအသင်းကားဖြင့် မူဆယ်သို့ ပြန်လည် ပို့ဆောင်ပေးခဲ့သည်။
“ကျနော်တို့က မန္တလေးကနေ လူနာပို့ပြီး ပြန်လာတာ၊ အဲဒီဂိတ် ရောက်တော့မှ အဲဒီယောင်္ကျားလေး ၃ ယောက် အလိမ်ခံရပြီး လူကုန်ကူးခံရမှန်း အကြောင်းအကျိုး သိလိုက်ရတာပေါ့။ ကျနော်တို့လည်း မူဆယ်ပြန်မယ်၊ သူတို့လည်း မူဆယ်ပြန်သွားမယ်ဆိုတဲ့အခါကျတော့ လမ်းကလည်းတစ်ကြောင်းတည်းပဲမို့ ကူညီပြီး ပြန်ခေါ်လာပေးတာပါ။ ပြောရရင် အဖြစ်က ကျားဖြန့်လိုပဲ လိမ်ပြီး လူကုန်ကူးခံရတာ သတိထားကြဖို့ အယုံမလွယ်ဖို့ လိုပါတယ်” ဟု လက်ဖက်ညွန့် လူမှုကူညီရေးအသင်းမှ တာဝန်ရှိသူတစ်ဦးက ပြောသည်။
အလုပ်ရှာဖွေသည့် လူငယ်များအနေဖြင့် လူလိမ် ကျားဖြန့်များ၏ သားကောင်များ မဖြစ်စေရန် အွန်လိုင်းပေါ်မှ တိကျသေချာမှု မရှိသည့် အလုပ်ခေါ်စာများ၊ ပွဲစားများကို အလွယ်တကူ ယုံကြည်ခြင်းမရှိဘဲ သတိထားရန် လိုအပ်ကြောင်းလည်း သတင်းရင်းမြစ်က တိုက်တွန်းသည်။
#MeKongNews
#မူဆယ်
#တောင်ကြီး
#လူကုန်ကူး
#SSPP
