မဲခေါင်၊ ဖေဖော်ဝါရီ ၂၈
ရှမ်းပြည်မြောက်ပိုင်း၊ ကွတ်ခိုင်မြို့နယ် နမ့်ဖက်ကာတွင် ကောက်ရသည့် မိုင်းဗုံးကို ဆော့ကစားရာမှ ဗုံးပေါက်ကွဲပြီး ကိုရင်လေးတစ်ပါး ခြေထောက်တစ်ဖက်ပြတ်ကာ ဒဏ်ရာအပြင်းအထန် ရရှိသည်ဟု သတင်းရင်းမြစ်ထံမှ သိရသည်။
ပြီးခဲ့သည့် ဖေဖော်ဝါရီ ၂၆ ရက် နေ့လည် ၁၂ နာရီအချိန် နမ့်ဖတ်ကာကျေးရွာ ရပ်ကွက် ၂ ရှိ ဘုန်းကြီးကျောင်း အနီးရှိ ရဲစခန်းနှင့် နတ်စင်အကြားတွင် ယင်းဖြစ်စဉ် ဖြစ်ပွားခဲ့ခြင်း ဖြစ်ကာ လက်ရှိတွင် ဒဏ်ရာ ပြင်းထန်သည့် ကိုရင်လေးအား ဆေးရုံသို့ ပို့ဆောင်ကာ ဆေးကုသမှု ပေးထားကြောင်း သိရသည်။
မိုင်းဗုံးဆော့ကစားရာမှ ပေါက်ကွဲမှုဖြစ်ပွားခြင်းကြောင့် ဒဏ်ရာရရှိသည့် ကိုရင်လေးသည် အသက် ၁၁ နှစ်အရွယ်သာ ရှိသေးပြီး ဗုံးပေါက်ကွဲခြင်းကြောင့် ညာဖက်ခြေထောက် ပြတ်ထွက်သွားပြီး ဘယ်ဖက်ခြေထောက်၊ လည်ပင်းနှင့် မေးရိုးကျိုးသည့် ဒဏ်ရာများ ရရှိသည်။
“၂၅ ရက်ကတည်းက ဗုံးကို ကောက်ရတယ်လို့ ကြားတယ်၊ ဗုံးကိုယူပြီး ရဲစခန်းနဲ့ နတ်စင်ကြားမှာ သွားဆော့ပြီး ပေါက်ကွဲသွားတာ။ သွားဆော့တာတော့ ၃ ပါးရှိတယ်။ ၂ ပါးက အရင် ပြန်သွားတယ်၊ မကြာဘူး ပေါက်ကွဲသံကြားတယ်” ဟု ဒေသခံ သတင်းရင်းမြစ်တစ်ဦးက ပြောသည်။
ပေါက်ကွဲမှုအတွင်း ခြေထောက်ပါ ပြတ်ထွက်သွားသဖြင့် ကိုရင်လေး ကောက်ရသည့် ဗုံးသည် လက်ပစ်ဗုံးထက် မိုင်းဗုံးအမျိုးအစားသာ ဖြစ်ကြောင်း တာဝန်ရှိ ဌာနဆိုင်ရာများအနေဖြင့်လည်း မိုင်းရှင်းလင်းရေးကို ပိုပြီး လုပ်စေလိုကြောင်း နောက်ထပ် သတင်းရင်းမြစ်တစ်ဦးက ပြောသည်။
“ခြေထောက် ပြတ်ထွက်သွားတယ်ဆိုတော့ မြေမြှုပ်မိုင်းလို့ ထင်တယ်၊ အရင်က ကချင်စစ်သားနဲ့ စစ်ကောင်စီစစ်သားတွေ တိုက်ပွဲဖြစ်တဲ့ နေရာဆိုတော့ ဘယ်အဖွဲ့က မြုပ်ထားလဲ မပြောတတ်ဘူး၊ ဒီမြေမြှုပ်မိုင်း ဖြစ်ဖြစ်၊ လက်ပစ်ဗုံးတွေပဲ ဖြစ်ဖြစ် နမ့်ဖတ်ကာကျေးရွာမှာ တာဝန်ရှိတဲ့သူတွေက တာဝန်ယူ လုပ်ဆောင်ပေးရမယ်လို့ မြင်တယ်”ဟု ၎င်းက ပြောသည်။
မိုင်းပေါက်ကွဲမှုကြောင့် ဒဏ်ရာအပြင်းအထန် ရရှိထားသည့် ကိုရင်လေးသည် လက်ရှိတွင် နမ့်ခမ်းဆေးရုံ၌ ဆေးကုသမှု ခံယူလျက်ရှိပြီး ဆေးကုသစရိတ် အကူအညီ လိုအပ်နေသည်ဟုလည်း သတင်းရင်းမြစ်က ပြောသည်။
ပြီးခဲ့သည့် ဖေဖော်ဝါရီ ၃ ရက်တွင်လည်း နမ့်ဖတ်ကာတွင် ကလေးတစ်ဦး ဗုံးတစ်လုံး ကောက်ယူ ဆော့ကစားမိရာမှ ပေါက်ကွဲမှုဖြစ်ပွားခဲ့ပြီး ကလေးတစ်ဦး သေဆုံးကာ ၆ ဦးအထိ ဒဏ်ရာရရှိခဲ့သည်။
နမ့်ဖက်ကာသည် ကချင်လွတ်လပ်ရေးတပ်မတော် – KIO/KIA က စစ်ကောင်စီအား တိုက်ထုတ်ကာ ထိန်းချုပ်ထားသည့် နေရာဖြစ်သည်။
#MeKongNews
#ကွတ်ခိုင်
#မိုင်းဗုံး
#ဆော့ကစား
#ပေါက်ကွဲမှု
#ကိုရင်လေး
