မဲခေါင်၊ ဒီဇင်ဘာ ၁၉
အိမ်နီးချင်းနှစ်နိုင်ငံ ဆက်ဆံရေးအား သမိုင်းတွင် အနိမ့်ဆုံးအမှတ်သို့ တွန်းပို့ခဲ့ပြီး လူသေဆုံးမှုများလည်း ဖြစ်ပေါ် ခဲ့သည့် နယ်စပ်တင်းမာမှုများ ဆက်လက် မြင့်တက်နေစဉ် တရုတ် နိုင်ငံခြားရေးဝန်ကြီး ဝမ်ယီက ထိုင်းနိုင်ငံခြားရေးဝန်ကြီးနှင့် ကမ္ဘောဒီးယား နိုင်ငံခြားရေးဝန်ကြီးတို့ကို ဗုဒ္ဓဟူးနေ့တွင် သီးခြားစီ ဖုန်းခေါ်ဆိုခဲ့ကြောင်း ထိုင်းသတင်းဌာနများက ဖော်ပြသည်။
ထိုင်းနိုင်ငံခြားရေးဝန်ကြီး သီဟာဆက်ဖွမ်ကက်ကီယို နှင့် ကမ္ဘောဒီးယား နိုင်ငံခြားရေးဝန်ကြီး ပရက်ဆိုခွန်တို့က နယ်စပ်တစ်လျှောက်မှ နောက်ဆုံး အခြေအနေများကို တရုတ်အား အသိပေးခဲ့ကြသည်။
တင်းမာမှုများလျော့ပါးရေး နှင့် အပစ်အခတ်ရပ်စဲမှု အကောင်အထည်ဖော်ရေးကို စိတ်အားထက်သန်ကြောင်း နှစ်ဖက်စလုံးက ပြောကြားခဲ့ကြသည်ဟု တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ဟွာကျီယာကျွန် က လူမှုကွန်ရက်တွင် ပြောကြားသည်။
တိုက်ပွဲများအတွင်း အရပ်သားများ သေဆုံး၊ ဒဏ်ရာရရှိခဲ့ခြင်းအတွက် နှစ်နိုင်ငံစလုံးနှင့် ရင်းနှီးသောအိမ်နီးချင်းနှင့် မိတ်ဆွေဖြစ်သော တရုတ်နိုင်ငံက အလွန်ဝမ်းနည်းကြောင်း ဝမ်ယီက ဆိုသည်။
နောက်ဆုံး ထိပ်တိုက်တွေ့ဆုံမှု၏ ပြင်းထန်မှုသည် ယခင် ဖြစ်ရပ်များထက် လွန်ကဲနေသည်ဟု ၎င်းက မှတ်ချက်ပြုခဲ့ပြီး ဆက်လက် တိုက်ခိုက်နေခြင်းမှာ နှစ်ဖက်စလုံးအတွက် အကျိုးမရှိဘဲ အာဆီယံအဖွဲ့၏ စည်းလုံးညီညွတ်မှုကို ထိခိုက်ကြောင်းလည်း ၎င်းက သတိပေး ပြောကြားခဲ့သည်။
လောလောဆယ် အရေးအကြီးဆုံး တာဝန်မှာ အပစ်ရပ်ရေး ချက်ခြင်းဆုံးဖြတ်ကြရန်၊ ထိခိုက်နစ်နာမှုများ အချိန်မီ လျှော့ချကြရန်နှင့် နှစ်ဖက်ယုံကြည်မှု ပြန်လည် ထားရှိရန်ဖြစ်ကြောင်း ဝမ်ယီက ဆိုသည်။
တရုတ်နိုင်ငံ၏ အာရှရေးရာအထူးကိုယ်စားလှယ်ကိုလည်း အပြန်အလှန် သံတမန်ရေးအတွက် နှစ်နိုင်ငံစလုံးသို့ စေလွှတ်ထားကြောင်းလည်း ၎င်းက ဆက်ပြောသည်။
တရုတ်နိုင်ငံက ပေါင်းကူးတံတားအဖြစ် ထိုင်းနှင့် ကမ္ဘောဒီးယားနိုင်ငံကြား ငြိမ်းချမ်းရေး ပြန်ရရန် အပြုသဘောဆောင်သော အခန်းကဏ္ဍမှ ဆက်လက် ပါဝင်သွားမည်ဟုလည်း ၎င်းက ဆိုသည်။
ထို့ပြင် တရုတ်စီမံကိန်းများနှင့် နိုင်ငံသားများ၏ ဘေးကင်းလုံခြုံမှု သေချာစေရန် ထိရောက်သော အစီအစဉ်များ လုပ်ဆောင်သွားကြရန်လည်း တရုတ် နိုင်ငံခြားရေးဝန်ကြီးက နှစ်နိုင်ငံစလုံးကို တိုက်တွန်း ပြောကြားခဲ့သလို နှစ်ဖက်စလုံးနှင့် တရုတ်နိုင်ငံကြားက ရင်းနှီးသော ဆက်ဆံရေး ပျက်စီးသွားစေရန် ရည်ရွယ်သော သတင်းမှား ဖြန့် ချိမှုများကို သတိရှိကြရန်လည်း ပြောကြားသည်။
အေးကျော်
Ref:Thai PBS World
#MeKongNews
#ထိုင်း
#ကမ္ဘောဒီးယား
#တရုတ်
#အရှိန်မြှင့်
