မဲခေါင်၊ ဒီဇင်ဘာ ၂၄

ရှမ်းပြည်တောင်ပိုင်း၊ ပင်လောင်းမြို့နယ်တွင် ယခု တစ်ပတ်အတွင်း ဆိုင်ကယ်လုယက်မှု ၂ ကြိမ် ဖြစ်ပွားခဲ့ကြောင်း ဒေသခံများထံမှ သိရသည်။

ပြီးခဲ့သည့် ဒီဇင်ဘာ ၂၂ ရက်တွင် တီကျစ်မြို့၊ သံတဲရွာအနီးတွင် အသက် ၁၆ နှစ်အရွယ် လူငယ်တစ်ဦး ဆိုင်ကယ် လုယက်ခံရကြောင်း ၎င်းနှင့် နီးစပ်သူတစ်ဦးထံမှ သိရသည်။

“လမ်းဘေးမှာ ဆိုင်ကယ်ရပ်ပြီး ဖုန်းပြောနေတာကို လူ ၂ ယောက်က သူ့ကို တို့ဆေးနဲ့ လာတို့ပြီး တွန်းလှဲ လိုက်တယ်။ ဆေးအာနိသင်နဲ့ သူလည်း လမ်းဘေးမှာ တစ်နာရီ‌ကျော် မေ့လဲပြီး ဆိုင်ကယ် လုယူခံခဲ့ရ တယ်။ ဖုန်းတော့ မပါသွားဘူး။ သတိမေ့နေတဲ့အချိန် ဘယ်သူမှလည်း သူ့ကို လာမကြည့်ရဲဘူး၊ လာမထူ ရဲကြဘူး။ သူသတိပြန်ရလာမှ သူမိဘတွေကို အကြောင်းကြားပြီး ပြန်လာခေါ်ခိုင်းခဲ့တယ်”ဟု ၎င်းက မဲခေါင်သို့ ပြောသည်။

အလားတူ ဒီဇင်ဘာ၂၀ ရက်တွင် နောင်တရားမြို့အနီး တကူမို့ရွာနားတွင် ဆိုင်ကယ်လုသူများက လမ်း ပေါ်တွင် ပိုက်ဆံချ ထောင်ချောက်ဆင်ပြီး ဆိုင်ကယ်လုယက်မှု ဖြစ်ခဲ့ကြောင်း ဒေသခံများထံမှ သိရ သည်။

“အကွက်ဆင်ပြီး ခိုးသွားတာပါ။ တရုတ်ဇာတ်ကားထဲက အတိုင်းပဲ။ လမ်းပေါ် ပိုက်ဆံတွေ့တော့ ကောက်ဖို့ ဆင်းနေတုန်း ခြုံထဲကနေ ဆိုင်ကယ်လုသူ ၂ ယောက် ထွက်လာပြီး ပါလာတဲ့ ဖုန်းလည်းလု လူကိုလည်း တွန်းထုတ်ပြီး ဆိုင်ကယ်ကိုလည်း မောင်းပြေးသွားတယ်။ ဘယ်သွားသွား တစ်ယောက်တည်း မသွားပါနဲ့ လမ်းပေါ် ပိုက်ဆံတွေ့ရင်လည်း မကောက်ကြပါနဲ့”ဟု တကူမို့ ရွာခံတစ်ဦးက ‌မဲခေါင်သို့ ပြောသည်။

စစ်ကောင်စီ အာဏာသိမ်းပြီးနောက် ပင်လောင်းမြို့နယ်တွင် မူးယစ်ဆေးဝါး သုံးသူလည်း များလာသလို၊ အွန်လိုင်းဂိမ်း ရှုံးသူများလာခြင်း၏ နောက်ဆက်တွဲကြောင့် သီးနှံခိုးမှု၊ ဓားပြတိုက်မှု၊ လုယက်မှုနှင့် အကြမ်းဖက်မှုတို့ များလာကြောင်း သိရသည်။

#MeKongNews
#ပင်လောင်း
#ဆိုင်ကယ်
#လုယက်မှု
#တီကျစ်မြို့

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)