မဲခေါင်၊ မတ် ၂၁
ဒရုန်းဗုံးကြောင့် မီးလောင်နေသည့် အိမ်တစ်လုံးကို မီးငြှိမ်းသတ်ရန် ကြိုးစားသည့် ဒေသခံတစ်ဦးအား ကိုးကန့်တပ်ဖွဲ့ – MNDAA က ပစ်သတ်ခဲ့သည်ဟု နမ့်ဖက်ကာဒေသခံ သတင်းရင်းမြစ်များက ပြောသည်။
ကွတ်ခိုင်မြို့နယ် နမ့်ဖက်ကာမြို့တွင် နေထိုင်သည့် ကိုနိုင်ထွန်းဆိုသူသည် ဒရုန်းဗုံးကြောင့် မီးလောင်နေသည့်အိမ်ကို ကူညီငြှိမ်းသတ်ရန် သွားနေစဉ် ကိုးကန့်တပ်ဖွဲ့က ပစ်သတ်လိုက်ခြင်းဖြစ်ကြောင်း ဖြစ်စဉ်ကို သိရှိသည့် သတင်းရင်းမြစ်က ပြောသည်။
ပြီးခဲ့သည့် မတ် ၁၄ ရက်တွင် MNDAA က နမ့်ဖက်ကာရှိ တအာင်းတပ်ဖွဲ့ – TNLA ကို ဒရုန်းဖြင့် ဗုံးကြဲတိုက်ခိုက်ရာ အရပ်သားနေအိမ်အချို့လည်း ဗုံးဒဏ်ထိကာ မီးလောင်ခဲ့သည်။
ယင်းတိုက်ခိုက်မှုအပြီး မွန်းလွဲ ၂ နာရီခန့်တွင် ကိုနိုင်ထွန်းက မီးလောင်နေသည့် အဖိုးဖြစ်သူ၏ နေအိမ်ကို ကူညီငြှိမ်းသတ်ရန် သွားစဉ် ပစ်သတ်ခံလိုက်ရခြင်းဖြစ်သည်။
“မီးလောင်နေတဲ့ အိမ်က သူ့နဲ့ဆို အဖိုးတော်တာပေါ့။ သူသွားတဲ့အချိန်က ပစ်ခတ်မှုလည်း ငြိမ်နေပြီဆိုတော့ အဖိုးအိမ် မီးလောင်နေတာကို သွားကူဦးမယ်ဆိုပြီး ထွက်သွားတာ လမ်းမှာ ကိုးကန့်နဲ့တွေ့ပြီး ပစ်သတ်ခံလိုက်ရတယ်။ အလောင်းလည်း ပြန်မပေးဘူး။ အလောင်းကို မီးရှို့လိုက်ပြီပြောပြီး သေနေတဲ့ ပုံကိုပဲ ပြတယ်”ဟု ဖြစ်စဉ်ကို သိရှိသည့် နမ့်ဖက်ကာဒေသခံတစ်ဦးက ပြောသည်။
ကိုနိုင်ထွန်းကို ပစ်သတ်ပြီးနောက် အလောင်းပြန်မပေးပဲ မီးရှို့လိုက်ပြီဟု MNDAA ကပြောဆိုခဲ့ပြီး အင်္ကျီအရောင်နှင့် ညာဘက်လက်မောင်းတွင် တွေ့ရသည့် တက်တူးအရ သေဆုံးသူမှာ ကိုနိုင်ထွန်းမှန်ကန်ကြောင်းကိုလည်း ကျန်ရစ်သည့် ဇနီးဖြစ်သူကတအာင်းအမျိုးသီးအဖွဲ့အစည်းကို အတည်ပြု ပြောဆိုထားသည်။
“MNDAA တပ်နဲ့တိုးတော့ သူတို့က သူ့ကို ပစ်သတ်လိုက်တာ၊ ဦးခေါင်းအနောက်ကို”ဟု ၎င်း၏ဇနီးက ပြောသည်။
သေဆုံးသွားသည့် ကိုနိုင်ထွန်း၏ ရုပ်အလောင်းကို မိသားစုဝင်များက ပြန်ပေးရန် တောင်းဆိုသော် လည်း MNDAA က ပြန်မပေးပဲ အလောင်းနှင့် ၎င်း၏ဖုန်း၊ ဆိုင်ကယ်များကိုပါ မီးရှို့လိုက်ပြီဟု ပြောဆိုခဲ့ကြောင်း သတင်းရင်းမြစ်က ပြောသည်။
“အလောင်းတောင်းတာ မပေးတဲ့အပြင် အလောင်းရော၊ ဆိုင်ကယ်ရော ဖုန်းရော မီးရှို့လိုက်ပြီ ဘာမှ မရှိတော့ဘူးဆိုပြီး ပြောလွှတ်တာ၊ ဘယ်မှာရှို့တာလည်း မေးတော့လည်း မပြောဘူး”ဟု ၎င်းကပြောသည်။
MNDAA သည် မတ် ၁၄ ရက်တွင်ပင် နမ့်ဖက်ကာမြို့ ရပ်ကွက် ၄ ရှိ မိုင်းအိုက်ကျင် နှင့် နောက်တစ်ဦးကိုလည်း ဖမ်းဆီးကာ ပစ်သတ်ခဲ့သေးသည်။
လက်ရှိအချိန်ထိ မဲခေါင်က စုစည်းကောက်ယူထားသည့် စာရင်းအရ TNLA ကို ထိုးစစ်ဆင်သည့် ကာလအတွင်း ကွတ်ခိုင်မြို့နယ်ရှိ အရပ်သား ၉ ဦးထက်မနည်းကို MNDAA က ပစ်သတ်ခဲ့သည်။
ယင်း ၉ ဦးမှာ နမ့်ဖက်ကာမြို့မှ မိုင်းအိုက်ကျင်၊ ကိုနိုင်ထွန်းနှင့် အမည်မသိတစ်ဦး၊ မန်ထန်ရွာမှ မအီဝင်း နှင့် ယာမာအိုင်ဖစ်၊ လွယ်ဆိုင်ရွာမှ မိုင်းထွန်းလှ၊ ဟိုကျန့်ရွာမှ ယာမာခင်၊ ကောင်းခါး မန်ပြိန်းရွာမှ ယာအိုင်ကြိမ်၊ ကွတ်ခိုင် မန်ပြိန်းရွာမှ သူကြီး ဦးနိုင်ကိန် တို့ ၉ ဦးဖြစ်ကြသည်။
ယခုစာရင်းသည် သတင်းမီဒီယာပေါ် ရောက်ရှိလာသည့် ဖြစ်ရပ်များနှင့် လက်လှမ်းမှီသည့် ဖြစ်ရပ်များကိုသာ မဲခေါင်သတင်းဌာနက စုစည်းထားခြင်း ဖြစ်ပြီး မြေပြင်တွင် ယခုထက် ပိုမိုများပြားနိုင်သည်။
လက်ရှိတွင်၂ ဖက်တပ်ဖွဲ့ကြား ဖြစ်ပွားနေသည့် တိုက်ပွဲများ ရပ်တန့်နိုင်ရေး MNDAA ဌာနချုပ် လောက်ကိုင်တွင် ၂ ဖက်ခေါင်းဆောင်များ တွေ့ဆုံဆွေးနေသည်မှာ ၄ ရက်မြောက်ရှိပြီဖြစ်သည်။
#MeKongNews
#MNDAA
#တိုက်ပွဲ
#မီးလောင်
#ဒေသခံ
#ပစ်သတ်
