မဲခေါင်၊ ဇန်ဝါရီ ၂၉
ယူကရိန်းစစ်ထောင်လှမ်းရေးအဖွဲ့ SBU က ရုရှားနိုင်ငံအတွင်းပိုင်း လေယာဉ်ကွင်း ၅ ခုတွင် ရပ်နားထားသည့် ရုရှားမဟာဗျူဟာ လေယာဉ်ပေါင်း ၁၅ စီးကို တာဝေးဒရုန်းများဖြင့် တိုက်ခိုက်ဖျက်ဆီးနိုင်ခဲ့သည့် ရုပ်သံမှတ်တမ်းအား ထုတ်ပြန်လာခဲ့သည်။
တည်နေရာဖော်ပြခြင်းမရှိသည့် လေယာဉ်ကွင်း ၅ ကွင်းရှိ မီးလောင်ပျက်စီးသွားရသော လေယာဉ်များထဲတွင် Sukhoi နှင့် MiG ဖိုက်တာဂျက်လေယာဉ် ၁၁ စီး၊ ရဟတ်ယာဉ် ၃ စီးနှင့် Antonov An-26 ကုန်တင်လေယာဉ်တစ်စီးတို့ပါဝင်ခဲ့ကာ ပြေးလမ်းများပေါ်တွင် မီးတောက်လောင်ပျက်စီးနေသည့် ရုပ်သံများလည်း ထုတ်ပြန်ကာ ထိုပျက်စီးဆုံးရှုံးမှုတန်ကြေးသည် ပေါင် တစ်ဘီလီယံ ရှိသဖြင့် ပူတင် အတွက် ဒေါသူပုန်ထစရာ ဖြစ်ခဲ့ရသည်။
ယူကရိန်းလုံခြုံရေးဝန်ဆောင်မှုအဖွဲ့က အဆိုပါတိုက်ခိုက်မှုများကို အထူး Alpha တပ်က စီစဉ် တိုက်ခိုက်ခြင်းဖြစ်သည်ဟုဆိုပြီး ယူကရိန်းမြေပေါ် အဓိက ဗုံးကြဲတိုက်ခိုက်နေသည့် Su-30SM၊ Su-27 ၊ Su-24 နှင့် Su-34 ဂျက်လေယာဉ်များလည်း ပျက်စီးခဲ့သည်ဟု ဆိုသည်။
ထို့အပြင် ရုရှား၏ အသံထက်မြန်သော Kinzhal ဒုံးကျည်ကြီးများ ပစ်ခတ်ရန်နှင့် ရုရှားလေကြောင်းရန် ကာကွယ်မှု အတွက် အရေးပါသည့် MiG-31 ကြားဖြတ်တိုက်ခိုက်ရေး လေယာဉ်လည်း ထိခိုက်ပျက်စီးမှုရှိခဲ့သည်။ နောက်ထပ်ပျက်စီးထိခိုက်သည့် ရဟတ်ယာဉ် ၃ စီးမှာ Mi-8၊ Mi-26 နှင့် Mi-28 တို့ဖြစ်သည်။
ထုတ်ပြန်ချက်တွင် မနှစ်ကတစ်နှစ်တည်း ရုရှားနိုင်ငံတွင်းလေယာဉ်ကွင်း ၅ ကွင်းမှ လေယာဉ်ပေါင်း ၁၅ စီးကို တာဝေးဒရုန်းများဖြင့် ပစ်ခတ်ဖောက်ခွဲနိုင်ခဲ့သည်ဟုလည်း ရေးသားဖော်ပြခဲ့သည်။
ယခုလဆန်းပိုင်းကလည်း ယူကရိန်းအထူးတပ်ဖွဲ့ Alpha သည် ဒေါ်လာ ၄ ဘီလီယံ တန်ကြေးရှိသော ရုရှားလေကြောင်းရန် ကာကွယ်ရေးစနစ်ကြီးကို ဖျက်ဆီး သို့မဟုတ် သုံးမရတော့သည်အထိ တာဝေး ဒရုန်းများဖြင့် ပစ်ခတ်တိုက်ခိုက်ခဲ့သေးကာ S-300၊ S-350 နှင့် S-400 ဒုံးခွင်းဒုံးများ ပစ်လွှတ်ရာ လောင်ချာများနှင့် ရေဒါစနစ်များကိုလည်း ပစ်ခတ် ဖျက်ဆီးနိုင်ခဲ့သည်။
ယူကရိန်း- ရုရှားစစ်ပွဲသည် ယခုအချိန်တွင် သေဆုံးသူပေါင်း ၂ သန်းဝန်းကျင်ရှိလာခဲ့ပြီဖြစ်ရာ ဒုတိယ ကမ္ဘာစစ်နောက်ပိုင်း သေဆုံးမှုအများဆုံး စစ်ပွဲဖြစ်လာသောကြောင့် ယူကရိန်းသမ္မတ ဇီလန်းစကီးက ငြိမ်းချမ်းရေးဆွေးနွေးအဖြေရှာသွားရန် ပူတင်နှင့် မျက်နှာချင်းဆိုင် တွေ့ဆုံရန်အသင့်ဟုလည်း ပထမဆုံးအကြိမ် ဖွင့်ပြောလာသည်။
ပြီးခဲ့သည့် တစ်ပတ်က ဒူဘိုင်းတွင် ယူကရိန်း၊ ရုရှားနှင့် အမေရိကန် ကိုယ်စားလှယ်များ ငြိမ်းချမ်းရေးသဘောတူညီချက်ရရေး ဆွေးနွေးခဲ့ရာ မျှော်လင့်သည် ထက်ပိုမိုကောင်းမွန်သော အဆင့် ဆွေးနွေးနိုင်ခဲ့သည်ဟု အမေရိကန် ကိုယ်စားလှယ်များဘက်က ထုတ်ပြန်ထားသည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#ဒရုန်း
#ဗုံးကြဲလေယာဉ်
