မဲခေါင်၊ ဇန်နဝါရီ ၃၁
ရှမ်းပြည်မြောက်ပိုင်း၊ မူဆယ်မြို့တွင် အိမ်ထောင်စုစာရင်းအတု၊ နယ်စပ်ဖြတ်သန်းခွင့် စာအုပ်နီအတုနှင့် ယာယီဖြတ်သန်းခွင့်လက်မှတ်အတုများကို ပြုလုပ်ပေးမည်ဟုဆိုကာ ငွေလိမ်လည်နေသူ အမျိုးသမီးတစ်ဦးကို ဖမ်းဆီးရမိကြောင်း ဒေသခံများထံမှ သိရသည်။
ဖမ်းဆီးရမိသူမှာ မူဆယ်မြို့၊ ဟိုမွန်ရပ်ကွက်တွင် နေထိုင်သည့် မခမ်းလွန်း ဖြစ်ပြီး၊ ဇန်နဝါရီ ၂၇ ရက်က တရုတ်-မြန်မာနယ်စပ်တွင် အထောက်အထားအတုများဖြင့် ဖြတ်ကျော်စဉ် ဖမ်းဆီးရမိသူ ၃ ဦး၏ ထွက်ဆိုချက်အရ ၎င်းကို ဖမ်းဆီးရမိခြင်းဖြစ်ကြောင်း ဒေသခံများက ပြောသည်။
ဖမ်းဆီးခံရသူ ၃ ဦး၏ အစစ်ခံချက်အရ ၎င်းတို့အနက် ၂ ဦးမှာ မခမ်းလွန်းထံတွင် စာအုပ်နီပြုလုပ်ခအဖြစ် တစ်ဦးလျှင် ယွမ် ၁၂,၀၀၀ စီ ပေးခဲ့ရပြီး ကျန်တစ်ဦးမှာ ငွေကျပ်သိန်း ၁၆၀ ပေးခဲ့ရကြောင်း ဟိုမွန်ရပ်ကွက်နေ ဒေသခံအမျိုးသမီးတစ်ဦးက ပြောသည်။
“သူက တစ်ယောက်ကို ယွမ် ၂၀၀၀၀ လောက်အထိ ယူပြီး လုပ်စားနေတာ။ အမှန်အကန် မဟုတ်ဘဲ အတုတွေ လုပ်ပေးပြီး လိမ်စားတာ။ တချို့ကိုကျတော့ ဘာမှလုပ်မပေးဘဲ ငွေသိန်းရာချီ လိမ်ယူသွားတာတွေလည်း ရှိတယ်။ လိမ်ခံရတဲ့သူတွေ အများကြီးပဲ” ဟု ၎င်းကပြောသည်။
အခြားဒေသခံတစ်ဦးကမူ မခမ်းလွန်းအနေဖြင့် ဌာနဆိုင်ရာအတွင်းလူများ သို့မဟုတ် စာရွက်စာတမ်းအတု ပြုလုပ်ပေးသည့် အဖွဲ့အစည်းများနှင့် ချိတ်ဆက်မှုမရှိဘဲ ယခုကဲ့သို့ လုပ်ဆောင်နိုင်ရန် ခဲယဉ်းကြောင်း သုံးသပ်သည်။
“တကယ်စစ်ရင် နောက်ကွယ်ကလူတွေ ပေါ်လာလိမ့်မယ်။ အခုကတော့ အမှုကို သူ့တစ်ယောက်တည်းအပေါ်ပဲ ပုံချထားတဲ့သဘော ရှိနေတယ်” ဟု ၎င်းကဆိုသည်။
မခမ်းလွန်းသည် လွန်ခဲ့သည့် ၂ နှစ်ခန့်ကတည်းက ဆင်ဖြူပေါက်နှင့် အလယ်ပေါက် နယ်စပ်ဂိတ်များတွင် ရပ်ဝေးမှလာသူများကို ယာယီနယ်စပ်ဖြတ်ကျော်ခွင့် (တစ်ပတ်ကတ်) နေ့ချင်းရအောင် လုပ်ပေးမည်ဟုဆိုကာ ငွေကျပ်သိန်းဆယ်ချီ လိမ်လည်နေသူဖြစ်ပြီး ယခုမှသာ ဖမ်းဆီးရမိခြင်းဖြစ်သည်။
ယင်းစာရွက်စာတမ်းအတု ပြုလုပ်မှုဖြင့် မခမ်းလွန်းကို အမှုဖွင့်ဖမ်းဆီးထားသည့် သတင်းကို တရုတ်နယ်စပ်မြို့ဖြစ်သည့် ရွှေလီဘက်တွင်လည်း အများပြည်သူ သိရှိစေရန် ကြေညာထားကြောင်း သိရသည်။
#MeKongNews
#မူဆယ်
#စာအုပ်အနီ
#မခမ်းလွန်း
#အိမ်ထောင်စုစာရင်း
#အတုပြုလုပ်မှု
