မဲခေါင်၊ ဒီဇင်ဘာ ၂၁
ငြိမ်းချမ်းရေး ဆွေးနွေးပွဲများတွင် ထိုင်းမပါဝင်မီ ရန်လို တိုက်ခိုက်မှုများကို ကမ္ဘောဒီးယားက အရင်အဆုံးသတ်ရမည် ဖြစ်ကြောင်း ကမ္ဘောဒီးယားနှင့် တိုက်ပွဲတွင် ကျဆုံးသွားသော ထိုင်းစစ်သည်နှစ်ဦးအား နှုတ်ဆက်ပွဲအခမ်း အနားတစ်ခုသို့ တက်ရောက်ပြီးနောက် ထိုင်းဝန်ကြီးချုပ် အနုတင်ချန်ဗီရာကူးလ်က ပြောကြားသည်။
တနင်္လာနေ့တွင် ကွာလာလမ်ပူ၌ ကျင်းပမည့် အာဆီယံ နိုင်ငံခြားရေးဝန်ကြီးများ အစည်းအဝေးတွင် ငြိမ်းချမ်းရေး သန္နိဌာန်တစ်ခု ရှာဖွေကြရန် မလေးရှားဝန်ကြီးချုပ် အန်ဝါအီဘရာဟင်က ယနေ့ နံနက်ဖေ့စ်ဘွတ်ပို့စ်တွင် ပြောကြားပြီးနောက် ထိုင်းဝန်ကြီးချုပ်က အထက်ပါအတိုင်း တုံ့ပြန်လာခြင်းလည်း ဖြစ်သည်။
“အရင် အပစ်အခတ်ရပ်စဲမှုနဲ့ ပူးတွဲ ကြေညာချက်ကို ကျွန်တော်တို့က ချိုးဖောက်ခဲ့တာ မဟုတ်ပါဘူး။ ကျွန်တော်တို့ရဲ့ အိမ်နီးချင်းတွေ ဒါမှမဟုတ် ဘယ်အာဆီယံ အဖွဲ့ဝင်ကိုမှ ကျွန်တော်တို့က ရန်လိုတာ မရှိခဲ့ပါဘူး” ဟု အနုတင်က ပြောသည်။
“တိုက်ခိုက်မှုတွေ ရပ်တန်ဖို့ ဒါမှမဟုတ် အပစ်အခတ်ရပ်စဲမှု ရှိဖို့ဆိုရင် သူတို့က ကျွန်တော်တို့ကို ခြိမ်းခြောက်တာ ကျွန်တော်တို့နိုင်ငံကို တပ်ဖွဲ့တွေနဲ့ ဖြစ်စေ၊ လက်နက်နဲ့ ဖြစ်စေ ၊ မကြာခင်က ဖြစ်ခဲ့သလို ဒရုန်းနဲ့ဖြစ်စေ ကျူးကျော်တာ ရပ်တန့်ရပါမယ်။ အဲဒီထက် ဘာမှ ပိုမလိုချင်ပါဘူး” ဟု အနုတင်က ဆိုပြီး မိမိတို့ဘက်တွင် လူသူဆုံးရှုံးမှု မဖြစ်ချင်သလို အခြားတစ်ဖက်ကိုလည်း မဖြစ်စေချင်ကြောင်း ၎င်းက ဆက်ပြောသည်။
အပစ်အခတ်ရပ်စဲမှု ဆွေးနွေးပွဲများအား ကမ္ဘောဒီးယားအား အသာစီးရစေမည့် အချိန်ဆွဲသည့် နည်းလမ်းတစ်ရပ် အသုံးပြုနိုင်ပါသလားဟု မေးမြန်းရာတွင်လည်း ထိုသို့ ထပ်မဖြစ်စေရေး သေချာစေရန် အစီအစဉ်များ လုပ်ဆောင်နေသည်ဟု ထိုင်းဝန်ကြီးချုပ်က ပြောသည်။
“လောလောဆယ် ကျွန်တော်တို့ ညှနှိုင်းမှု လုပ်မနေပါဘူး။ ကျွန်တော်တို့ ခြိမ်းခြောက်ခံခဲ့ရလို့ ကျွန်တော် တို့ပိုင်နက် အစိတ်အပိုင်းအားလုံးကို ပြန်လည်ရယူဖို့ ဝင်ရောက် လှုပ်ရှားနေပါတယ်” ဟု အနုတင်က ပြောသည်။
ပဋိပက္ခကို ကြားဝင်ဖြေရှင်းရန်တရုတ်နိုင်ငံ ပါဝင်လာသည်ကိုလည်း ၎င်းက ငြင်းဆိုခဲ့ကြောင်း သည်နေရှင်းသတင်းက ဆိုသည်။
တောင်ကုန်းအမှတ် (၃၅၀) တိုက်ပွဲတွင် ကျဆုံးသွားခဲ့သော တပ်ကြပ်ကြီးတစ်ဦး နှင့် ရဲဘော်တစ်ဦးတို့၏ ရုပ်အလောင်းများအား နေရပ်ပြန်ပို့ရန် ဂါဝရပြု နှုတ်ဆက်ပွဲ အခမ်းအနားကို ဆူရင်ပြည်နယ်တွင် အစောပိုင်းက ကျင်းပခဲ့ရာ ဝန်ကြီးချုပ်အနုတင် အပြင် ဒေသခံ အများအပြားလည်း တက်ရောက်ခဲ့ကြသည်။
ကမ္ဘောဒီးယားတပ်ဖွဲ့များ ဝင်ရောက်ခဲ့သော နယ်မြေ အားလုံးနီးပါးကို ထိုင်းတပ်ဖွဲ့များက ပြန်လည် ရယူထားပြီ ဖြစ်ကြောင်းနှင့် ထပ်မံ ကျူးကျော်မှုများ မရှိစေရန် လုံခြုံအောင် လုပ်ဆောင်နေသည်ဟု အနုတင်က ပြောကြားသည်။
စစ်သည် ဆမ်ရောင်နှင့် ပါနူပက်တို့သည် တိုက်ပွဲတွင် ကျဆုံးသော နောက်ဆုံး ထိုင်းစစ်သည်များ ဖြစ်မည်ဟု မျှော်လင့်ကြောင်းလည်း ၎င်းက ဆိုသည်။
အေးကျော်
Ref:The Nation
#MeKongNews
#ငြိမ်းချမ်းရေး
#ရန်လိုမှု
#ကမ္ဘောဒီးယား
#ထိုင်းဝန်ကြီးချုပ်
