မဲခေါင်၊ ဇန်နဝါရီ ၁၁
ယမန်နေ့ ညပိုင်းတွင် ယူကရိန်း၏ ဒရုန်းတိုက်ခိုက်မှုများကြောင့် ရုရှားတောင်ပိုင်း၊ ဗိုရိုနက်မြို့တွင် လူ ၄ ဦးသေဆုံးခဲ့ကာ အဆောက်အဦး အများအပြား ပျက်စီးသွားခဲ့ကြောင်း ဗိုရိုနက်ဒေသ အုပ်ချုပ်ရေးမှူးက ယနေ့ ပြောသည်။
ယူကရိန်း တိုက်ခိုက်မှုအတွင်း အရေးပေါ်ဌာနတစ်ခု၊ တိုက်ခန်းတွဲ ၇ ခုနှင့် နေအိမ် ၆ လုံး ပျက်စီးသွားခဲ့ကြောင်း အုပ်ချုပ်ရေးမှူး အလက်ဇန်ဒါဂူဆက်ဗ်က တယ်လီဂရမ် လူမှုကွန်ရက်တွင် ပြောကြားသည်။
ထိုအတောအတွင်းမှာပင် ယူကရိန်းဒရုန်း တိုက်ခိုက်မှုကြောင့် ရုရှားတောင်ပိုင်း ဗိုလ်ဂိုဂရက်ဒေသမှ ရေနံလုပ်ငန်း နေရာတစ်ခုတွင် မီးလောင်ကျွမ်းခဲ့ကြောင်း ဒေသဆိုင်ရာ အာဏာပိုင်များက ယမန်နေ့တွင် ပြောကြားကြသည်။
လောလောဆယ်တွင် ထိခိုက်ဒဏ်ရာရသတင်း မကြားရသေးကြောင်း ပြည်နယ်အုပ်ချုပ်ရေးမှူး အန်ဒရေးဘိုချာရော့ဗ်၏ တယ်လီဂရမ်မှ ပြောကြားမှုအား ဒေသခံ ရုပ်သံလိုင်းတစ်ခုက ကိုးကား ဖော်ပြခဲ့သည်။
ယင်းပျက်စီးမှု အတိုင်းအတာကို အုပ်ချုပ်ရေးမှူးက မပြောခဲ့သော်လည်း မီးလောင်မှုကြောင့် အနီးဝန်းကျင်တွင် နေထိုင်သူများကို ရွှေ့ပြောင်းပေးခဲ့ရဖွယ် ရှိသည်ဟု ပြောသည်။
ရုရှား၏ စွမ်းအင်လုပ်ငန်း နေရာများအပေါ် တာဝေးပျံ ဒရုန်းများဖြင့် တိုက်ခိုက်ခြင်းဖြင့် ၎င်းတို့ နိုင်ငံအပေါ် အပြည့်အဝ ကျူးကျော်နေသည့် ရုရှား၏ ရေနံနှင့် စွမ်းအင်လုပ်ငန်းမှ ရရှိသောဝင်ငွေများ လျော့ကျသွားစေရန် ယူကရိန်းက ရည်ရွယ်သည်။
ရုရှားကလည်း ယူကရိန်း၏ လျှပ်စစ်ဓာတ်အားပေး ကွန်ရက်ကို ချည့်နဲ့သွားအောင် လုပ်ပြီး အရပ်သား များအတွက် အပူပေးစနစ်၊ လျှပ်စစ်မီးနှင့် ရေပိုက်များ ပြတ်တောက်သွားစေရန် ကြံစည် လုပ်ဆောင်နေ သည်။
ထိုသို့လုပ်ဆောင်ခြင်းဖြင့် အလွန်အေးသော ဆောင်းရာသီကို ရုရှားက လက်နက်အဖြစ် အသုံးချနေခြင်း ဖြစ်ကြောင်း ယူကရိန်း အရာရှိများက ပြောကြားကြသည်။
သောကြာနေ့တွင် ညပိုင်းအထိ ရာနှင့်ချီသော ဒရုန်းများ၊ ဒါဇင်နှင့် ချီသော ဒုံးကျည်များအပြင် အသံထက်မြန် အိုရက်ရှ်နစ် ဒုံးကျည်တစ်စင်းဖြင့်ပါ ရုရှားက ယူကရိန်းကို တိုက်ခိုက်ခဲ့ပြီး မြို့တော်ကိဗ်တွင် အနည်းဆုံး လူ ၄ ဦး သေဆုံးခဲ့သည်။
သောကြာနေ့ ညပိုင်းအထိ ယူကရိန်း၏ စွမ်းအင်အဆောက်အဦများ၊ လောင်စာ သိုလှောင်ရာ နေရာများကို လေကြောင်း၊ ဒရုန်းများ၊ ဒုံးကျည်များ၊ လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း ရုရှား ကာကွယ်ရေးဝန်ကြီးဌာနက ပြောကြားခဲ့ပြီး ပစ်မှတ်များနှင့် ပျက်စီးမှုများကို သီးခြားမပြောခဲ့ပေ။
နိုင်ငံတော် လျှပ်စစ်ဓာတ်အားပေးဌာန၏ ညွှန်ကြားချက်ကြောင့် ပြုပြင်မှုများ လုပ်ဆောင်ရန် မြို့တော်ကိဗ် လျှပ်စစ်ဓာတ်အား ကွန်ရက်ကို ပိတ်ထားသည်ဟု မြို့တော် အုပ်ချုပ်ရေးအဖွဲ့က စနေနေ့တွင် ပြောသည်။
အေးကျော်
Ref: AP/ Reuters
#MeKongNews
#ယူကရိန်း
#ရေနံလုပ်ငန်း
#မီးလောင်
