မဲခေါင်၊ ဒီဇင်ဘာ ၁၉
ရုရှားနယ်ခြားစောင့်တပ် အရာရှိ ၃ ဦးက နယ်နိမိတ်ချင်း ထိစပ်နေသော နေတိုးအဖွဲ့ဝင် အက်စတိုးနီးယားနိုင်ငံ၊ နာဗာမြစ်ကို ဒီဇင်ဘာ ၁၇ ရက်တွင် ဖြတ်ကျော်ကာ ကမ်းနားတွင် မိနစ် ၂၀ ကြာ လမ်းလျှောက်နေခဲ့သဖြင့် ရုရှား၏ တတိယကမ္ဘာစစ် အစပျိုးလိုမှု အနေအထားမျိုး မြင်တွေ့ခဲ့ရသည်။
မြူနှင်းများ ထူထပ်စွာ ကျဆင်းနေသော်လည်း နယ်စပ်စောင့်ကြည့် ကင်မရာများမှ ၎င်းတို့ ၃ ယောက် နယ်မြေဖြတ်ကျော် ဝင်ရောက်ကာ ဗက်စ်နာဗာရွာအနီး လမ်းလျှောက်နေခဲ့ပြီးမှ ရုရှားနယ်ဘက် ပြန်ဝင်သွားပြီး လေယာဉ်ဖြင့် ပြန်သွားသည်ဟု အက်စတိုးနီးယား ပြည်ထဲရေးဝန်ကြီး အိုက်ဂေါတာရိုက ရှင်းလင်း ပြောကြားခဲ့သည်။
ယင်းအခြေအနေကြောင့် အက်စတိုးနီးယား မြို့တော် တယ်လင်းရှိ ရုရှားသံမှူးကို အက်စတိုးနီးယား အာဏာပိုင်များက ဆင့်ခေါ် တွေ့ဆုံခဲ့ပြီးနောက် နယ်ခြားစောင့်တပ်အရာရှိ ၃ ဦးသည် မည်သည့် တည်နေရာကို ရောက်နေသည်ကို ကိုယ်တိုင်မသိသဖြင့် ကျူးကျော်မိသလို ဖြစ်ခြင်းသာဖြစ်ကြောင်းနှင့် မိုင်းများမြှုပ်ခြင်း အပါအဝင် အခြားမည်သည့် ခြိမ်းခြောက်မှုမျိုးမှ မလုပ်ခဲ့ကြောင်း ရှင်းလင်းခဲ့သည်ဟု ဆိုသည်။
အက်စတိုးနီးယား နယ်ခြားစောင့်တပ်သည် ယင်းဖြစ်စဉ်ပြီးနောက် နယ်စပ်ကင်းလှည့် စစ်သည်အင်အားကို တိုးမြှင့်ချထားပြီး ယခင်က ယင်းနေရာအနီး အက်စတိုးနီးယားနှင့် ရုရှားနယ် နှစ်ခုခွကာ တည်ရှိသည့် ပိုင်ပက်စ်ရေကန်သို့ ရုရှား နယ်ခြားစောင့်တပ်များ ခွင့်တောင်းပြီး ဝင်လာမှုများ ရှိသော်လည်း ယခုတစ်ကြိမ်တွင်မူ ခွင့်မတောင်းဘဲ ဝင်လာခြင်း ဖြစ်သည်ဟု ထုတ်ပြန်ခဲ့သည်။
ပြီးခဲ့သည့်လကလည်း ရုရှား MiG 35 ဖိုက်တာဂျက် ၃ စီးသည် အက်စတိုးနီးယားပိုင်နက် ဖင်လန်ပင်လယ်ကွေ့ ဒေသအတွင်း ၁၂ မိနစ်ကြာ ဝင်ရောက် ပျံသန်းကာ ခြိမ်းခြောက်မှု လုပ်ခဲ့သေးပြီး အက်စတိုးနီးယားပိုင်နက်ကို ထိပါးလျှင် အဖွဲ့ဝင်နိုင်ငံ ဖြစ်ခြင်းကြောင့် အဖွဲ့ ပုဒ်မ ၄ အရ နေတိုးမဟာမိတ်များ အားလုံးက ဝိုင်းဝန်းပါဝင် ခုခံခွင့်ရှိနေသဖြင့် ယခုတစ်ကြိမ် ထပ်မံ ကျူးကျော်မှုမှာ ဥရောပနှင့် စစ်ခင်းရန် ပူတင်ဘက်မှ ထပ်တိုး သွေးတိုးစမ်းမှု ဖြစ်နိုင်ကြောင်း သုံးသပ်နေကြသည်။
ကိုကလင်း
Ref: Thesun
#MeKongNews
#တတိယကမ္ဘာစစ်
#ရုရှားစစ်သား
#အက်စတိုးနီးယား
#နယ်စပ်
