မဲခေါင်၊ ဇန်နဝါရီ ၁၇

ရှမ်းပြည်တောင်ပိုင်း၊ လွိုင်လင်နှင့် နမ့်စန်မြို့ကြားတွင် ခရီးသည်တင်ယာဉ်တစ်စီး ချောက်ထဲကျပြီး ယာဥ်ပေါ်ပါ ၁၁ ဦးထဲမှ အမျိုးသားတစ်ဦး သေဆုံးကာ ၉ ဦး ထိခိုက်ဒဏ်ရာ ရခဲ့ကြောင်း မီးသတ်တပ်ဖွဲ့ ထုတ်ပြန်ချက်အရ သိရသည်။

ယနေ့ ဇန်နဝါရီ ၁၇ ရက် နံနက်ပိုင်းတွင် ယင်းမတော်တဆမှု ဖြစ်ပွားခဲ့ပြီး လွိုင်လင်ခရိုင် မီးသတ်စခန်းမှ ယာဥ်တစ်စီး၊ နမ့်စန် ကြက်ခြေနီအသင်းနှင့် တောင်တန်းလူငယ်ပရဟိတမှ ယာဥ်တစ်စီးတို့ လာရောက် ကူညီခဲ့ကြောင်း ထုတ်ပြန်ချက်တွင် ပြောသည်။

“အခုကားက အရှိန်လွန်ပြီး ချောက်ထဲကျသွားတာ။ အဲ့နား အတက်အဆင်းကြီးပြီး အကွေ့များတယ်။ ကားဆရာတွေ အထူးဂရုစိုက်ဖို့ လိုအပ်ပါတယ်”ဟု လွိုင်လင် ဒေသခံတစ်ဦးက မဲခေါင်သို့ ပြောသည်။

ဖြစ်စဉ်မှ သေဆုံးသူနှင့် ဒဏ်ရာသူများကို ကယ်ဆယ်ရေးအဖွဲ့က လာရောက်ကူညီပြီး‌ လွိုင်လင်ခရိုင် ဆေးရုံကြီးသို့ ပို့ဆောင်ပေးခဲ့ကြောင်း သိရသည်။

ပြီးခဲ့သည့် ဇန်နဝါရီ ၁၀ ရက်တွင်လည်း ပင်လုံမြို့၊ စိုက်ပျိုးရေးကုန်းအနီးတွင် ကားနှင့် ဆိုင်ကယ်တိုက်မိပြီး အသက် ၆၀ ကျော် အမျိုးသားတစ်ဦး သေဆုံးသွားခဲ့သေးကြောင်း ဒေသခံများထံမှ သိရသည်။

#MeKongNews
#လွိုင်လင်
#နမ့်စန်
#ခရီးသည်တင်ယာဉ်
#ချောက်ထဲကျ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)