မဲခေါင်၊ ဇန်နဝါရီ ၂၇
ယခုလအစောပိုင်း ဆန္ဒပြပွဲများတွင် ယခင်က မကြုံဖူးသော နှိမ်နင်းမှုများ ရှိခဲ့ပြီးနောက် ဆေးရုံတစ်ခုတွင် အလောင်းများထပ်နေပြီး အဆောက်အဦးများပေါ်တွင် စနိုက်ပါများကို ချထားကာ စီစီတီဗီကင်မရာများအား ဆန္ဒပြ သူများက ဖျက်ဆီးနေပုံများ အီရန်မှ ထပ်မံထွက်လာပြီးနောက် တိုက်ဆိုင်စိစစ်ထားသော ဗီဒီယိုများတွင် မြင်တွေ့ရသည်။
အီရန်မှ ယခုနောက်ဆုံးပေါ်ထွက်လာသော ဗီဒီယိုများကို ဆန္ဒပြပွဲများ အရှိန်ရနေခဲ့သော ဇန်နဝါရီ ၈ ရက်နှင့် ၉ ရက်က ရိုက်ကူးခဲ့ထားသည်ဟု နားလည်ရသည်။
ထိုရက်များမှာ ဆန္ဒပြသူ အများဆုံး သေဆုံးခဲ့သော နေ့များဖြစ်သည်ဟု ယူဆရပြီး အီရန် လုံခြုံရေးတပ်ဖွဲ့များက ဆန္ဒပြသူများအား အကြမ်းဖက် နှိမ်နင်းခဲ့သည်ကို ဗီဒီယိုများတွင် မြင်တွေ့ရသည်။
တီဟီရန်မြို့အရှေ့ပိုင်းမှ တီဟီရန်ပါးစ် ဆေးရုံတွင် အလောင်းများ ထပ်နေသည်ကို ဗီဒီယိုရိုက်ချက် အများအပြားတွင် မြင်တွေ့ရပြီး ရေတွက်ခဲ့ရာ၌ အနည်းဆုံး ရုပ်အလောင်း ၃၁ လောင်းရှိသည်ဟု ၎င်းဗီဒီယိုများကို တိုက်ဆိုင်စစ်ဆေးခဲ့သည့် BBC Verify က ဖော်ပြသည်။
ဆေးရုံဝင်ပေါက် ပြင်ပတွင် ရုပ်အလောင်း ၇ ခုကို အိတ်များဖြင့် ထည့်ထားသည်ကို အခြားဗီဒီယိုတစ်ခုတွင် မြင်တွေ့ရသည်။
တီဟီရန်အနောက်ပိုင်း အဝေးပြေးလမ်းမတစ်ခုပေါ် ရာနှင့်ချီသော လူများဆန္ဒပြနေကြစဉ် သေနတ်သံများ ပေါ် ထွက်လာကာ လူသံများ အော်ဟစ် ဆူညံသွားသည်ကိုလည်း တွေ့ရသည်။
အရှေ့တောင်ပိုင်း ကာမန်းမြို့တွင် အဆောက်အဦးတစ်ခုပေါ်မှ ရိုက်ကူးထားသော ဗီဒီယိုတစ်ခု၌ စစ်ယူနီဖောင်း ဝတ်ထားသူ အများအပြားက သေနတ်များ ဆက်တိုက်ပစ်ခတ်ကာ လမ်းတစ်ခုပေါ် လျှောက်သွားနေသည်ကို မြင်တွေ့ရပြီး ၎င်းတို့ ဦးတည် ပစ်ခတ်နေသူများကိုမူ မမြင်ရပေ။
အရှေ့မြောက်ပိုင်း မာရှက်မြို့တွင် အနက်ရောင်ဝတ်စုံဖြင့် စနိုက်ပါနှစ်ဦးက အဆောက်အဦးတစ်ခု ခေါင်မိုးပေါ်၌ နေ့ခင်းကြောင်တောင်မှာပင် ရှိနေပြီး တစ်ဦးက မှောက်လျက် ဆေးလိပ်သောက်နေပြီး တစ်ဦးက ရိုင်ဖယ်ကို ထောင်ထားကာ ဖုန်းပြောနေသည်ကို တွေ့ရသည်။
ဒီဇင်ဘာနှောင်းပိုင်းတွင် အီရန် မငြိမ်မသက်မှုများ စတင်ခဲ့ပြီးနောက်ပိုင်း ဆန္ဒပြသူ ၅၆၃၃ ဦး အပါအဝင် လူပေါင်း ၆၀၀၀ နီးပါး သေဆုံးခဲ့ကြောင်း အမေရိကန်အခြေစိုက် လူ့အခွင့်အရေး တက်ကြွသူများသတင်းဌာန – HRANA က ပြောသည်။
လူပေါင်း ၁၇၀၀၀ သေဆုံးခဲ့သည်ဆိုသော သတင်းများကိုလည်း ထပ်မံ စုံစမ်းစစ်ဆေးနေသည်ဟု ၎င်းအဖွဲ့က ဆက်ပြောသည်။
လူပေါင်း ၃၁၀၀ ကျော် သေဆုံးခဲ့သည်ဟု အီရန်အာဏာပိုင်များက ပြီးခဲ့သည့် သီတင်းပတ်အတွင်း ပြောကြားပြီး သေဆုံးသူအများစုမှာ လုံခြုံရေးတပ်ဖွဲ့များနှင့် အဓိကရုဏ်း ဖန်တီးသူများ တိုက်ခိုက်ခဲ့သည့် ရပ်ကြည့်နေသူများ ဖြစ်သည်ဟုလည်း ဆိုသည်။
အေးကျော်
Ref:BBC
#MeKongNews
#ဆေးရုံ
#အလောင်း
#စနိုက်ပါ
#အီရန်
