မဲခေါင်၊ ဇန်နဝါရီ ၁၃

ကျား/မ တန်းတူညီမျှရေး မူဝါဒ၏ အစိတ်အပိုင်းတစ်ခု အဖြစ် ထိုင်းအမျိုးသမီးများ အနေဖြင့် သက်ဆိုင်သူအားလုံး သဘောတူလျှင် ခင်ပွန်း ၄ ဦးအထိ ယူခွင့်ပြုမည့် မူဝါဒကို ထိုင်းဝန်ကြီးချုပ်လောင်းတစ်ဦးက မဲဆွယ် စည်းရုံးလိုက်ရာ အများပြည်သူအကြား ပွဲဆူသွားခဲ့သည်။

ကျား/မ တန်းတူညီမျှရေးနှင့် ပတ်သက်၍ ထူးခြားဆန်းသစ်သည့် မူဝါဒကို ထိုင်း Thai Alternative ပါတီ၏ ဝန်ကြီးချုပ်လောင်းဖြစ်သူ မွန်ကိုလ်ကစ် ဆွတ်ဆင်သရန်နွန့်က် ၎င်း၏ လူမှုကွန်ရက် စာမျက်နှာမှ တစ်ဆင့် မကြာသေးမီက ထုတ်ဖော် ပြောဆိုခဲ့ခြင်း ဖြစ်သည်။

၎င်း၏ အဆိုတွင် ကျား/မ တန်းတူညီမျှမှု ရှိစေရန် အကယ်၍ အပြန်အလှန် သဘောတူပါက အမျိုးသမီးတစ်ဦး အနေဖြင့် ခင်ပွန်း ၄ ဦးအထိ တရားဝင် လက်ထပ်ခွင့် ရှိသင့်ကြောင်း ဖော်ပြထားသည်။

ယင်းရေးသားချက်မှာ လူမှုကွန်ရက် အသုံးပြုသူများအကြား အလျင်အမြန် ပျံ့နှံ့ခဲ့ပြီး ကျယ်ကျယ်ပြန့်ပြန့် ဝေဖန် ဆွေးနွေးမှုများကို ဖြစ်ပေါ်စေခဲ့သည်။

၎င်းအဆိုသည် တိုးတက်သော အတွေးအခေါ်ကို ဖော်ပြခြင်းလား၊ နိုင်ငံရေးအရ သရော်လိုခြင်းလား၊ သို့မဟုတ် အငြင်းပွားဖွယ် ကိစ္စတစ်ခုကို တမင်ဖန်တီးလိုခြင်းလား ဆိုသည်ကို ရှုထောင့် အမျိုးမျိုးမှ ဝေဖန် သုံးသပ်နေ ကြသည်။

ယခုအဆိုသည် မွန်ကိုလ်ကစ်၏ မူဝါဒရေးရာ စိတ်ကူးဆန်းများထဲမှ အသစ် ထွက်ပေါ်လာသည့် အချက်ဖြစ်သည်။

၎င်းသည် အစဉ်အလာနိုင်ငံရေး မူဝါဒများထက် လူအများ အာရုံစိုက်စေမည့် ပြောဆိုချက်များဖြင့် မိမိကိုယ်ကို လူသိများအောင် တည်ဆောက်ထားသူလည်း ဖြစ်သည်။

၎င်းသည် ယခင်ကလည်း ထိုင်းနိုင်ငံအတွက် အာကာသတပ်ဖွဲ့ ဖွဲ့စည်းရန်၊ မွေးဖွားနှုန်း ကျဆင်းမှုကို မြှင့်တင်ရေး ကိုယ်ဝန်ဆောင် အမျိုးသမီးများကို ငွေကြေးထောက်ပံ့ရန်၊ လုပ်ငန်းခွင်ဝင်အရွယ် နိုင်ငံသားများ အနေဖြင့် လစာတိုးလိုပါက နေ့စဉ် ကာယ လေ့ကျင့်ခန်းလုပ်ရန်နှင့် နျူကလီးယားလက်နက် ပိုင်ဆိုင်ရေးအထိ စစ်အင်အား တောင့်တင်းစေရေး စသည့် အငြင်းပွားဖွယ် အဆိုများကို ထုတ်ဖော်ခဲ့ဖူးသည်။

ခင်ပွန်းအများအပြား ယူခွင့်မူဝါဒကို ဥပဒေကြောင်းအရနှင့် လူမှုရေး ရှုထောင့်အရ မည်သို့ လက်တွေ့ အကောင် အထည်ဖော်မည် ဆိုသည်ကို ၎င်းက ရှင်းလင်း ပြောကြားထားခြင်း မရှိသေးသော်လည်း ယင်းပြောဆိုမှုမှာ ထိုင်းနိုင်ငံ၏ အိမ်ထောင်ရေးဥပဒေ၊ ကျား/မ အခွင့်အရေးများနှင့် နိုင်ငံရေး သတင်းစကားများ၏ အခန်းကဏ္ဍတို့နှင့် ပတ်သက်၍ လူထုအတွင်း ကျယ်ကျယ်ပြန့်ပြန့် ဆွေးနွေး ငြင်းခုံမှုများကို လှုံ့ဆော်ပေးခဲ့ပြီး ဖြစ်သည်။

Ref: Khaosod English
#MeKongNews
#ထိုင်းအမျိုးသမီး
#ယောင်္ကျား
#ဝန်ကြီးချုပ်လောင်း
#မဲဆွယ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)