မဲခေါင်၊ ဇန်နဝါရီ ၂၇
ယမန်နှစ်ကုန်ပိုင်းက ထိုင်းနိုင်ငံ၊ ပတ္တရားမြို့လမ်းပေါ် အမြန်မောင်းနေသည့် ပစ်ကပ်ကား နောက်ခန်းတွင် ဝတ်လစ်စားလစ်ဖြင့် လိင်ဆက်ဆံသည့် ဗီဒီယိုရိုက်ကူးသော ရုရှားဘလော့ဂါ ဂျော်ဂျီယာဒီဇူကိုအက်ဗ်ကို ထိုင်းအာဏာပိုင်များက ထောင်ဒဏ် ၅ နှစ်ချမှတ်လိုက်သည်ဟု သတင်းများ ထွက်ပေါ်လာကာ ထိုထောင်ဒဏ်တွင် ထိုင်းထောင်အတွင်း တစ်နှစ်သာ နေရပြီးနောက် ရုရှားသို့ ပြန်ပို့ပြီး ထိုင်းနိုင်ငံသို့ နောက်တစ်ကြိမ် ၉၉ နှစ်ကြာ ဝင်ခွင့်ပိတ်သည့် ပြစ်ဒဏ် ချထားကြောင်း သိရသည်။
အသက် ၂၃ နှစ်သာရှိသေးသော ဂျော်ဂျီယာသည် ဘားဆိုင်မှ ၄၂ နှစ်အရွယ် ထိုင်းအမျိုးသမီးအား စတာလင်ပေါင် ၂၃ ပေါင်နှင့် ညီမျှသည့် ဘတ် ၁၀၀၀ ပေးကာ ဗီဒီယိုကို ၎င်း၏ အင်စတာဂရမ်၊ ယူကျုချန်နယ်များ တွင် တင်မည်ဟု စည်းရုံးကာ လမ်းပေါ် လူမြင်မကောင်းအောင် လိင်ဆက်ဆံနေသည်ကို နောက်ကားတစ်စီးဖြင့် ကပ်လိုက်ကာ ဗီဒီယိုရိုက်ခဲ့ခြင်း ဖြစ်သည်။
ထိုဖြစ်စဉ်အား ရပ်ကွက်နေသူများက ဒေါသပေါက်ကွဲပြီး တိုင်ကြားခြင်းကြောင့် ရဲတပ်ဖွဲ့က ချက်ချင်း လိုက်ဖမ်းရာ သု၀ဏ္ဏဘူမိလေဆိပ်မှ ထွက်ပြေးရန် စီစဉ်နေသည့် ဂျော်ဂျီယာကို ယင်းနေ့မှာပင် ဖမ်းဆီးနိုင်ခဲ့ခြင်း ဖြစ်သည်။
၎င်းကို ကွန်ပျူတာအက်ဥပဒေဖြင့် ထောင်ဒဏ် ၅ နှစ်ချမှတ်ထားရာတွင် ထိုင်းထောင်အတွင်း တစ်နှစ်နေစေပြီးမှ ရုရှားပြန်ပို့ကာ ထိုင်းသို့ တစ်သက်တစ်ကျွန်း ပြန်မဝင်စေရန် အမိန့်ချထားသည်ဟု သတင်းများ ပေါ်ထွက်လာသည်။
ထိုအမှုတွင် ကင်မရာမင်းကိုလည်း ထောင်ဒဏ်တစ်နှစ်နှင့် ပြည်နှင်ဒဏ်ပေးသလို ရိုက်ကူးခံသည့် ထိုင်းအမျိုးသမီးကိုလည်း ထောင်ဒဏ် ၁၀ လချမှတ်ခဲ့သည်ဟု သိရသည်။
ထိုအမျိုးသမီးက ဂျော်ဂျီယာ၏ ကမ်းလှမ်းမှုကို ကနဦး ငြင်းဆန်သော်လည်း ကြောက်စရာကောင်းသူဖြစ်ပြီး အမျိုးသမီးများအား အရှက်ခွဲခြင်း၊ ညစ်ညမ်းဗီဒီယိုများ ရိုက်ခြင်းနှင့် ဖိအားပေး ခြိမ်းခြောက်သဖြင့်သာ ဘတ် ၁၀၀၀ တည်းဖြင့် ရိုက်ကူးရန် သဘောတူပေးခဲ့ရသည်ဟု ထွက်ဆိုခဲ့သည်။
သို့ရာတွင် သေချာကြည့်လျှင် မိမိသည် အတွင်းခံဝတ်ထားပြီး ဗီဒီယိုတွင် လိင်ဆက်ဆံနေသယောင် ဟန်ဆောင် ရိုက်ကူးခြင်းသာဖြစ်ကာ တကယ်တမ်း လိင်ဆက်ဆံခြင်း မပြုခဲ့ဟု ဂျော်ဂျီယာကမူ ငြင်းဆိုထားသည်။
ကိုကလင်း
Ref: Thesun
#MeKongNews
#ပတ္တရား
#လိင်ဆက်ဆံ
#ဗီဒီယိုရိုက်သူ
#ထောင်ဒဏ်
