မဲခေါင်၊ မတ် ၁ဝ
ရှမ်း – ကရင်နီနယ်စပ် မိုးဗြဲမြို့အနီးတွင် စစ်ကြောင်းထိုးနေသည့် စစ်ကောင်စီတပ်နှင့် ပအိုဝ်းပြည်သူ့စစ် – PNO ပူးပေါင်းစစ် ကြောင်းက လွယ်ယင်းတောင် ခြေဒေသရှိ လီဝိုးကျေးရွာများဘက်သို့ နီးကပ်လာနေခြင်းကြောင့် ဒေသခံများနှင့် စစ်ဘေးရှောင်အချို့ ထပ်မံပြောင်းရွှေ့တိမ်းရှောင်နေရကြောင်း ဒေသခံများထံမှ သိရသည်။
ဒေသတွင်း ကျေးရွာများတွင် သက်ကြီးရွယ်အိုများနှင့် ကလေးများကို ဦးစားပေးပြောင်းရွှေ့ရန်နှင့် စားသောက်ရေးအတွက် စပါးနှင့် အရေးကြီးပစ္စည်းများကို ကြိုတင်သယ်ယူထားရန် ကျေးရွာတာဝန်ရှိသူများနှင့် တော်လှန်ရေးတပ်ဖွဲ့များက အသိပေးထားကြောင်း သိရသည်။
“ရွာဘက်ကို စစ်ကြောင်းတွေ နီးလာတာကြောင့် လူတွေ ကြိုတင် ပြောင်းရွှေ့နေကြပါတယ်။ သက်ကြီးရွယ်အိုနဲ့ ကလေးတွေကို အရင်ထုတ်ပေးဖို့ ပြောထားပြီး စားဖို့သုံးဖို့ ပစ္စည်းတွေကိုလည်း သယ်ထားကြပါတယ်” ဟု ဒေသခံ အမျိုးသမီးတစ်ဦးက ပြောသည်။
ယခုရက်ပိုင်းအတွင်း မိုးဗြဲဒေသရှိ ဆောင်ပလန်ကျေးရွာတွင်လည်း စစ်ကောင်စီတပ်က ဒရုန်းဖြင့် ဗုံးကြဲတိုက်ခိုက်မှုများနှင့် လက်ဘနက်ကြီး ပစ်ခတ်မှုများ ရှိနေကြောင်း ဒေသခံများက ဆိုသည်။
ရှမ်း – ကရင်နီနယ်စပ်ဒေသတွင် လောင်စာဆီဈေးနှုန်းများ မြင့်တက်နေခြင်းကြောင့် အရေးပေါ် တိမ်းရှောင်ရာတွင်လည်း ဒေသခံများ အခက်အခဲများ ကြုံတွေ့နေရသည်။
“အခုအခြေအနေက ထွက်ပြေးရတာလည်း လွယ်ကူမနေဘူး။ ဆီဈေးတွေတက်ပြီး ဝယ်ရတာခက်တော့ သွားလာဖို့တောင် အခက် အခဲတွေ များနေပါတယ်” ဟုစစ်ဘေးရှောင်တစ်ဦးက ပြောသည်။
လက်ရှိ မိုးဗြဲဒေသတွင် ဓာတ်ဆီတစ်လီတာကို ကျပ်တစ်သိန်းမှ ၁၅၀၀၀ ဝန်းကျင်အထိ ပေးဝယ်နေရပြီး မိုးဗြဲမှ ဒီးမော့ဆိုအ နောက်ခြမ်းသို့ ကားငှားရမ်းသွားလာရာတွင် ကျပ်တစ်သိန်းမှ တစ်သိန်းခွဲအထိ ကုန်ကျနေသ ဖြင့် ငွေကြေးအခက်အခဲရှိသည့် ဒေသခံများအတွက် တိမ်းရှောင်ရေး ပိုမိုခက်ခဲနေကြောင်း သိရသည်။
လက်ရှိ အရေးပေါ် ပြောင်းရွှေ့နေကြသည့် လွယ်ယင်းတောင်ခြေနှင့် လီဝိုးကျေးရွာများတွင် အိမ် ခြေ ၆၀၀ ကျော်နှင့် လူဦးရေ တစ်ထောင်ဝန်းကျင် နေထိုင်ကြောင်း ဒေသခံများက ခန့်မှန်းပြောဆိုထားသည်။
#MeKongNews
#စစ်ကောင်စီတပ်
#PNO
#မိုးဗြဲ
