မဲခေါင်၊ ဇန်နဝါရီ ၁၄
ယူကရိန်း စစ်မြေပြင်တစ်ခု၌ အလွန်ရက်စက်သည့် ရုရှားစစ်တပ်၏ လုပ်ရပ်အဖြစ် အာဖရိက ကြေးစားစစ်သား တစ်ဦး၏ ရင်ဘတ်တွင် ပေါက်ကွဲအားပြင်းသော TM – 62 တင့်ဖျက်မိုင်း ကပ်ချည်ပြီး ယူကရိန်း ဘန်ကာများထဲ ပြေးဝင် ဖောက်ခွဲခိုင်းသည ့်ရုပ်သံ ထွက်ပေါ်လာခဲ့သည်။
ပူတင်သည် အာဖရိကမှ စစ်သားများကို စုဆောင်းကာ ယူကရိန်း စစ်မြေပြင်တွင် တိုက်ခိုက်ခိုင်းနေသည့် သက်သေများစွာ ရရှိခဲ့ပြီးဖြစ်ရာ ယခု ရုပ်သံတွင် သေနတ်ဖြင့် တေ့ကာ ဆဲဆိုကြိမ်းမောင်းနေသော ရုရှားစစ်သား မေးမြန်းမှု၌ ယင်း အာဖရိက စစ်သားက ၎င်းအမည်ကို ဖရန်ဆစ်ဟု ပြန်ဖြေကြောင်းနှင့် အာဖရိက စစ်သားများကို ရုရှားစစ်သားများက သံဗူး၊ ပုလင်းဖောက်သူများဟု လူမျိုးရေး ခွဲခြားကာ နိုင့်ထက်စီးနင်း ဆက်ဆံကြောင်း မြင်တွေ့ခဲ့ရသည်။
ရှေ့တန်း စစ်မျက်နှာများတွင် ယူကရိန်း ဘန်ကာများကို တိုက်ခိုက်ရာ၌ ယခုလို အာဖရိကစစ်သားများအား တင့်ဖျက်မိုင်းများ ကပ်ချည်ပေးကာ ပြေးဝင် ဖောက်ခွဲစေခိုင်းခြင်းဖြစ်ကြောင်း၊ ဖရန်ဆစ်အားလည်း တောအုပ်ထဲ ပြေးဝင်ခိုင်းမည်ဟု ပြောဆိုမှုလည်း ရုပ်သံတွင် ပါဝင်နေသည်။
ရုရှားစစ်သားများသည် စစ်ရာဇဝတ်မှု များစွာကျူးလွန်နေကာ ယမန်နှစ်ကလည်း ယူကရိန်းစစ်သား၏ ဦးခေါင်းကို ဖြတ်တောက်ပြီး သံချပ်ကာကားတွင် ချိတ်ဆွဲကာ မောင်းနှင်နေသည့် ရုပ်သံတွေ့ရသလို ယူကရိန်းနိုင်ငံသား ၄ သောင်း ကိုလည်း ပြန်ပေးဆွဲ ခေါ်ဆောင်ကာ ချွေးတပ်သားများ အဖြစ် အဓမ္မ ကျွန်ပြု ခိုင်းစေမှုများရှိခဲ့သည်။
ထို့ပြင် ယူကရိန်း ကလေးငယ်များကိုလည်း ရုရှားသို့ ပြန်ပေးဆွဲခေါ်ဆောင်မှု များလုပ်ခဲ့သေးသည်။
ပြီးခဲ့သည့် ဇန်နဝါရီ ၈ ရက်တွင် နျူကလီးယား သယ်ဆောင်နိုင်သော ဒုံးကျည်ဖြင့် ရုရှားက အယ်လ်ဗစ်မြို့သို့ ပစ်ခတ် တိုက်ခိုက်မှုများ လုပ်ခဲ့သည်။
တစ်နာရီ မိုင် ၈ ထောင် နှုန်းသွားနိုင်သည့် တားဆီး ရပ်တန့်မရဟု ဆိုသော အသံထက်မြန်သော ဒုံးကျည်ဖြင့် ပစ်ခတ် တိုက်ခိုက်လာရာ ယူကရိန်းသမ္မတ ဇီလန်းစကီးက ဒေါ်နယ်ထရမ့်နှင့် ကမ္ဘာအင်အားကြီး နိုင်ငံများ ပူတင်၏ စစ်ရာဇဝတ်မှုများ ကျူးလွန်နေမှုအတွက် ရှင်းလင်း ပြတ်သားသည့် တုံ့ပြန်မှု လိုအပ်နေပြီ ဖြစ်ကြောင်း တိုက်တွန်းခဲ့သည်။
ကိုကလင်း
Ref: Thesun
#MeKongNews
#အာဖရိက
#ကြေးစားစစ်သား
#အသေခံ
#ရုရှား
