မဲခေါင်၊ မတ် ၆
အီရန်အပေါ် စစ်ဆင်ရေးများ စတင်ပြီးနောက်ပိုင်း အီရန်၏ စစ်သင်္ဘော ၃၀ ကျော်ကို အမေရိကန်စစ်ဘက်က ဖျက်ဆီးပစ်လိုက်ပြီဖြစ်ကြောင်းနှင့် ယင်းတွင် လတ်တလော မီးလောင်နေသော ဒရုန်းတင်သင်္ဘောကြီးလည်း ပါဝင်သည်ဟု အရှေ့အလယ်ပိုင်းစစ်ဆင်ရေးကို ကြီးကြပ်နေသော အမေရိကန်အလယ်ပိုင်းစစ်ဌာနချုပ် – CENTCOM မှ ထိပ်တန်းဗိုလ်ချုပ်ကြီးက ပြောသည်။
“ယခုအချိန်ထိ အမေရိကန်စစ်တပ်က အီရန်သင်္ဘော ၃၀ ကျော်ကို နှစ်မြုပ်ပစ်ခဲ့ပါတယ်” ဟု CENTCOM အကြီးအကဲ ရေတပ်ဗိုလ်ချုပ်ကြီး ဘရက်ဒ်ကူးပါးက သတင်းထောက်များအား ပြောကြားပြီး ၎င်းတို့အနက် လောလောဆယ် တိုက်ခိုက်မှုကြောင့် မီးလောင်နေသော အီရန် ဒရုန်းတင်စစ်သင်္ဘောကြီးလည်း ပါဝင်ကာ ၎င်းက ဒုတိယကမ္ဘာစစ်က လေယာဉ်တင်သင်္ဘော အရွယ်အစားရှိကြောင်း ကူးပါးက ဆက်ပြောသည်။
အခုကျနော်တို့ ပြောနေချိန်မှာပဲ အဲဒီသင်္ဘောကြီး မီးလောင်နေပါတယ်” ဟု ၎င်းက ဆိုသည်။
အီရန်နိုင်ငံ၏ ဒုံးကျည်ပစ်လွှတ်နိုင်စွမ်းလည်း သိသိသာသာ ကျဆင်းသွားပြီဖြစ်ကြောင်းနှင့် စစ်ပွဲပထမဆုံးရက်နှင့် နှိုင်းယှဉ်ပါက အီရန်၏ ဒုံးကျည်တိုက်ခိုက်မှုများ ၉၀ ရာခိုင်နှုန်း ကျဆင်းသွားပြီဟု ၎င်းက ပြောသည်။
အီရန်စစ်ဆင်ရေးတွင် အမေရိကန်က စွမ်းဆောင်ရည်သစ်များကို အသုံးပြုနေပြီး ယင်းတွင် အီရန်ထံမှ ကြီးမားသော ဒရုန်းခြိမ်းခြောက်မှုကို တန်ပြန်နိုင်သည့် စနစ်သစ်များလည်း ပါဝင်သည်ဟု ၎င်းက ပြောသည်။
ထိုစနစ်တစ်ခုမှာ အီရန်ဒရုန်းများကို တစ်စစီဖြုတ်၍ လေ့လာပြီး အမေရိကန်က တည်ဆောက်ထားသည့် LUCAS တိုက်ခိုက်ရေးဒရုန်းများဖြစ်ကာ ယင်းစနစ်မှာ အီရန်နှင့် စစ်ပွဲတွင် လက်မလွှတ်နိုင်သော စနစ်ဖြစ်သည်ဟု ၎င်းက ဆိုသည်။
အီရန်က နက်ရှိူင်းသော မြေအောက်တွင်ထားရှိသော ဒုံးကျည်ပစ်စင်များနှင့် ဒုံးကျည်ထုတ်လုပ်ရေးစခန်းများအား ပစ်မှတ်ထား၍ အမေရိကန်၏ B-2 ဗုံးကြဲလေယာဉ်ကြီးများက မြေအောက်သို့ ဖောက်ထွင်းနိုင်သည့် ပေါင် ၂၀၀၀ ဗုံးများဖြင့် ပြီးခဲ့သည့် နာရီပိုင်းကပင် တိုက်ခိုက်ခဲ့သည်ဟု ဗိုလ်ချုပ်ကြီး ကူးပါးက သတင်းထောက်များကို ပြောကြားသည်။
အီရန်ဘက်က ဒရုန်းများဖြင့် တိုက်ခိုက်မှုများလည်း ၈၃ ရာခိုင်နှုန်း လျော့ကျသွားပြီဟုလည်း ၎င်းက ဆက်ပြောသည်။
အေးကျော်
Ref: indiatoday /Reuters
#MeKongNews
#အီရန်စစ်သင်္ဘော
#ဖျက်ဆီး
#အမေရိကန်
